I-personalize ang Inyong Pagtuon sa Ebanghelyo
Susiha kini nga mga sugyot alang sa pagtuon sa ebanghelyo ug sa pagpangita og mga tubag sa inyong espirituhanong mga pangutana.
Sa unsang paagi kamo magtuon kon mangita og mga tubag sa usa ka espirituhanon nga pangutana o bisan maningkamot nga mas makasabut sa mga kasulatan? Akong gipasabut kamo—sa personal nga paagi. Ang tanan adunay nagkalain-lain nga paagi sa pagtuon alang sa eskwelahan, apan usahay kita makalimot nga mahimo usab natong himoong indibidwal ang atong pagtuon sa ebanghelyo. Sa sunod higayon nga kamo adunay usa ka espirituhanon o doktrinal nga pangutana, sulayi ang pipila ka mga sugyot sa paghunahuna kon unsa ang labing maayo alang kaninyo.
1. Paghimo
Paghimo og lista, usa ka tsart o usa ka mapa. (Tan-awa sa ubos ang ehemplo.)
Paghimo og study web. Isulat ang mga pulong ug mga ideya ug dayon isumpay kini pinaagi sa mga linya ug mga bula-bula sa pagpakita kon unsay relasyon niini.
2. Pagsulat
Irekord ang mga hunahuna ug mga impresyon nga inyong nadawat atol sa inyong pagtuon sa kasulatan diha sa study journal ug ribyuha kadto nga mga hunahuna kanunay.
Isulat ang inyong mga hunahuna ug mga impresyon human sa inyong mga pag-ampo, bisan kon ang mga impresyon dili direkta nga may kalabutan sa hilisgutan nga inyong gitun-an. Tan-awa unsa ang gitudlo sa Espiritu kaninyo.
Isulat ang inyong mga pangutana diha sa usa ka notebook, diha sa inyong telepono, o sa usa ka papel sa inyong higdaanan aron sa pagpahinumdom kaninyo ug sa pagtabang ninyo nga magpadayon sa paghunahuna kon unsay inyong nakat-unan kada adlaw.
3. Paminawa ug Hisguti
Pakigsulti sa usa ka ginikanan o kasaligan nga lider. Buhata ninyo kini. Tingali mataudtauran, apan kamo molambo diha sa proseso.
Pagtudlo og laing tawo. Pagpuli-puli sa pagpakigbahin sa unsay inyong nahibaloan . Hisguti kon unsay inyong nakat-unan gikan sa usag usa.
Paminaw sa mga kasulatan o sa laing LDS nga mga istorya ug mga kapanguhaan.
4. Pagsiksik
Pangitaa ang mga tabang sa pagtuon diha sa kasulatan ug sa online (tan-awa sa ubos ang lista sa makatabang nga mga kapanguhaan sa LDS).
Pangitaa sa LDS.org ang mga video ug mga kanta mahitungod sa unsay inyong gitun-an.
Tun-i ang konteksto. Siksika ang kasaysayan o ang mga kapitulo kalabut sa hilisgutan o kasulatan nga inyong gitun-an.
5. Buhata
I-drama ang mga istorya gikan sa mga kasulatan o sa ubang mga kapanguhaan. Sa unsang paagi nga ang pagbutang sa inyong kaugalingon sa kahimtang sa tawo makatabang ninyo sa pagsabut unsay inyong gitun-an? Unsa nga susama nga mga sitwasyon anaa sa inyong kinabuhi?
Paghimo og scripture chain nga nagsumpay sa mga tubag nga inyong makit-an sa mga kasulatan. (Tan-awa sa ubos ang ehemplo.)