Mga Tingog sa mga Santos sa Ulahing mga Adlaw
Giluwas didto sa Lobby
Paghulagway pinaagi ni Allen Garns
Sa kasagaran motrabaho og Dominggo ang akong bana nga ako ra ang mahibilin nga moatiman sa among upat ka anak nga lalaki para sa Simbahan. Usa ka Dominggo niana atol sa sakrament miting, ang duha nako ka gagmayng anak wala magkasinabut. Kon ang usa nila interesado sa usa ka libro, ang iyang igsoon gusto usab niini. Gisulayan nako sa paghatag og snacks, mga dulaan, ug mga koloranan, apan wala magsilbi. Naglisud ko sa akong mga anak nga dili man lang sila mahimong maglingkod og hilum sa usa ka oras.
Gikuha nako ang gamayng dulaan sa akong bag ug gitunol ngadto sa akong anak nga nag-edad og usa ka tuig. Diha-diha dayon misinggit ang akong tres anyos nga anak nga si Tyson samtang gisumbag ang iyang manghud nga gustong mobawi sa dulaan. Naulaw ko samtang gidala nako sa lobby ang duha ka nagsininggitay nga gagmayng bata.
Napuno diha dayon sa init nga mga luha ang akong nawong. Nganong ingon man niini kalisud? Gibuhat nako ang gusto sa Langitnong Amahan nga akong buhaton pinaagi sa pagdala sa akong pamilya sa simbahan, di ba? Apan dili na nako kini mahimo. Makaluya ug makaulaw ang pagsagubang sa akong mga anak sa miting sa sakrament nga ako ra matag semana. Dili na gyud ko ganahang mobalik.
Naglingkod ko nga naghunahuna niini sulod lang sa 15 segundos, ug usa ka sister nga wala kaayo nako mailhi migawas sa lobby sunod nako. Ang iyang ngalan si Sister Beus. Sa kasagaran mag-inusara ra siyang maglingkod samtang ang iyang bana nagserbisyo sa bishopric ug ang iyang mga anak dagko na. Miingon siya, “Kanunay kang mag-inusara! Akong nakita nga naningkamot ka og maayo. Mahimo bang itapad nako si Tyson?” Wa koy mahunahunaan nga tubag! Mitando lang ko samtang gigunitan niya si Tyson ug gidala, karon kalma ug malipayon balik sa chapel.
Gipahiran nako ang akong luha, gikugos ang akong anak, ug mapaubsanong mibalik sa chapel aron tagamtamon ang kalinaw sa nahibiling oras sa miting.
Sa pagkasunod Dominggo samtang nagpaingon mi sa sakrament miting, si Tyson nangita sa bag-o niyang higala. Inig kagabii mag-ampo siya, “Salamat, Langitnong Amahan kang Sister Beus. Pinangga kaayo nako siya!”
Tulo ka tuig na, ug si Tyson sa gihapon kanunayng mangita ni Sister Beus sa chapel. Sa milabayng tuig gitawag siya nga Primary teacher ni Tyson. Siya ang pinakamalipayong bata karon.
Mapasalamaton kaayo ko kang Sister Beus ug sa iyang kaandam nga mohigugma ug moserbisyo sa uban. Nasayud ko nga mapanalanginan nato ang kinabuhi sa uban kon magserbisyo kita sama sa gibuhat sa Manluluwas.