Ang Gubat Nagpadayon
Ang gubat nga nagsugod didto sa langit nagpadayon hangtud karong adlawa. Sa pagkatinuod, ang gubat nagkagrabe samtang ang mga Santos nangandam sa pagbalik sa Manluluwas.
Paghulagway sa litrato pinaagi ni Katarina Stefanovic © iStock/Getty Images; Higayon/Getty Images
Si bisan kinsa nga nagsunod sa internasyonal nga mga balita mouyon nga kita nagpuyo sa panahon sa “mga gubat ug hungihong sa gubat” (D&P 45:26). Maayo na lang, kay ang tanang naa sa yuta beterano sa gubat. Kita nakigbisog sa mga panon sa dautan sa nagpadayon nga gubat nga gisugdan didto sa premortal nga kalibutan sa wala pa kita matawo.
Tungod kay kita wala pay pisikal nga mga lawas, nakig-away kita sa Gubat didto sa Langit nga walay mga espada, mga pusil, o mga bomba. Apan ang pakig-away sama ka grabe sa bisan unsang moderno nga mga gubat, ug adunay binilyon nga mga naangol.
Sa premortal nga gubat mao ang pakig-away sa mga pulong, ideya, debate, ug pag-agni (tan-awa sa Pinadayag 12:7–9, 11). Ang estratehiya ni Satanas mao ang pagpanghadlok sa mga tawo. Nasayud siya nga ang kahadlok mao ang labing maayo nga paagi sa pagguba sa hugot nga pagtuo. Mahimong maggamit siya sa mga argumento sama niini: “Lisud kini kaayo.” “Imposible nga malimpyo pa kini og balik.” “Risgo kaayo kini.” “Unsaon nimo pagkahibalo nga makasalig ka ni Jesukristo?” Masina kaayo siya sa Manluluwas.
Salamat na lang, ang plano sa Dios nagmadaugon batok sa mga bakak ni Satanas. Ang plano sa Dios naglakip sa moral nga kagawasan alang sa mga katawhan ug sa dakong sakripisyo. Si Jehova, nga nailhan nato nga mao si Jesukristo, miboluntaryo nga mahimo nga sakripisyo—aron moantus sa tanan natong mga sala. Andam siyang motugyan sa Iyang kinabuhi alang sa Iyang mga kaigsoonan aron nga kadtong maghinulsol malimpyo pag-usab ug sa katapusan mamahimong sama sa ilang Langitnong Amahan. (Tan-awa sa Moises 4:1–4; Abraham 3:27.)
Ang lain nga mga bintaha nga nakatabang ni Jehova nga madaug ang mga kasingkasing sa mga anak sa Dios mao ang gamhanan nga pagpamatuod nga gihatag sa Iyang mga tigsuporta, gipangulohan ni Miguel, ang arkanghel (tan-awa sa Pinadayag 12:7, 11; D&P 107:54). Sa kinabuhi nga wala pa dinhi sa yuta, si Adan gitawag og Miguel, ug si Satanas gitawag og Lucifer, nga nagpasabut sa “tigdala sa kahayag.”1 Ingon nga usa ka katingalahan nga ngalan alang sa usa ka prinsipe sa kangitngit (tan-awa sa Moises 7:26), apan ang mga kasulatan nagtudlo nga si Satanas kanhi “ang anghel sa Dios kinsa may pagtugot diha sa atubangan sa Dios” sa wala pa siya napukan (tan-awa sa D&P 76:25–28).
Sa unsa kaha nga paagi ang espiritu nga dako kaayo og kahibalo ug kasinatian hilabihang pagkapukan? Tungod kadto sa iyang garbo. Si Lucifer misukol sa atong Amahan sa Langit tungod kay gusto niya ang gingharian sa Dios alang sa iyang kaugalingon.
Sa iyang walay paglubad nga pakigpulong “Beware of Pride”, si Presidente Ezra Taft Benson (1899–1994) mitudlo nga si Lucifer “nangandoy nga tahuron nga labaw sa tanan” ug nga “ang iyang mapahitas-on nga tinguha mao ang kuhaon ang truno sa Dios.”2 Nakadungog usab kamo nga si Satanas gustong moguba sa sa kabubut-on sa tawo, apan dili lang kana mao ang bugtong rason nga siya wala na gidawat sa Dios. Siya gisalikway gikan sa langit tungod sa pagsukol batok sa Amahan ug sa Anak (tan-awa sa D&P 76:25; Moises 4:3).
