“Unsaon nako sa pagkahibalo nga ang Dios naminaw sa akong mga pag-ampo?”

Ang pag-ampo usa ka dakong panalangin, ug gisaaran kita nga ang Langitnong Amahan kanunayng maminaw, apan sa kasagaran nagkinahanglan og pipila ka lihok ang pag-ila sa Iyang mga tubag.¹

Hunahunaa kini: ang Dios maminaw kanimo o dili Siya maminaw. Kon dili Siya maminaw, nan walay pulos ang pag-ampo. Apan kon Siya maminaw (ug kay Siya maminaw man gayud!), kinahanglan nga atong hibaloan kon unsaon gayud sa pakig-istorya Kaniya pinaagi sa pag-ampo, pag-ila sa mga tubag, ug matinud-anong magpadayon.

Kon gibati nato nga wala Siya maminaw, tingali kinahanglan nato nga masinati ang pipila ka personal nga kalamboan. Mahimong pangutan-on nimo ang imong kaugalingon: Limpyo ba ako? Maayo ba ang akong mga motibo? Andam ba kong mobuhat sa Iyang ipabuhat?² Kon ang tubag sa matag usa niini, oo, makasalig kamo nga “ang Ginoo nga imong Dios … mohatag kanimo og tubag sa imong mga pag-ampo” (D&P 112:10). Hinumdumi nga usahay ang mga tubag moabut nga dili direkta o sa wala damhang mga paagi.

Kon dili ang imong gitubag sa ubang pangutana, dili pa gayud ulahi ang tanan! Himoa ang gikinahanglang mga kausaban sa imong kinabuhi aron mabatunan nimo ang Espiritu. Himoa nga andam ka sa mga pag-aghat nga imong madawat.

Ug ayaw kalimti nga ang tanan makadawat sa tubag sa lahi-lahi nga paagi. Pag-ampo nga ang Espiritu Santo makatudlo unsaon nimo sa pag-ila sa mga tubag. Tingali dili sayon ang pag-ila niini sa sinugdanan, apan susama ra kini sa uban pang mga kahanas: ang paglihok maghimo nga kini mahingpit. Batuni ang pagtuo ug pagsalig nga ang Langitnong Amahan kanunay nga maminaw.

Paminaw sa Espiritu

Paningkamuti ang pagpaminaw sa Espiritu Santo. Sa lahi-lahi nga paagi madungog sa mga tawo ang Espiritu Santo, mao nga tingali naminaw ka sa hinay, hinagawhaw nga tingog samtang ang pag-aghat moabut nga usa ka pagbati. Ako nasayud nga ang Espiritu Santo mosulti kaninyo sa tanan nga kinahanglan ninyong mahibaloan—kinahanglan lamang nimo ang pagpaminaw.

Elise G., edad 13, Alberta, Canada

Mga tubag sa Simbahan

Kausa dako ang akong pagduha-duha kon makig-date ba ko og dili miyembro sa simbahan. Usa ka Dominggo sa sakrament miting, usa ka sister mihatag og pakigpulong nga daw personal nga gitumong ngari nako. Nianang higayona, nakadawat ko og kasiguroan nga ang Ginoo mitubag sa akong pag-ampo. Kaniadto, naglibug ko kon unsay buhaton, apan dayon gihupay ko sa Espiritu Santo, nga mipuno og kalipay sa akong kasingkasing ug kaisug. Motubag ang Dios kanato pinaagi sa mga pagbati, hunahuna, sa mga kasulatan, ug gani sa mga mamumulong sa simbahan!

Karen V., edad 19, Minas Gerais, Brazil

Hinumdumi Kon si Kinsa Ka!

Nasayud ko nga ang Dios maminaw kanato tungod kay ang pag-ampo momugna og pagbati sa kalinaw, kahupayan, ug gugma sa akong kasingkasing. Akong nakita nga Iya kong gilikay sa mga peligro sa matag adlaw ug Iyang gipanalipdan ang akong pamilya, ug akong gibati nga Iya kong gihigugma. Sa dili pa ko moeskwela, kanunay nakong litukon ang Young Women theme; nakatabang kini nga mahinumdom ko nga ako anak sa Langitnong Amahan nga nahigugma kanako.

