Mga Tingog sa mga Santos sa Ulahing mga Adlaw
Ang Nawala nga Pitaka
Paghulagway pinaagi ni Wilson Ong
Bag-ohay lang mibalhin ko sa usa ka bag-ong panimalay ug mihangyo og pipila ka mga miyembro sa Simbahan nga magpatabang ko sa usa ka proyekto sa akong balay. Sa tunga-tunga sa paghimo sa proyekto, milakaw ko sa pagpalit og mga materyal nga among gikinahanglan aron matiwas. Dihang natiwas namo ang proyekto, akong namatikdan nga wala ang akong pitaka. Natarantar ko tungod kay naa sulod sa akong pitaka ang tanan nakong personal nga dokumento kauban sa kwarta nga bag-o lang nakong nadawat gikan sa kliyente nianang buntaga. Akong gisubay ang akong giagian sa akong gipalitan apan wala koy swerte. Mipauli ko ug gipangita basin nahulog ra kini didto, apan wala gihapon nako makit-i. Nagsugod ko sa paghunahuna sa posibilidad nga magpahimo na lang kog bag-ong mga kopya sa tanang dokumento. Dayon sa wala pa ko mobiya sa balay, usa ka higala nangutana, “Nag-ampo ka na ba?”
Naghunahuna dayon ko, “Oo nag-ampo na ko!”
Apan sa pagkatinuod, wala ko mag-ampo sa tinuod nga katuyoan. Hinoon, gusto nakong ipugos ang akong kabubut-on sa Langitnong Amahan ug Siya na ang bahala sa pagtabang nga makit-an nako ang akong pitaka. Apan dayon akong nahinumduman ang kasulatan sa Isaias 55:8: “Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nagaingon ang Ginoo.”
Pagka-Dominggo misimba ko, ug ang miyembro nga akong kauban sa wala pa kadtong adlawa misulti nako nga nag-ampo gayud siya sa Langitnong Amahan nga unta akong makit-an ang akong pitaka. Miingon nga siya dunay pagbati nga kini akong makit-an. Sa wala madugay, samtang naglingkod ko alang sa personal nakong pagtuon, nagsugod ko sa pagbasa sa Pagkadawat og Tubag sa Atong mga Pag-ampo ni Elder Gene R. Cook, emeritus nga sakop sa Seventy. Ang unang pahina naghisgot sa usa ka istorya nga susama sa akong problema: Ang anak ni Elder Cook nawad-an sa iyang pitaka, mao nga nagpundok ang iyang pamilya ug nag-ampo sa Ginoo nga ila kining makit-an.
Human og basa niana nga kasinatian, akong gigamit ang akong nakat-unan ug akong gipundok ang akong asawa ug mga anak. Nagliyok kami ug ang matag usa mihalad og pag-ampo, nangamuyo sa Ginoo nga tabangan kami nga makit-an ang pitaka kon Iya man nga kabubut-on.
Sa miagi nasaksihan na nako ang gahum sa pag-ampo, apan pagkahuman, diha nga pribado kong nag-ampo, mihangyo ko sa Langitnong Amahan nga tubagon ang among pag-ampo aron malig-on ang pagtuo sa akong asawa ug mga anak.
Pagkasunod adlaw usa ka tawo nanawag nako. Miingon siya nga nakit-an niya ang akong pitaka, lakip ang kwarta. Mibakho ko sama sa usa ka bata tungod kay ang akong pag-ampo natubag ug ang pagtuo sa akong pamilya nalig-on.
Nasayud ko nga ang Langitnong Amahan, bisan dunay daghang anak nga giatiman, motubag sa matag usa kanato sumala sa Iyang panahon ug sa Iyang paagi.