Ngano nga kamo ug ako nakig-away batok sa yawa? Nakig-away kita tungod sa pagkamaunungon. Atong gihigugma ug gisuportahan ang atong Amahan sa Langit. Gusto kita nga mahisama Kaniya. Si Lucifer adunay laing tumong. Gusto niya nga pulihan ang Amahan (tan-awa sa Isaias 14:12–14; 2 Nephi 24:12–14). Hunahunaa kon sa unsang paagi nga nasakitan ang atong Langitnong ginikanan sa pagbudhi ni Satanas. Sa mga kasulatan, atong mabasa nga “ang mga langit naghilak tungod kaniya” (D&P 76:26).
Human sa usa ka grabe nga kampanya, si Miguel ug ang iyang mga kasundalohan mipatigbabaw. Duha sa tulo ka bahin sa langitnong mga panon mipili sa pagsunod sa Amahan (tan-awa sa D&P 29:36). Si Satanas ug ang iyang mga sumusunod gisalikway gikan sa langit, apan sila wala diha-diha dayon gipadala ngadto sa kawanangan sa kangitngit. Una, sila gipadala dinhi sa yuta (tan-awa sa Pinadayag 12:7–9), diin si Jesukristo matawo ug diin ang Iyang maulaon nga sakripisyo pagahimuon.
Nganong ang mga panon ni Satanas gitugutan nga moanhi sa yuta? Miabut sila sa paghatag og mga katugbang alang niadtong kinsa gisulayan dinhi (tan-awa sa 2 Nephi 2:11). Itambog ba sila sa katapusan ngadto sa kawanangan sa kangitngit? Oo. Human sa Milenyum, si Satanas ug ang iyang panon isalikway sa kahangturan.
Si Satanas nahibalo nga limitado ang iyang panahon sa pagtrabaho. Sa Ikaduhang pag-anhi ni Jesus, si Satanas ug ang iyang mga anghel gapuson sulod sa 1,000 ka tuig (tan-awa sa Pinadayag 20:1–3; 1 Nephi 22:26; D&P 101:28). Samtang nagkaduol kana nga tagal, ang mga pwersa sa dautan despiradong nakig-away aron makadala sila og daghang kalag kutob sa ilang mahimo.
Si Juan ang Tigpadayag gipakita sa Gubat sa Langit isip kabahin sa usa ka mahinungdanon nga panan-awon. Gipakita ngadto kaniya kon sa unsang paagi nga si Satanas gitambog ngadto sa yuta aron motintal sa mga katawhan. Mao kini ang reaksyon ni Juan: “Alaut kamo, O yuta ug dagat, kay diha kaninyo nahilusad ang yawa nga puno sa dakung kapungot sanglit nasayud man siya nga hamubo na lamang ang iyang panahon” (Pinadayag 12:12).
Giunsa paggahin ni Satanas ang iyang mga adlaw, nasayud nga wala siyay usikan nga panahon? Si Apostol Pedro misulat nga “ang yawa nagalibutlibot sama sa leon nga nagangulob nga nangitag iyang matukob” (1 Pedro 5:8).
Unsa man ang mga makapadasig ni Satanas? Siya dili gayud makabaton og lawas, dili gayud siya makabaton og usa ka asawa o usa ka pamilya, ug siya dili gayud makabaton og hingpit nga kalipay, mao nga gusto niya himoon ang tanang mga lalaki ug babaye nga “mauyamot sama ngadto kaniya” (2 Nephi 2:27).
Ang yawa nagpunting sa tanang mga tawo, ilabi na niadtong adunay labing potensyal alang sa mahangturong kalipay. Tataw kaayo nga masina siya ni bisan kinsa nga anaa sa dalan padulong sa kahimayaan. Ang mga kasulatan nagtudlo nga si Satanas “nagpasiugda og gubat sa mga santos sa Dios ug miliyok kanila palibut” (D&P 76:29).
