Mga Tingog sa mga Santos sa Ulahing mga Adlaw
Palihug Ayaw Patukara Kanang Kantaha
Gihulagway ni Bradley H. Clark
Kaniadto, ang akong pamilya ug ako nagpuyo sa Veracruz, Mexico, diin didto nangiskwela ang akong mga anak sa elementarya. Kada buntag samtang akong tabangan ang akong tulo ka anak nga mangandam para sa eskwela, maminaw mi sa radyo—ang pinaka-popular nga estasyon sa siyudad—nga dunay matahum nga programa nga gidumala sa batan-ong lalaki nga radio announcer.
Nagsugod kami og paminaw og usa ka dali ra kaayong hinumduman nga kanta. Sa dihang gipaminaw nako og maayo ang lyrics, akong namatikdan nga ang gipangsulti niini, bisan dili bastos, makadaot sa hunahuna ug ngil-ad.
Akong giklaro sa pag-ingon ang akong mga anak, “Dili mahimong maminaw ta niini nga matang sa pinulongan.” Tingali wala sila magtagad sa lyrics sa kanta, apan nahatagan nila og igong pagtagad ang pag-hum sa tuno niini.
Nakita nilang gipalong nako ang volume sa stereo ug nangutana kon ngano. “Akong sultihan ang radio announcer nga tangtangon sa programa kana nga kanta.” Ang gipakita nilang katingala midasig kanako sa pagpadayon.
Dili sila makatuo niini ug ako usab, apan gipunit nako ang telepono ug gitawagan ang estasyon sa radyo. Wala ko magdahum nga matubag, apan sa akong katingala, ang mao nga radio announcer nga bag-o lang namong nadungog sa radyo mitubag sa akong tawag diha-diha dayon.
Giingnan nako siya nga wala ko kauyon nianang kantaha, kay dunay daghang pamilya nga naminaw sa radyo nianang orasa sa buntag. Nangutana siya nako unsay akong isugyot nga ipuli niini, apan ang iyang sinultihan disiplinado kaayo nga gihangyo lang nako siya nga dili niya ipatukar kadto nga kanta sa panahon nga ang mga bata naa sa balay.
Wala gyud ko kahibalo kon ang akong tawag nadungog sa kahanginan, apan nagpasalamat ko nga ang radio announcer naminaw. Ug sulod sa misunod nga pipila ka adlaw, akong masulti nga gituman ang akong hangyo.
Kadto nga kasinatian nagmatuod kanako nga kinahanglan kitang magmaisugon kon gikinahanglan kitang mohimo og desisyon ug mohimo sa butang nga gikinahanglan sa pagprotektar sa atong mga anak gikan sa negatibong mga impluwensya. Kon buhaton nato kini, ang Espiritu Santo magpadayon nga atong kauban.