Jej Kōnono kōn Kraist
Kwōjjab Rum̧wij n̄an Am̧ Bar Bōk juon Iien Em̧m̧an
Rijeje eo ej jokwe ilo Virginia, USA.
Jemān juon iaan rijikuuļ ro aō ejjab em̧m̧an an katak ekar jiron̄ ļo̧k leddik eo nejin, “Ej wōr wōt am̧ iien bwe kwōn tōprak.” Irooj ej letok n̄an kōj ejja ennaan in wōt.
Kōmeļeļe jān Kelley McMorris
Sandra ekar rijikuuļ eo ilo kūlaaj in English eo aō. Jet wiik innām ejem̧ļo̧k iiō eo, leddik eo ejjan̄in kōm̧m̧an an homework ak būrojāāk. Ej baj jijet ilo tebōļ eo an im ettōņak. Ej kōm̧m̧an jekpen ņae ko kōn an jan̄in kadedeļo̧k katak ko an, im ej jab kwaļo̧k juon m̧wil ak jerbal eo emennin aikuj n̄an tōprak ilo juon kooj aikuj bōke.
Rikakpilōklōk eo an im n̄a kar pepe n̄an jikejuuļi juon kweilo̧k ippān Sandra, jemān, im jet iaan rūkaki ro an n̄an ļame iaļ rot eo ej aikuj bōke: ej ke aikuj joļo̧k kooj ko an im bōk wōt kooj ko ekkā an rijikuuļ būki? Men eo em̧m̧antata kōm aolep kar ļōmņake: am maron̄ pukōt juon wāween n̄an jipan̄ Sandra tōprak?
Tōmak bwe Sandra ekar bōk elōn̄ iien ko rem̧m̧an n̄an an tōprak ak ekar kālet bwe en jab tōprak, ikar etal n̄an kweilo̧k eo lukkuun in inepata. Ikar kōjatdikdik bwe enaaj ļōmņak in joļo̧k kūlaaj eo aō bwe in jab aikuj in bar inepata kake e. Ikar en̄jake bwe aolep men ikar maron̄ kōm̧m̧ani im bwe em̧ōj an rum̧wij.
Ilo kweilo̧k eo, paaktok in an Sandra m̧akūtkūt ekar kwaļo̧k bwe e ekar barāinwōt pere maron̄ eo ippān n̄an an tōprak. Ekar kalimjōk tebōļ eo ke iaar keememej an kar likjab ilo kūlaaj in English eo. Āinwōt an rūkaki in history eo an kapen e bwe Sandra ekar likjab ilo kūlaaj eo an barāinwōt, ānbwinnin ekar nokjek laļļo̧k ilo jea eo an im ikar maron̄ lo an to̧o̧r dān in mejān iturin mejān.
Tūriam̧o̧ im jipan̄, ikar kōmeļeļeiki n̄an e im jemān bwe eļan̄n̄e Sandra ekōņaan in tōprak ilo kooj kein reppen, enej aikuj in ukōt m̧wil eo m̧wilin eo me ekar kōm̧m̧an bwe en pād ilo wāween in epen im bwe enaaj lukkuun in pen.
Juon Ennaan jān Jemān
Rikakpilōklōk eo ekar oktakļo̧k n̄an jemān Sandra, juon em̧m̧aan eo ejabwe jeļāļo̧kjeņ ippān āinwōt ejjab koņ ilo wāween karōk ko an jikuuļ. Rikakpilōklōk eo ekar kajjitōk ippān eļan̄n̄e ewōr jabdewōt an kajjitōk n̄an rūkaki ro. Ekar ba bwe ejjeļo̧k an kajjitōk im ekar kam̧m̧oolol kōm kōn ta eo kōm kar kōm̧m̧ane n̄an Sandra. Bōtaab innām ekar ba bwe ewōr juon men ekōņaan ba n̄an leddik eo nejin.
Būruwō eaar pen im kijn̄en̄e. Ikar pād im m̧ōttan kweilo̧k ko an ro jinen im jemān rijikuuļ ro im rūkaki ro me ro jinen im jemān rijikuuļ ro rekar kwaļo̧k naan in kōnanaik ajri ro nejier im̧aan mejān rūkaki ro im rikakpilōklōk ro, kajook er kōn aer jowan, ej jakoko, im ejjeļo̧k aer ikdeelel. Ikar lukkuun kōpooj eō n̄an aō bar ron̄jake.
