Juon uwaak eo eim̧we ilo juon iien intōrpiu n̄an jerbal

Gibrair Padilha Dos Santos

São Paulo, Brazil

Ālkin kar kappeik eō n̄an tōl juon kammiti in un̄n̄are peid make, iaar kile bwe iaar jab kōm̧m̧ane ta ko imaron̄ kar kōm̧m̧ani āinwōt juon rijerbal. Kōn jeļā in, iaar ikdeleel eļap kōn jerbal eo aō me itijem̧ļo̧k kake.

Iaar en̄jake juon ikdeleel ekāāl n̄an pukōt juon jerbal em̧m̧anļo̧k im ikar kajjitōk jipan̄ n̄an je juon resume ewājepdik. Ikar jilkinļo̧k resume eo aō ekāāl n̄an jet iaan pejnej ko im ejjab to rekar kūr eō n̄an intōrpiu.

Juon iaer, riintōrpiu eo ekar riit tok jān resume eo aō me ej kwaļo̧k kōn jerbal eo aō āinwōt juon rikakpilōklōk ilo stake būreejtōnji im ekar kajjitōk, “Komaron̄ ke ba n̄an eō ilowaan ļalem minit ta meļeļein jerbal in ilo kabun̄ in?”

Ikar ba bwe ikar pād ilo juon doulul in tōl eo ej eddoik wāween tōl im jipan̄ elōn̄ļo̧k jān 2,500 armej ro. Riintōrpiu eo ekar jino itok limoin im ekar kajjitōk, “Ewōr juon am minit n̄an kālet wāween am kwaļo̧k uwaak eo ilowaan ļalem jeken n̄an uwaake kajjitōk in: ewi wāween am tōl armej rein 2,500?

Ikar jeļā bwe menin in enaaj kar juon iien eļap im aorōk ilo iien intōrpiu eo. Ikar jar im kajjitōk jipan̄ ippān Jema Ilan̄ im ekar m̧ōkaj aō keememej katak ko iaar ekkatak kaki ilo kurup eo an un̄n̄are peid make. Ikar en̄jake juon lōke n̄an kwaļo̧k aolep kain.

Ālkin juon minit, riintōrpiu eo ekar kajjitōk, “Ewi wāween am̧ tōl armej rein 2,500?

“Kōmij jipan̄ er ejaaki kōtōpar ko,” iaar uwaak.

Riintōrpiu eo ekar jutak, idik peiū, im ekar ba, “Em̧ōj am̧ hire.”

Ekabwilōn̄lōn̄ wāween an Anij jibwe peiū im uwaake jar eo aō. Eļap aō kam̧m̧oolol aō Rilo̧mo̧o̧r kōn an im̧we ritōl ro ad n̄an ejaake ijjino in n̄an un̄n̄are peid make. Em̧ōj aō lukkuun jeraam̧m̧an kōn menin, im iaar lo bwe ijjino in eļam̧waan im eim̧we n̄an un̄n̄are peid make eo ej kōjeraam̧m̧an elōn̄ ro jet ilo stake in ad. Em̧ōj aō kam̧oole tōprak eo kōn katak ko an un̄n̄are peid make n̄an jipan̄ mour an ro jet ke ikar erom̧ juon ritōl n̄an 15 rijerbal ilo jerbal eo aō ekāāl, ikar jino katakin er katak ko an un̄n̄are peid make.

Em̧ōj aō eddōkļo̧k im eļapļo̧k aō maron̄ kōm̧m̧ani jerbal ko jān jon̄ak eo ikar ļōmņake. Ij kiiō bōk wōņāeō eo me emaron̄ kake aikuj ko aō im baam̧le eo aō. Ijjino in ej jipan̄ kōj eddōkļo̧k kajjojo raan ilo an jipan̄ kōj pukōt em̧m̧anļo̧k eo an un̄n̄are peid make.