Ang gubat nga nagsugod didto sa langit nagpadayon hangtud karong adlawa. Sa pagkatinuod, ang gubat nagkagrabe samtang ang mga Santos nangandam sa pagbalik sa Manluluwas.
Si Presidente Brigham Young (1801–77) nanagna “nga ang Simbahan mokatap, mo-uswag, motubo ug mopadayon, ug dungan sa pagkatap sa Ebanghelyo sa taliwala sa mga nasud sa yuta, ingon usab ang pagsaka sa gahum ni Satanas magkakusog.”3
Nagtuo ko nga kitang tanan mouyon nga kining panagna natuman samtang kita magtan-aw sa dautan nga nakasulod sa mga katilingban sa kalibutan. Si Presidente Young mitudlo nga kinahanglan natong tun-an ang mga taktika sa kaaway aron sa pagbuntog kaniya. Akong ipaambit ang upat ka napamatud-an nga estratehiya ni Satanas ug sa pipila ka mga ideya kon unsaon sa pagbatok niini.
Ang Estratehiya ni Satanas
1. Tintasyon. Ang yawa walay lipud-lipod kon bahin na sa pagbutang og dautang mga ideya ngadto sa atong mga hunahuna. Ang Basahon ni Mormon nagtudlo nga si Satanas mohung-hong sa hugaw ug ngil-ad nga mga hunahuna ug magtisok og mga hunahuna sa pagduha-duha. Magsige siya og tulod kanato sa pagbuhat sa makaadik nga gana ug sa pag-abiabi sa kahakog. Dili siya gusto nga atong mailhan kon asa naggikan kining mga ideya, mao nga siya mohunghong, “Ako dili yawa, kay walay yawa” (2 Nephi 28:22).
Unsaon nato sa pagbatok niining direkta nga mga tintasyon? Usa sa labing epektibo nga himan mao ang yanong pagpapahawa ni Satanas. Mao kana ang buhaton ni Jesus.
Ang istorya diha sa Bag-ong Tugon bahin sa tintasyon sa Manluluwas didto sa bukid mapuslanon. Human sa matag tintasyon nga gipresentar sa yawa ngadto Kaniya, si Jesus migamit sa usa ka depensa nga pamaagi: una, Siya mimando ni Satanas sa pagpahawa, dayon Siya mikutlo sa kasulatan.
Hatagan ko kamo og usa ka ehemplo: “Pahawa, Satanas!,” mimando si Jesus, “kay nahisulat kini nga nagaingon, Maoy simbaha ang Ginoo nga imong Dios, ug siya lamang ang alagara” (Mateo 4:10). Ang sunod nga bersikulo narekord, “Unya ang yawa mipahawa kaniya, ug, tan-awa, ang mga anghel miabut ug mialagad kaniya” (Mateo 4:11). Ang depensa sa Manluluwas epektibo kaayo!
Ang biography ni Presidente Heber J. Grant (1856–1945) naghatag og panabut kon sa unsang paagi si Presidente Grant, isip batan-ong lalaki, nakigbatok sa yawa. Sa dihang si Presidente Grant miila nga si Satanas naghunghong ngadto kaniya, naningkamot sa pagtanom og pagduha-duha sa iyang kasingkasing, siya yanong miingon, “Mr. Yawa, paghilom.”4
Ikaw adunay katungod sa pagsulti ni Satanas nga biyaan sa higayon nga kamo nag-atubang og tintasyon. Ang kasulatan nagtudlo, “Sukli ninyo ang yawa, ug kini mokaratil pagdagan gikan kaninyo” (Santiago 4:7).
Ang laing bahin sa depensa sa Manluluwas mao ang pagkutlo sa kasulatan. Adunay dakong gahum ang pagmemorya sa kasulatan, sama sa gibuhat ni Jesus. Ang mga bersikulo sa Kasulatan makahatag og daghang epektibo nga espirituhanong kasangkapan pag-atubang sa mga tintasyon.
