Pagpangandam alang sa usa ka Bag-ong Panaw
Ang tagsulat nagpuyo sa Paraná, Brazil.
Sama ni Nephi nga naglawig ngadto sa wala mahibaloi, nagkinahanglan ko nga mogamit og hugot nga pagtuo diha sa Ginoo mahitungod sa pagsugod og pamilya.
Litrato © Getty Images
Mga semana nalang padulong sa akong kaminyoon ug sa pagbugkos diha sa templo, gikulbaan nako og gamay mahitungod sa tanan nga mga butang nga kinahanglan nakong buhaton sa dili pa ko magsugod sa akong bag-ong pamilya. Bisan pa sa tanang hingpit nga kalipay nianang higayuna, gibati nako ang kaluya sa pag-organisar sa among bag-ong buluhaton, paghan-ay sa among panalapi, pagpangita og kabutangan sa among mga butang, ug sa akong bag-ong mga responsibilidad isip usa ka asawa. Ganahan ko nga makasiguro nga husto ang among pagsugod sa kaminyoon pinaagi sa paggahin og panahon alang sa importanting mga butang sa among mga kalihokan sama sa pagsunod sa mga sugo ug paggahin og panahon isip bana ug asawa bisan pa sa ka-busy sa among kinabuhi.
Samtang nagkaduol ang adlaw sa kasal, nahibulong kaayo ko sa nagsunod-sunod nga mangil-ad nga damgo nga naglakip sa tanang matang sa kasamok nga makaapekto sa usa ka pamilya. Tungod kay nagdako ako sa usa ka mahigugmaong pamilya apan anaa sa kalisud, kanunayng nahulga sa hilabihang panaglalis ug kagul-anan sa kasingkasing, ang bati nga mga damgo mas grabing naakapekto kanako. Mao nga usa ka gabii, human sa pipila ka sama niini, nakamata ko nga gipaningot ug nakahukom sa pagsunod sa tambag ni Sister Neill F. Marriott, Ikaduhang Magtatambag sa Kinatibuk-ang Kapangulohan sa Young Women, nga mihatag sa iyang mensahe sa “Pagtugyan sa Atong Kasingkasing ngadto sa Dios” (Liahona, Nob. 2015, 30–32). Mipiyong ko ug nag-ampo, “Pinalanggang Langitnong Amahan, unsay akong buhaton aron mahilayo ang akong pamilya gikan niining mga dautang mga butang?”
Ang tubag ingon ka paspas ug ingon ka dali nga daw naay tawo nga mibukas sa akong hunahuna ug mibutang sa ideya diha sa hunahuna. Ang ligdong, hinagawhaw nga tingog miaghat kanako, “Himoa lang unsa ang angay nimong buhaton. Pagmatinud-anon sa matag lakang.” Ang Espiritu mihunghong og pipila ka piho nga tambag, ug mibati ko nga kon ako mobuhat niadtong mga butang, ang tanan mamaayo ra.”
Mipahiyom ako ug gibati nga ang akong dughan napuno sa kadasig. Ang tanan nga mga kabalaka diha-diha dayon nakalimtan, tungod kay ako nasayud nga kini tinuod. Nabati na nako ang Espiritu Santo kaniadto, apan dili gayud sama kakusog nianang gabhiona. Nabati nako ang gugma sa atong Langitnong Amahan ug atong Manluluwas nga mipalibut kanako, ug ako nasayud nga ang kahupayan ug kaluwasan sa akong pamilya ingon ka importante alang Kanila sama nga kini importante alang kanako.
Isip dugang nga kasiguroan, usa ka istorya gikan sa mga kasulatan misantop sa akong panumduman—sa higayon nga ang Ginoo mimando kang Nephi sa paghimo og usa ka barko: “Ug nahinabo nga ang Ginoo namulong ngari kanako, nag-ingon: Ikaw maghimo og usa ka barko, subay sa paagi diin ako mopakita kanimo, nga ako unta modala sa imong mga katawhan tabok niini nga mga tubig” (1 Nephi 17:8; empasis gidugang).
