Mga Tubag gikan sa mga Lider sa Simbahan
Unsaon sa Pagpangita og Tinuod nga Kalinaw
Gikan sa pakigpulong sa Abril 2013 nga kinatibuk-ang komperensya.
Ang langitnong tinguha sa maayong mga tawo bisan asang dapita sa kanunay mao gayud ang kalinaw sa kalibutan. Kinahanglang dili kita mohunong sa pagkab-ot niini nga tumong. Apan, si Presidente Joseph F. Smith (1838–1918) nagtudlo, “Dili gayud moabut sa kalibutan kanang espiritu sa kalinaw ug gugma … hangtud ang mga tawo makadawat sa kamatuoran ug mensahe sa Dios … , ug moila sa iyang gahum ug awtoridad nga balaan.”
Naglaum ug nag-ampo gayud kita alang sa kinatibuk-ang kalinaw, apan anaa sa mga indibidwal ug pamilya nga atong makab-ot ang matang sa kalinaw nga mao ang gisaad nga ganti sa pagkamatarung. Kini nga kalinaw mao ang gisaad nga gasa sa misyon ug maulaong sakripisyo sa Manluluwas.
Ang kalinaw dili lang kahilwasan o walay gubat, walay kabayolente, walay panagbangi, ug walay panagbingkil. Ang kalinaw nagagikan sa pagkahibalo nga ang Manluluwas nakaila kinsa kita ug nakahibalo nga kita adunay hugot nga pagtuo Kaniya, nahigugma Kaniya, ug mosunod sa Iyang mga sugo, bisan ug ilabi na sa grabe nga mga pagsulay ug trahedya sa kinabuhi (tan-awa sa D&P 121:7–8).
“Ang kalinaw asa ko pangitaa? Kon ubang adtoan di katabang?” (“Where Can I Turn for Peace?” Hymns, nu. 129). Ang tubag mao ang Manluluwas, kinsa mao ang tinubdan ug tigpasiugda sa kalinaw. Siya mao ang “Prinsipe sa Pakigdait[Kalinaw]” (Isaias 9:6).
Pagpaubos sa atong kaugalingon atubangan sa Dios, pag-ampo kanunay, paghinulsol sa sala, pagkanaog ngadto sa tubig sa bunyag uban sa usa ka masulub-on nga kasingkasing ug mahinulsulon nga espiritu, ug pagkahimong tinuod nga disipulo ni Jesukristo mao ang mga ehemplo sa pagkamatarung nga gantihan og kalinaw.
Ang Simbahan mao ang dangpanan diin ang mga sumusunod ni Kristo makaangkon og kalinaw. Ang ubang mga batan-on sa kalibutan moingon nga sila espirituhanon apan dili relihiyoso. Ang pagkaespirituhanon usa ka maayong unang lakang. Hinoon, dinhi sa Simbahan kita nakigdait, gitudloan, ug giamumahan sa maayong pulong sa Dios. Labi na, ang awtoridad sa priesthood diha sa Simbahan ang nagpahigayon sa sagrado nga mga ordinansa ug mga pakigsaad nga nagbugkos sa mga pamilya ug naghatag nato og kahigayunan nga makabalik ngadto sa Dios nga Amahan ug ni Jesukristo sa celestial nga gingharian. Kini nga mga ordinansa makahatag og kalinaw tungod kay kini mga pakigsaad uban sa Ginoo.
Diha sa mga templo kining daghang sagrado nga mga ordinansa ipahigayon ug mao usab ang tinubdan sa malinawong dangpanan gikan sa kalibutan. Kadtong mobisita sa nataran sa templo o moapil sa open house sa templo mobati usab niini nga kalinaw.
Ang Manluluwas mao ang tinubdan sa tinuod nga kalinaw. Bisan sa mga pagsulay sa kinabuhi, tungod sa Pag-ula ug grasya sa Manluluwas, ang matarung nga pagpuyo pagagantihan og personal nga kalinaw. (tan-awa sa Juan 14:26–27; 16:33).