Jipan̄, Juon Pinjeļ ilo juon Iien
Eaar ijjino ke stake eo aō eaar kōm̧m̧ane juon būroojāāk n̄an jipan̄ riatajinemjen ro. Iaar lukkuun in kōņaan būroojāāk eo, kōn menin iaar kajjitōk ippān jinō n̄an jiron̄ rūkaki in jikuuļ eo aō kake, im rūkaki eo eaar kōņaan kōm̧m̧ane juon men ippān kūlaaj emān. N̄an ejake juon waanjon̄ak n̄an būroojāāk eo, leddik eo jeiū, Maddie, im n̄a kar etal jān kōjām n̄an kōjām kajjitōk kōn menin jipan̄.
Raan eo eaar itok n̄an am kwaļo̧k būroojāāk eo n̄an aolepān kūlaaj emān. Eaar bwe aō ikūm̧kūm̧. Ilo m̧ool, iaar lukkuun in lōļn̄o̧n̄, bōtaab iaar kōm̧m̧ane ijo em̧m̧an tata ippa. Iaar jiron̄ aolep kūlaaj emān ro jet ta eo jaar aikuji n̄an kein jikuuļ ko n̄an riatajinemjen ro. Iaar ba kōn ekōjkan am kar etal jān kōjām n̄an kōjām, im iaar leļo̧k n̄an er juon idajon̄jon̄ n̄an kajjieon̄ kōm̧m̧ane em̧m̧anļo̧k jān aō kar kappok jāān. Ippān doon kōm kar kōm̧m̧ane eļapļo̧k jān 100 kein jikuuļ ko! Kōm kar edoor bok ko, pinjeļ ko, im kein jikuuļ ko jet. Barāinwōt kōm kar jeje ba, “Ruwainene tok n̄an Germany.”
Jinō im n̄a kar bōk kein jikuuļ ko n̄an jikin kōppād eo an riatajinemjen ro. Ijjab maron̄ ba jikin kōppād e eaar em̧m̧an, bōtaab eaar wōr juon jikin ikkure im juon eria n̄an katak kōn jikuuļ. Eaar wōr juon tūrein iturin jikin kōppād eo me eaar lukkuun in ļap ainikien, im ajri ro raar jiron̄ eō eaar āinwōt ainikien baļuun ko rej ekkāke ilo Syria im jikin ko jet āinļo̧k wōt. Bōlen eaar āinwōt ainikien baam̧ ko n̄an ajri ro me raar ron̄ ilo laļ ko aer make.
Iaar ioon jet iaan ajri ro ilo jikin kōppād eo detta wōt, ekoba Daniel, juon rikkure chess ejeļā. Iaar jab maron̄ ikkure chess ņae e, eo eaar kanooj in nana kōnke ij iakwe chess, bōtaab raar karuwaineneik eō n̄an ikkure foosball im ping-pong. Ļaddik ro raar jiron̄ eō bwe raar oon̄ kōn kapijuknen ko aer im raar kōņaan etal jān jikin kōppād eo im bar etal n̄an jikuuļ.
Ālkin am kar ikkure foosball im ping-pong, kōm kar leļo̧k kein jikuuļ ko. Eaar em̧m̧an aō en̄jake bwe imaron̄ kar kōm̧m̧ane juon men ejouj n̄an ajri ro me raar jokwe ilo jikin kōppād ko.