Si Nephi ug ang iyang pamilya didto sa kamingawan sulod sa daghang katuigan, nag-antus sa tanang matang sa kalisdanan. Mahimong mibati siya og kahadlok sa pagsugod og usa ka panaw tabok sa dagat ug mitugot nga ang iyang kahadlok mahimong mas kusgan kay sa iyang hugot nga pagtuo. Apan wala siya motugot. Siya midawat ug misunod sa mga sugo sa Dios. Adunay siyay hugot nga pagtuo nga ang Iyang mga saad matuman. Ang Ginoo wala misulti ni Nephi nga ang mga unos dili mahitabo o ang mga balud dili mohapak sa barko. Apan Siya misulti kang Nephi nga kon siya mosunod sa Iyang mga direksyon, makahimo siya sa paggiya sa iyang pamilya nga makatabok sa kadagatan nga luwas paingon sa gisaad nga yuta.
Nakaamgo ko nga mibyahe usab ko ngadto sa kamingawan sulod sa daghang katuigan, apan karon ingon og nag-atubang na ko sa dagat, nag-andam alang sa usa ka bag-ong panaw: kaminyoon. Ako gitawag—ug tingali mao kana ang sitwasyon sa tanang mga pamilya sa mga Santos sa Ulahing mga adlaw—sa paghimo og usa ka barko sumala sa mga instruksyon sa Dios.
Sa dihang ang akong bana og ako nagminyo, miabut ang mga kalisud. Nasakit ko, ug nanglimbasug kami nga mabalanse ang among pinansyal nga mga kalihokan ug migamit sa tanang maayong kinaiya nga kami mihukom nga among sundon.
Apan ang tambag nga nadawat nako nianang gabhiona nagpabilin sa akong kasingkasing. Naningkamot kami kada adlaw sa pagkat-on ug gibahandi ang pulong sa Dios diha sa among mga kasingkasing, sa pagsunod sa maayong ehemplo sa among minahal nga mga lider—lakip si Jesukristo—ug sa pagpalambo sa among kaugalingong kinaiya. Nakabaton ko og mas lig-on nga pagpamatuod sa pag-ampo ug tinuoray nakatagamtam sa gugma sa Amahan alang kanamo. Nagsugod ko nga mas mosalig ug dili kaayo mahadlok. Nakaamgo kami nga ang mga kalisdanan nga among gisagubang nahimong mga lakang ngadto sa kalamboan. Karon ang among panimalay daw sama sa usa ka gamay nga piraso sa langit.
Anaa pa gihapon kami sa sinugdanan sa among panaw, apan ang pagminyo ug pagsugod og usa ka pamilya mao ang labing maayo nga pagpili nga akong nahimo. Akong kasingkasing napuno sa kalipay kon maghunahuna ko mahitungod sa mga ordinansa sa templo nga among nadawat ug nasayud nga kini nabugkos pinaagi sa awtoridad sa Dios. Kon magkadako ang akong pagsabut sa kaimportante sa pamilya diha sa plano sa Langitnong Amahan ug sa ka sagrado sa pakigsaad nga among gihimo, mas magkadako ang akong gusto sa pagtabang sa ubang mga pamilya nga makadawat sa samang ordinansa.
Akong nakat-unan nga dili kita angayang mabalaka mahitungod sa unsay mahitabo, tungod kay “kay kita wala sa Dios hatagig espiritu sa katalaw; kondili sa espiritu sa gahum, ug sa gugma ug sa pagpugong sa kaugalingon” (2 Timoteo 1:7). Kita nagkinahanglan lang nga magmasulundon, magsunod sa mga instruksyon nga gihatag diha sa mga kasulatan ug sa mga pulong sa modernong mga propeta, ug mangayo diha sa pag-ampo alang sa personal nga mga instruksyon. Kon atong buhaton kining mga butanga, makatabok kita sa dagat niining katapusan nga mga adlaw nga masaligon nga bisan unsa nga matang sa kasamok nga mohapak kanato, ang atong mga minahal mahimong luwas.