Sarah im MRI eo
Rijeje eo ej jokwe ilo Colorado, USA.
Bōlen Jetōb Kwojarjar eo emaron̄ jipan̄ Sarah jab en̄jake eļap leļn̄o̧n̄.
“Ke Kraist eaar pād ioon laļ in, Eaar kallim̧ur enaaj kar jilkintok Jetōb Kwojarjar eo n̄an kaenōm̧m̧an kōj, eo jerad em̧ool, indeeo” (Children’s Songbook, 105).
“Eaar āinwōt alikkar Sarah enaaj aikuj in MRI kōn ilikin,” Dr. Frank eaar ba. Eaar ettōn̄ n̄an Sarah. “Inaaj jikejuuļi juon n̄an ilju. Inaaj bar ro̧o̧l tok ium̧win jet minit ko.”
Itulikin Sarah ekar metak ium̧win jidik iien. Ke eaar rujļo̧k ilo jibbon̄ōn eo, eaar kanooj metak jon̄an eaar pen n̄an an jutak kankan lōn̄ļo̧k, im ebaj n̄ak wōt kar etetal. Sarah im jinen raar itok n̄an lo Dr. Frank n̄an lale ta kar jorrāān eo.
“Bar juon MRI?” Sarah eaar kajjitōk, reilōn̄ļo̧k n̄an jinen. Liin eaar bar MRI juon kōttan m̧oktaļo̧k. Liin eaar keememej ewi jon̄an kar mijak eo eaar en̄jake ilo tube eo eļap me kar bōk pija ko an itulowaan ānbwiinin.
“Joļo̧k aō bōd, Sarah,” Jinen eaar ba. “Bōtaab pijak ko renaaj jipan̄ Dr. Frank katak ta jorrāān eo an diim̧. Ijeļā komaron̄ kōm̧m̧ane menin. Im inaaj pād ijo ippam̧.” Eo jinen eaar kuul pein Sarah.
“Bōtaab koban maron̄ deļōn̄ tok ippa,” Sarah eaar ba. Bōran eaar jillo̧k, im kōmjaaļaļ eaar wōtlo̧k laļļo̧k ilo jāpān. Eo jinen emaron̄ kar pād ippān ilowaan ruum̧ eo, bōtaab ke Sarah eaar deļōn̄ļo̧k ilo lowaan machine eo, liin enaaj kar makeļo̧k.
Pein jinen ej jepooļ Sarah. “Men jab in em̧ool, bōtaab kwojeļā wōn eo emaron̄ in pād ijo n̄an kaenōm̧m̧an eok?”
Sarah eaar keememej juon āt liin eaar ron̄ n̄an Jetōb Kwojarjar eo: Rikaenōm̧m̧an. Bōlen Jetōb Kwojarjar eo emaron̄ kar jipan̄ liin jab en̄jake lōļn̄o̧n̄.
“Jetōb Kwojarjar eo?” Sarah eaar kajjitōk.
Eo jinen eaar em̧ajidjid. “Ejim̧we. Komaron̄ jar kōn Jetōb Kwojarjar eo n̄an jipan̄ eok. Baba im n̄a naaj jar kōn eok barāinwōt.”
Menin eaar leļo̧k juon ļōmņak em̧m̧an n̄an Sarah. “Imaron̄ kajjitōk ippān baba kōn juon kōjeraam̧m̧an?”
Eo jinen eaar ettōn̄. “Aaet. Ijeļā enaaj kar kōņaan kōm̧m̧ane.”
Bon̄ōn eo jemen eaar likūt pein ioon bōran Sarah im kar leļo̧k n̄an e juon kōjeraam̧m̧an an priesthood. Ke eaar kōjeraam̧m̧an Sarah bwe en kaenōm̧m̧an jān Jetōb Kwojarjar eo, juon okmāāņāņ emera ekar kaobrak ānbwiinin. En̄jake eo eaar pād wōt ippān aolepān bon̄ōn eo.
Raan eo tok juon Sarah ej babu ioon jea eo me kar kadeļōn̄ļo̧k n̄an lowaan tube eo eļap ilo MRI machine eo. Liin eaar āliji ilo bōran naan ko Jemen eaar kōjerbali ilo iien kōjeram̧m̧an eo an: Jetōb Kwojarjar eo enaaj pād ijo n̄an kaenōm̧m̧an eok. Sarah eaar kanooj kuul pein Jinen. Innām nōōj eo eaar kadeļōn̄ļo̧k e ilo tube eo.
MRI machine eo eaar kōm̧m̧ani ainikien ko rōkōjak ilo an kar bōk pija ko an diin. Sarah eaar aikuj babu jab m̧akūtkūt n̄an jidik bwe pija ko ren jab tab. Liin eaar kor ium̧in juon minit, bōtaab liin eaar en̄jake bar en̄jake eo emeņeņ. Eaar āinwōt juon iaan atbakwōj ko an eo Jinen. Ak juon ko̧o̧j eo emeņeņ. Liin eaar jeļā bwe aolep men renaaj kar EMMAN. M̧okta jān an kar jeļā, MRI eo eaar dedeļo̧k!
Ilo opiij eo an Dr. Frank, eaar kwaļo̧k n̄an Sarah im eo Jinen pija ko an diin Sarah. “Ekanooj kar em̧m̧an am̧ kōm̧m̧ane babu jab m̧akūtkūt,” Dr. Frank eaar jiron̄ Sarah ke eaar bukwelōlō iturjete in. “Pija kein an diin rej kwaļo̧k bwe kwonaaj aikuj in m̧wijm̧wij n̄an jipan̄ bwe en em̧m̧anļo̧k am̧ etetal.”
Sarah eaar oran̄lo̧k.
“Jekōņaan kōm̧m̧ane m̧wijm̧wij eo ejjab etto,” Dr. Frank eaar ba, reilōn̄ļo̧k n̄an jinen Sarah. Innām bar oktakļo̧k n̄an Sarah. “Emaron̄ bōk jet wiik ko ālkin n̄an am̧ en̄jake āinwōt kar kwe eo m̧okta bar juon alen, bōtaab ālkin aō lo eok rainin, ijeļā enaaj em̧m̧an am̧ kōm̧m̧ane.”
Sarah eaar kajjieon̄ ļōmņak kōn aolep men ko eaar kōm̧m̧ani ālkin an Dr. Frank kōm̧m̧ane diin. Inaaj maron̄ in ettōr im aaō im kelo̧k n̄an bulōn juon ejouj ekilep in bōlōk ko. Liin eaar miji kōm̧m̧ani aolep men ko. Bōtaab m̧wijm̧wij eo eaar em̧ool kamijakļo̧k jān juon MRI! Innām Sarah eaar keememej jar ko an im kōjeraam̧m̧an eo an ejeno̧lo̧k. Jemedwōj Ilan̄ eaar jilkinļo̧k n̄an e Rikaenōm̧m̧an eo. Enaaj kar bar jipan̄ e.
Liin eaar reilo̧k n̄an Dr. Frank. “Innām imaron̄ kelo̧k n̄an bulōn juon ejouj ekilep in bōlōk ko?” liin eaar kajjitōk.
Leo eaar ūjō. “Innām komaron̄ kelo̧k n̄an bulōn juon ejouj ekilep in bōlōk ko.”