Uwaak ko jān Ritōl ro an Kabun̄ in
Elmen Am̧ Make Jeļā
Ilo Maaj 2017 juon iien Jeļm̧ae Būreejtōn Henry B. Eyring im Elder Jeffrey R. Holland.
Ro m̧ōttam̧ jitōn bōro, kōņaan eo am̧ n̄an kom̧ kajjojo ej bwe kom̧win make jeļā, eddo eo an ro jet, bwe Anij in lan̄ em̧ool, bwe Ejeļā kom̧, im bwe Nejin eaar pinmuur kōn jerawiwi ko an laļ.
Ad kōjatdikdik ej bwe kom̧ naaj make bōk juon naan in kam̧ool bwe gospel eo an Jisōs Kraist em̧ōj an bar jepļaaktok n̄an laļ in ilo tōre kein āliktata. Mijen eo an Josep Smith eaar jejjet, aaet jar eo an ettā ej juon jinekjej in jipan̄ n̄an kwe im n̄a. Josep eaar etal n̄an wōjke eo im jar kōn tōmak bwe Anij en maron̄ uwaake jar eo an im joļo̧k an pok. Eaar bōk kam̧ool ilo an riiti naan in Anij im kar bōk juon kam̧ool bwe ekar m̧ool. Josep eaar barāinwōt jar kōn bōro em̧ool ejjab n̄an ron̄jake wōt ak n̄an pokake ilo jabdewōt wāween. Eaar kallim̧ur n̄an jerbale jabdewōt ta eo Anij enaaj ba n̄an e.
Ilo jetōb in, ij kōņaan lewaj juon idajon̄jon̄ n̄an jodikdik ro an Kabun̄ in. En̄in ej idajon̄jon̄ eo: kwōn make jeļā bwe men kein rej m̧ool. Kom̧ maron̄ kōm̧m̧ane ilo ami ļoor waanjon̄ok eo an Josep Smith: ekkatak jeje ko rekwojarjar, kōm̧m̧an bwe naan ko ren tōt ilo tum̧wilaļin buruwōm̧, kejōkļo̧kjeņ kaki im bar kejōkļo̧kjeņ kaki, innām kajjitōk ippān Anij, kōn juon kōņaan n̄an bōk An tōl—em̧ool, en An kilaan.
Idajon̄jon̄ in emaron̄ in juon kūr epidodo, ij kallim̧uri kom̧ enaaj bōk iien. Ijjamin kallim̧ur bwe uwaak ko ami naaj itok ilo juon raan ak ilo juon wiik, ak imaron̄ in kallim̧ur bwe Anij enaaj kōnono n̄an kom̧ ilo tōre eo An make im iien eo An make, eļan̄n̄e kom̧ naaj kajjitōk ilo tōmak. Ilo am̧ bōke im jerbale kūr in, kom̧ naaj loe bwe uwaak ko rejjab itok wōt, ak kom̧ naaj barāinwōt ejaake juon jon̄ak ekkar kōn jetōb in jeļā bwe naaj kōjeraam̧m̧an kom̧ ilo aolepān mour ko ami.