Jodikdik ro

Keememej Irooj Aolep Raan

Ro m̧ōttad, m̧ōttan jerbal ko, homework, TV—ebooļ men ko me kajjitōk tok ippād n̄an kōm̧m̧ani. Bōtaab aolep wiik, jej kallim̧uri Jemedwōj Ilan̄ “bwe [jen] keememej iien otemjej [Nejin, Jisōs Kraist]” (K&B 20:79).

Būreejtōn Eyring ej ba bwe jen maron̄ “kōm̧m̧an kālet ko aolep raan” me renaaj jipan̄ kōj keememej Rilo̧mo̧o̧r eo. Ļōmņak im kōm̧m̧ane juon kōttōbar allōn̄ in bwe en ļapļo̧k ad keememej Rilo̧mo̧o̧r eo kajjojo raan. Komaron̄ kōm̧m̧ane juon kōļanta im kallim̧ur n̄an kōm̧m̧ane juon men juon raan. Būreejtōn Eyring ej kōllaajrak men kein āinwōt riiti jeje ko rekwojarjar, jar ilo tōmak, im jerbal n̄an Rilo̧mo̧o̧r eo im ro jet. Ebarāinwōt wōr jōnōļ, etal n̄an kweilo̧k ko an Kabun̄ in, ron̄jake kweilo̧k ko reļļap, etal n̄an tampeļ eo, al al ko—laajrak eo emaron̄ etal wōt! Ilo ad keememej Rilo̧mo̧o̧r eo raan otemjeļo̧k, Būreejtōn Eyring ej kallim̧ur “bwe kōjeraam̧m̧an ko … [im] renaaj itok jidik kōn jidik im emakijkij … [im] naaj kōkōm̧anm̧anļo̧k kōj n̄an erom̧ rikaļoor ro rem̧ool an Irooj Jisōs Kraist.”