Kon ikaw gitintal, mahimo ka nga magmemorya og mga sugo sama sa “Hinumduman mo ang adlaw nga igpapahulay, aron sa pagbalaan niini,” “Higugmaa ang inyong mga kaaway” o “Himoa ang hiyas nga modayan-dayan sa inyong mga hunahuna nga walay paghunong” (Exodo 20:8; Lucas 6:27; D&P 121:45). Ang gahum sa Kasulatan dili lamang maghulga ni Satanas, apan kini usab makadala sa Espiritu sa inyong kasingkasing, magsiguro kaninyo, ug maglig-on kaninyo batok sa tintasyon.
2. Ang mga bakak ug pagpanglingla. Ang mga kasulatan nagpadayag nga si Satanas mao “ang amahan sa bakak” (2 Nephi 9:9). Ayaw pagtuo kaniya kon siya mohunghong og mga mensahe sama sa “Wala gyud kay gibuhat nga taron,” “Makasasala ra kaayo ka aron mapasaylo,” “Dili na ka mausab,” “Walay nagpakabana kaninyo”, ug “Kamo walay mga talento.”
Laing bakak nga iyang gamiton sa kanunay mao ang mosunod: “Kinahanglan kang mosulay bisan kausa lang—para lang makasinati. Ang kausa nga higayon dili na makadaut nimo.” Ang hugaw nga sekreto nga dili niya gusto nga inyong mahibaloan mao nga ang sala makaadik.
Laing epektibong bakak nga isulay ni Satanas diha ninyo mao kini: “ang Tanan nagbuhat niini. Ok lang na.” Dili Kini OK! Busa sultihi ang yawa nga dili kamo gustong moadto sa telestial nga gingharian—bisan kon ang tanan moadto didto.
Bisan og si Satanas mamakak kaninyo, kamo makasalig sa Espiritu nga mosulti kaninyo sa kamatuoran. Mao nga ang gasa sa Espiritu Santo mahinungdanon kaayo.
Ang yawa gitawag nga “ang dakong manlilingla.”5 Mosulay siya sa pagkopya sa matag barunganan nga gipresentar sa Ginoo.
Hinumdumi, ang mini, dili sama sa katugbang. Ang katugbang sa puti ang itom, apan ang mini sa puti mahimong lagumon nga pagkaputi o abuhon. Ang mini maingon-ingon og dagway sa tinuod nga mga butang aron sa paglingla sa mga tawo nga walay pagduda. Mga bersyon kini sa mga maayong butang nga gituis, ug sama sa mini nga kwarta, wala kiniy bili. Tuguti ko sa pagpasabut.
Ang usa sa mga mini ni Satanas kabahin sa hugot nga pagtuo mao ang patuo-tuo. Ang iyang mini sa gugma mao ang kahigal. Iyang himoon nga mini ang priesthood pinaagi sa pagpaila sa pagpanapi sa mga pari, ug siya mosundog sa mga milagro sa Dios pinaagi sa paglamat.
Ang kaminyoon tali sa lalaki ug usa ka babaye gi-orden sa Dios, apan ang kaminyoon sa sama og sekso mini lamang. Dili kini makahatag og kaliwatan o kahimayaan. Bisan tuod og ang iyang imitasyon makalingla sa daghang mga tawo, kini dili ang tinuod nga mga butang. Dili kini makahatag og malungtarong kalipay.
Ang Dios nagpasidaan kanato mahitungod sa mga mini diha sa Doktrina ug mga Pakigsaad. Siya miingon, “Kana nga wala makahatag og kaayohan dili gikan sa Dios, ug iya sa kangitngit” (D&P 50:23).
3. Ang Panagbingkil. Si Satanas mao ang amahan sa panagbingkil. Ang Manluluwas nagtudlo, “Siya nagkutaw sa mga kasingkasing sa mga tawo sa panagbangi uban ang kasuko, sa usag usa” (3 Nephi 11:29).