Ta eo ikar ron̄ ekar kaļokjen aō. Jemān Sandra eo ettā būruwōn ekar oktakļo̧k n̄an leddik eo nejin 16 an iiō eo ekar lukkuun jook im ajļo̧k im ba n̄an e, “Ej wōr wōt iien kwōj jan̄in rum̧wij. Ej wōr wōt am̧ iien kwōj jan̄in rum̧wij bwe kwōn tōprak. Ej wōr wōt am̧ iien.”
Ikar etal jān kweilo̧k eo kam̧m̧oolol kōn m̧wilin im iakwe eo an ak ikar inepata bwe ejjeļo̧k an meļeļe kōn ta eo leddik eo nejin enaaj kōm̧m̧ane bwe en ļe jān jekjek in. Āinwōt ekar lukkuun in pen. Naan eo ekar itok n̄an n̄a bwe leddik eo ekar joļo̧k kūlaaj in history eo bōtaab ekar bōk wōt kūlaaj in English eo Aō.
Tokālik raan eo ke ikar būkwelōlō ilo jar, ļōmņak kōn likjab ko aō make im kajjitōk ippān Jemedwōj Ilan̄ kōn jeorļo̧k bōd, ikar kile ewi jon̄an aō kar ekkatak jān jemān Sandra. Jakoņ im en̄jake aō likjab elōn̄ iien ilo mour eo aō make ekar kōm̧m̧an bwe in ļōmņak eļan̄n̄e ikar erreo ak aikuj bar bōk juon iien em̧m̧an. Ilo iien rot kein, Irooj, āinwōt jemān Sandra, ekar jab kālet n̄an kajook eō ak ekar kaenōm̧m̧an eō bwe in jab inepata: “Kwōj jan̄in rum̧wij, leddik en nejū. Kwōj jan̄in rum̧wij.”
Ennaan eo an Gospel in
Ewi emakijkij in ad tōmak ennaan eo an rikōjdat eo me jetoļo̧k ilo kōjatdikdik kake? Ak rikanaan ro rej jiron̄ tok kōj. Aiseia ej kwaļo̧k, “Innām en jepļaak n̄an ippān Jeova, im Enaaj tūriam̧o kake e, im n̄an ippān adwōj Anij, bwe enaaj kanooj wūjlep in joļo̧k bōd ko an” (Aiseia 55:7). Mormon ekar kobaiktok naan in kam̧ool in an, “A jon̄an emmakijkij in aer ukweļo̧k im kappukot jeorļo̧k bōd, kōn jibadbad em̧ool, kar jeorļo̧k aer bōd” (Moronai 6:8). Lan̄lōn̄ eo an gospel eo ej bwe ej jan̄in rum̧wij. Bwe āinwōt emakijkij in ad pukot jeorļo̧k bōd, lo̧mo̧o̧r an Irooj enaaj kōtļo̧k bwe jān bar kāāl.
Sandra, kōn juon ikdeelel ippān ekar bar jinoe, ekar rum̧ij ak eļap oktak ko. Oktak eo ekar jab pidodo—ekar aikuji kijejeto eo aolep raan n̄an anjo̧ ioon imenene ko an renana—bōtaab eaar lo jinekjej ko an kijejeto ko an ilo an kūreet eo an jidik kōn jidik em̧m̧anļo̧k.
Jān juon jibadbad an gospel eo, kūreet eo ad āliktata eban pād ilo jeje ewi aetokan ad kar wōtlo̧k ak ewi m̧wilaļ in ad kar wōtlo̧k jekar kūbwij kōj make ilo juon ron̄. Ijjelo̧kin, Irooj enaaj ekajete mour ko ad pedped wōt ioon ia eo jej jibadōkļo̧k, ewi wāween ad kar ukweļo̧k, im ewi jon̄an ad kar pedped ioon Pinmuur eo an Irooj.
Ilo an likjab jeļāļo̧kjeņ eo aō, ikar pere maron̄ eo an Sandra n̄an anjo̧ jān bōd ko ekar kōm̧m̧ani m̧oktaļo̧k. Ilo keidi, Jemād eo ewāppen ej jāmin jako an kōjatdikdik kōn maron̄ eo an ajri ro nejin n̄an bōk lo̧mo̧o̧r itok wōt jān ad wāppen ilo Kraist. Ejjab aorōk ewi tokran ijo jaar etal n̄an e; iien otemjej Enaaj pukōt eo ejako. Irooj ej rōjan̄ kōj bwe jen jab bar rito itak ak riwamaijet ilo jerawiwi ak ijjelo̧kin pukōt E ilo kōjatdikdik im lan̄lōn̄ kōn kōjeraam̧m̧an ko an Pinmuur eo An Eļap. Ilo m̧ool, ej jāmin rum̧wij.