Kōkajoorļo̧k Pejnej in Rice Cake eo aō
Lordita Yagomyom
Misamis Occidental, Philippines
Kōmeļeļe jān Carolyn Vibbert
Ikar kōņaan jilkinļo̧k ļaddik eo nejū n̄an mijen, ak ilo aō wia kake juon kilo (2 lbs.) in bibingka (rice cakes) ) juon wiik ekar jabwe n̄an maron̄ jipan̄ e ilo mijen.
Ļaddik eo nejū eaar jipan̄ baam̧le e ikkijeen jāān kōnke ekar lukkuun inepata kōn jekjek eo kōm kar pād ie ikkijeen jāān bwe en jab inepata ilo an em̧m̧akūt. Ekar juon apan̄ eo eto kitien ilo baam̧le eo am̧ n̄an kakkoņ jāān. Ekar utiej buruō kōn ļaddik eo nejū 25 an iiō kōn ikdeleel in an ejim̧we n̄an jerbal n̄an Irooj, ak ikar kile bwe kōm̧in kar aikuj juon kain menin kabwilōn̄lōn̄ n̄an kōm̧m̧an bwe kōttōpar in an en kūrm̧ool bwen etal im mijen.
Ikar kobaļo̧k ilo juon kurup in un̄n̄are peid make. Kōn aō niknik im aō kōjerbal tōmak eo aō, ikar jeļā bwe baam̧le eo aō enaaj kar jeraam̧m̧an. Ilo juon iien kweilo̧k, ikar en̄jake im̧we n̄an etal n̄an juon jikin wia an aolep. Ijo, iaar lo elōn̄ kōrā ro rej wia kake kōmaulaļ ko me raar make kōm̧m̧ani. Ikar kōm̧m̧an juon koņ ippān juon kōrā. Ikar ba n̄an e ke inej likūt m̧weiūk ko aō ilo jibbon̄ōn eo ippān bwe en wia kaki im aini tōprak ko ilo jem̧ļo̧kin juon raan. Kōttōpar in eaar em̧m̧an n̄an kōm̧ro jim̧or. Ikar tokālik lo bwe elōn̄ ļo̧k riwia ro. Pejnej eo aō ekar kajoorļo̧k n̄an 10 riwia kake ro ke ij kobaļo̧k ilo kurup in un̄n̄are peid make.
Ikar ekkatak n̄an kōjeņoļo̧k jāān ko aō make jān jāān in pejnej eo aō im kōļļaiki eō make. Ikar ekkatak bwe in jab joļo̧k iien ko aō n̄an kōm̧m̧an m̧weiūk ko me ejjab ļap wiaiki ak in ļōmņak wōt kōn ta eo eļap tōpraki er. Ikar barāinwōt ekkatak kōn kilen wia kake ilo iaļan bōk meļeļe imejatoto. Paatnōr eo aō ilo kurup eo an un̄n̄are peid make ekar jipan̄ eō ejaake juon aō akkaun ilo Facebook. Jān ijo, kōm kar ekkatak kōn kilen jeje im etteet ilo paak. Pejnej eo aō ekar kajoorļo̧k n̄an tōre eo me ļeo pāleeō ekar maron̄ bōjrak jān jerbal eo an im jino jerbal ippa.
Juon armej ekar ba n̄an eō kōn tōprak in kein wia ko aō. Ikar ba n̄an e ilo aō m̧ōņōņō ke ij kiiō wia kake 12 kilo (26 baun) in rice cake.
“12 kilo juon wiik em̧m̧an!” ekar ba.
“Ejjab, būratōr,” ikar ba. “Ij wia kake 12 kilo kajjojo raan.”
Ļaddik eo nejū ekar ba n̄an eō tokālik ke ej m̧ōņōņō bwe pejnej eo aō emaron̄ kar kiiō kake aikuj ko am.
“Āinwōt imaron̄ kiiō etal im mijen,” ekar ba.
Ej kiiō mijen ilo Philippines San Pablo Mission. Eļap aō kam̧m̧oolol kōn ijjino in kōn un̄n̄are peid make. Irooj ej lukkuun m̧ool ilo An ba, “Ej Aō kōttōpar n̄an ņa an ro rekwōjarjar Aō” (K&K 104:15).