Ang yawa nakakat-on gikan sa gatusan ka mga tuig sa kasinatian nga kon adunay panagbingkil, ang Espiritu sa Ginoo mobiya. Sukad sa una siya mikombinser kang Cain sa pagpatay ni Abel, si Satanas miimpluwensya sa mga managsoon nga mag-away. Siya usab mikutaw sa mga problema sa kaminyoon, tali sa mga sakop sa ward, ug tali sa misyonaryo nga kompanyon. Iyang ikahimuot ang pagtan-aw sa maayo nga mga tawo nga magkalalis. Maningkamot siya nga magkalalis ang pamilya sa dili pa moadto sa simbahan sa Dominggo, sa dili pa magfamily home evening sa Lunes sa gabii, ug sa higayon magplano ang magtiayon nga motambong og sesyon sa templo. Matag-anan ang iyang katukma.
Kon adunay panagbingkil diha sa inyong panimalay o sa trabahoan, hunonga dayon kon unsay imong gibuhat ug tinguhaa nga makigdait. Dili igsapayan kon kinsa ang nagsugod.
Sa kasagaran ang panagbingkil magsugod sa pagpangita og sayop. Si Joseph Smith mitudlo nga “ang yawa nag-ulog-ulog kanato nga kita hilabihan ka matarung, kon kita namantay sa mga sayop sa uban.”6 Kon maghunahuna kamo mahitungod niini, ang kinaugalingong pagkamatarung usa lang ka mini sa tinuod nga pagkamatarung.
Si Satanas ganahan nga mopakatap sa panagbingkil diha sa Simbahan. Siya nagtutok sa pagtudlo sa mga sayop sa mga lider sa Simbahan. Si Joseph Smith mipahimangno sa mga Santos nga ang ang mismong lakang sa apostasiya nagsugod uban sa pagkawala sa kompiyansa sa mga lider niini nga simbahan.7
Hapit tanan nga literatura batok sa Mormon gibase sa mga bakak mahitungod sa kinaiya ni Joseph Smith. Ang kaaway nagtrabaho pag-ayo aron sa pagpakaulaw ni Joseph tungod kay ang mensahe sa Pagpahiuli nag-agad sa asoy sa Propeta sa unsay nahitabo didto sa Sagradong Kakahoyan. Ang yawa mas naningkamot og maayo karon kay sa kaniadto sa paghimo sa mga miyembro nga mokwestyon sa ilang mga pagpamatuod sa Pagpahiuli.
Sa unang mga adlaw sa atong dispensasyon, daghang mga kaigsoonan sa priesthood, sa ilang mga pagmahay, wala mipadayon sa pagkamaunungon ngadto sa Propeta. Usa kanila mao si Lyman E. Johnson, kinsa na-excommunicate tungod sa dili matarung nga pamatasan. Sa kaulahian nagbangutan nga mibiya sa Simbahan: “Akong ipaputol ang akong tuo nga kamot, kon ako makatuo pa ug usab niini. Kaniadto ako napuno sa kamaya ug kalipay. Ang akong mga damgo makapahimuot. Sa akong pagmata sa buntag ang akong espiritu malipayon. Malipayon ko sa adlaw ug sa gabii, puno sa kalinaw ug hingpit nga kalipay ug pagpasalamat. Apan karon kini mao ang kangitngit, kasakit, kasubo, kauyamot sa hilabihan. Wala gayud ko sukad nakakita og usa ka malipayon nga panahon.”8
Hunahunaa ang mahitungod niadto nga mga pulong. Nagsilbi kining usa ka pahimangno ngadto sa tanang miyembro sa Simbahan.
Usa ako ka kinabig sa Simbahan. Nabunyagan ko dihang 23 anyos pa ko nga young single adult nga nagtambong og medikal nga eskwelahan sa Arizona, USA. Ako mismo nahibalo sa unsang paagi si Satanas naglihok diha sa mga investigator sa paglibug kanila nga makapawala sa kadasig kanila kon sila nagtinguha sa kamatuoran.
Sa tanang panahon sa akong kabatan-onan, nakakita ako sa mga ehemplo sa mga higala sa nga Santos sa Ulahing mga adlaw. Nadani ako sa paagi nga sila midala sa ilang mga kinabuhi. Mihukom ko sa pagkat-on og dugang mahitungod sa Simbahan, apan dili ko ganahan nga mosulti ni bisan kinsa nga nagtuon ko sa Mormonismo. Aron malikayan ang pagpamugos gikan sa akong mga higala, nakahukom ko nga mohimo sa akong pagpangita og usa ka pribado nga pagsusi.