Nicol M., edad 19, Lima, Peru

Pag-ampo sa Usa ka Bata

Nahibalo ko nga ang Langitnong Amahan maminaw sa akong mga pag-ampo tungod niini nga mga pulong sa kanta sa Primary nga “Ampo sa Usa ka Bata” (Songbook sa mga Bata, 6): “Amahan namo, naa ba gyud ka? Sa pag-ampo sa bata naminaw ba gyud ka? Ingon nila ang langit layo, apan duol ra kon ako mag-ampo.” Kon hinumduman nako kana nga kanta, nahibalo ko nga naminaw Siya tungod kay mibati ko sa Espiritu ug sa walay kinutuban Niya nga gugma alang kanako. Sa akong paghinumdom nga Siya nahigugma kanako, bation nako ang kahupayan ug nahibalo nga maminaw Siya sa akong mga pag-ampo.

Elaine B., edad 16, North Carolina, USA

Salig Kaniya

Ang Langitnong Amahan maminaw kanunay sa atong mga pag-ampo, apan usahay ingon og dili Siya motubag sa atong mga pag-ampo tungod kay tingali Siya dili motubag kanato sa unsang paagi o kon kanus-a nato gusto ang tubag. Kinahanglan nga andam kitang motugyan sa atong kabubut-on ngadto sa Iyang kabubut-on ug magbaton og pagtuo nga Siya nahibalo unsay pinakamaayo para kanato. Nahigugma kanato ang Langitnong Amahan ug kanunay Siyang maningkamot sa pagtabang kanato nga makat-on ug motubo samtang tubagon Niya ang atong mga pag-ampo.

Mosiah M., edad 17, Utah, USA

Pangayo ug Kamo Makadawat

Pinaagi sa mga kasulatan, natudloan kita nga ang Dios maminaw kanunay sa atong mga pag-ampo ug motubag niini kon tawagon nato Siya uban sa pagtuo ug tinuod nga katuyoan. Sa atong kasingkasing bation nato ang kumpirmasyon nga Siya maminaw gayud kanato, usa ka pagbati sa kalinaw ug kakalma. Mobati usab kita nga maayo ra ang tanan kon mosunod kita sa kabubut-on sa Amahan. Kon magduha-duha kita nga Siya maminaw kanato, kinahanglan nga tinguhaon nato ang giya gikan sa mga kasulatan ug dayon mangutana kon ang mga butang nga atong gibasa tinuod ba.

Constanza L., edad 20, Bío Bío, Chile

Siksika Kini

Kausa naghunahuna ko kon ang Dios maminaw ba sa akong mga pag-ampo, ug dayon akong gibati ang tubag sa akong kasingkasing. Nakadungog ko og tawo nga mihatag og pagpamatuod bahin sa pag-ampo, ug akong gibati ang Espiritu Santo. Ang uban pa nakong tambag mao ang pagpangutana sa imong mga ginikanan, bishop, o ubang miyembro sa imong ward. Gani mahimo kang mag-ampo alang sa tabang niini nga hilisgutan!

Joshua S., edad 13, Oregon, USA

Mag-ampo nga Tinuoray

Human sa imong pag-ampo, mahimo kang maminaw sa mga pagbati ug katuyoan nga moabut sa imong kasingkasing. Ang usa niini mao tingali ang tubag sa imong pag-ampo. Kon mag-ampo kita inubanan sa tinuod nga katuyoan ug sinserong kasingkasing, ang atong Langitnong Amahan motubag sumala sa atong hugot nga pagtuo nga anaa Kaniya. Dili siya motubag aron lang sa pagtagbaw sa atong kakuryuso.

Jean-Claude N., edad 16, Kasaï-Central, Democratic Republic of the Congo