Mao kini ang daghang katuigan sa wala pa ang internet, busa miadto ko sa public library. Nakakita ko og kopya sa Basahon ni Mormon ug usa ka libro nga gitawag og A Marvelous Work and a Wonder, ni Elder LeGrand Richards (1886–1983) sa Korum sa Napulog Duha ka mga Apostoles. Misugod ko sa pagbasa niining basahon uban sa dakong tinguha, ug akong nakita nga makapadasig kini.
Samtang ang akong espiritu nangandoy sa pagkat-on og dugang, si Satanas misugod paghunghong sa akong dunggan. Siya miingon nako nga aron mahimong hingpit nga patas, kinahanglan nakong basahon unsay gisulat usab sa mga kritiko sa Simbahan. Ako mibalik sa public library ug misugod sa pagtan-aw sa palibut. Sigurado gayud, akong nakit-an ang usa ka basahon nga mipakaulaw sa Propeta nga si Joseph.
Ang pagbasa niining anti-Mormon nga libro nakapalibog kanako. Nawala kanako kanang maayong espiritu ug impluwensya nga naggiya sa akong imbestigasyon. Nasagmuyo ko ug hapit na mobiya sa akong pagpangita sa kamatuoran. Ako nag-ampo alang sa tubag samtang nagbasa sa mga literatura batok sa Mormon!
Sa akong kasurprisa, nakadawat ko og tawag sa telepono gikan sa usa ka higala sa high school kinsa nag-eskwela sa Brigham Young University. Iya kong gidapit nga mobisita niya sa Utah, nagsaad nga ganahan kaayo ko sa maanindut nga talan-awon sa biyahe. Wala siyay ideya nga gitun-an nako sa hilum ang mahitungod sa iyang Simbahan.
Midawat ko sa iyang imbitasyon. Ang akong higala misugyot nga moadto kami sa Siyudad sa Salt Lake aron sa pagbisita sa Temple Square. Nasurprisa siya sa kamadasigon sa akong tubag. Wala siyay ideya kon unsa ko ka interesado nga makat-on sa kamatuoran mahitungod ni Joseph Smith ug sa Pagpahiuli.
Ang mga sister nga misyonaryo sa Temple Square matinabangon kaayo. Wala lang damha nga, natubag nila ang daghan nakong mga pangutana. Ilang mga pagpamatuod nakaimpluwensya kanako “pagduhaduha sa [akong] mga pagduhaduha,”9 ug ang akong hugot nga pagtuo nagsugod sa pagtubo. Ang gahum sa kinasingkasing nga pagpamatuod dili masukod.
Ang akong higala mipakigbahin usab sa iyang pagpamatuod ngari kanako ug midapit kanako sa pag-ampo ug mangutana sa Dios kon ang Simbahan tinuod. Sa taas nga biyahe balik sa Arizona, ako misugod sa pag-ampo uban sa hugot nga pagtuo—sa unang higayon “sa kinasingkasing, uban sa tinuod nga katuyoan” (Moroni 10:4). Pipila ka higayon niana nga biyahe, ingon nga ang akong tibuok nga sakyanan misanag sa kahayag. Akong nakat-unan mismo nga ang kahayag miiway sa kangitngit.
Human ako nakahukom nga magpabunyag, ang yawa mibutang sa katapusan nga pakigbisog. Iyang gitrabaho ang akong pamilya, kinsa mihimo kutob sa ilang mahimo aron sa pagbaliwala kanako, ug nagdumili sila sa pagtambong sa akong bunyag.
Nabunyagan ko gihapon, ug sa hinay-hinay ang ilang mga kasingkasing nalukmay. Misugod sila sa pagtabang kanako sa pagsiksik sa akong family history. Pipila ka tuig ang milabay, gibunyagan nako ang akong manghud nga lalaki. Ang higala kinsa midapit kanako sa pagbisita kaniya sa Utah akoa na karong asawa.
4. Pagkawala sa kadasig. Si Satanas epektibong mogamit niining himan diha sa labing matinud-anong mga Santos kon ang tanan mapakyas. Alang nako, kon magsugod ko og walay kadasig, makatabang kini nako sa pag-ila kon si kinsa ang naningkamot sa pagpaubos kanako. Kini nakapahimo kanako nga maglipay—para lang masagmuyo ang yawa.
Pipila ka tuig ang milabay, si Presidente Benson mihatag og pakigpulong nga giulohan og “Ayaw Pagpakawala sa Paglaum.” Niana nga makahuluganong pakigpulong, siya mipasidaan, “si Satanas kanunay naningkamot sa pagbuntog sa mga Santos uban sa kawalay paglaum, pagkawala sa kadasig, kaguol, ug depresyon.”10 Si Presidente Benson miawhag sa mga miyembro sa Simbahan nga magmabinantayon, ug siya mihatag og 12 nga makab-ut nga mga sugyot alang sa pagbatok sa pagkawala sa kadasig.
Ang iyang mga sugyot naglakip sa pagserbisyo sa uban; pagtrabaho og maayo ug paglikay sa katapulan; pagpraktis sa mga kinaiya sa maayong panglawas, nga naglakip sa pag-ehersisyo ug pagkaon sa natural nga paagi; pagtinguha og panalangin sa priesthood; pagpaminaw sa makapadasig nga musika; pag-ihap sa inyong mga panalangin; ug paghimo og mga tumong. Ug labaw sa tanan, sama sa gitudlo sa mga kasulatan, kita kinahanglan nga mag-ampo kanunay aron kita makabuntog ni Satanas (tan-awa sa D&P 10:5).11
Si Satanas magkurog kon siya makakita
Ang mahuyang nga santos magluhod.12
Importante nga masayud nga adunay mga utlanan ang gahum sa dautan. Ang Dios nga Kapangulohan ang mitakda niadtong mga utlanan, ug si Satanas dili tugutan sa pagtabok niini. Sama pananglit, ang mga kasulatan nagsiguro kanato nga ang “gahum wala ihatag ngadto kang Satanas sa pagtintal sa gagmay nga mga bata” (D&P 29:47).
Laing importante nga mga utlanan mao nga si Satanas wala makahibalo sa atong gihunahuna gawas kon kita mosulti kaniya. Mipasabot ang Ginoo, “Walay lain gawas sa Dios nga nasayud sa imong mga hunahuna ug sa mga katuyoan sa imong kasingkasing.” (D&C 6:16).
Tingali mao kini ang hinungdan ang Ginoo mihatag kanato og mga sugo sama sa “Ayaw pagbagulbol” (D&P 9:6) ug “Dili kamo magsulti og dautan sa imong silingan” (D&P 42:27). Kon kamo makakat-on sa pagpugong sa inyong pinulongan (tan-awa sa Santiago 1:26), dili kamo mosangput nga naghatag og sobrang impormasyon ngadto sa yawa. Kon makadungog siya sa pagbagulbol, pagreklamo, ug pagpanaway, maampingon siyang magtimaan niini. Ang imong negatibong mga pulong magbutang nimo nga mabantang ngadto sa kaaway.
Aduna koy maayong balita para kaninyo. Ang mga kasundalohan sa Dios mas dako pa kay sa mga kasundalohan ni Lucifer. Mahimo kamong motan-aw sa palibut ug hunahunaa sa inyong kaugalingon, “Ang kalibutan nagkaanam og kadautan. Si Satanas mahimong dumadaog.” Ayaw og pailad. Ang tinuod mao, atong nalabwan sa gidaghanon ang kaaway. Hinumdumi, duha sa tulo ka bahin nga mga anak sa Dios ang mipili sa plano sa Amahan.
Mga kaigsoonan, siguroha nga ikaw makig-away diha habig sa Ginoo. Siguroa nga kamo nagdala sa espada sa Espiritu.
Kini akong pag-ampo nga sa katapusan sa inyong kinabuhi, kamo makasulti uban ni Apostol Pablo, “gibugno ko na ang maayong pakigbugnoay, natapus ko na ang akong pagdalagan sa lumba, gikabantayan ko ang pagtoo” (2 Timoteo 4:7).