Jirōk Likattōtōt
Rijeje eo ej jokwe ilo Utah, USA.
Ro m̧ōttad rej kōm̧m̧an juon oktak eļap ilo wāween eo em̧m̧an—ak nana—n̄an mour kōn jon̄ok ko ad.
Iaar rūttoļo̧k ippān ro m̧ōtta ro raar membōr in Kabun̄ in, im iaar jino itok lim̧oū n̄an peptaij im erom juon membōr. Ke iaar etal jen jikin n̄an jikin n̄an kaļōj, iaar jino būki katak ko ippān mijinede ro. Ejerata, kareel ko jān ro m̧ōtta rekōm̧m̧an bwe en pen n̄an ļoor jon̄ok ko. Ro m̧ōtta ilo kūlaaj ratimjuon eļap aer joļo̧k aer iien ilo bade ko im idaak dānin kadōk. Ijjan̄in kar idaak dānin kadōk m̧okta, ak ro m̧ōtta ekkā aer kapoik eō bwe in idaak.
Iaar jeļā bwe gospel in ekar m̧ool, ak kapo jān ro m̧ōtta eaar pen n̄an ba jaab.
Iaar jino in jar n̄an Jemedwōj Ilan̄ kōn kajoor n̄an kōm̧m̧an kālet jim̧we. Iaar jab lelaļ ļo̧k jon̄ok ko aō, ak iaar mijak bwe ejjeļo̧k aō kajoor n̄an jab bōk dānin kadōk n̄e renaaj bar letok. Iaar miji ro m̧ōtta ro rekar kwaļo̧k ejja jon̄ok ko wōt.
Juon joteen Jādede eo iaar ilo̧k n̄an juon bade ippān armej ro ilo toom̧ eo aō. Em̧ōkaj an aolep ro m̧ōtta kar kadōk im kar ba bwe in nemak jidik dānin kadōk.
Kar kapoik eō. Iaar jibwe kap in piia eo kar letok n̄an eō. Iaar kepaaktok lon̄iiū, ilo inepata ak n̄an kam̧ōņōņōik ro m̧ōtta. Innām Nick, juon eo ekadōkdōk, eaar itok n̄an doulul eo amim.
“Koban idake, kwōj ke?” eaar ba.
Iaar ba,“Ijjan̄in de.”
Nick eaar ba, “Eļan̄n̄e kwōnaaj,” “kwōnaaj bōke ilo aolepān mour eo am̧.”
Iaar ilbōk. Iaar jeļā bwe eaar jim̧we. Iaar jab kōņaan idaak. Iaar kōņaaan pād ilo Kabun̄ in. Iaar bar kōro̧o̧l kap eo im etal jān bade eo, m̧ōņōņō bwe iaar jab kōm̧m̧ane kālet eo ebōd.
Raan eo juon iaar etal n̄an m̧ōn jar eo, bar ioon mijinede ro, im kar karōk juon iien n̄an peptaij eo aō. Jān raan eo iaar pād ettoļo̧k jān bade ko ewōr dānin kadōk ie. Iaar m̧ōttāik ro ilo m̧ōnjar eo ro raar kwaļo̧k jon̄ak ko aer. Iaar m̧ōttāik wōt armej ro ilo toom̧ eo aō, ak iaar kalikar jon̄ak ko aō. Ke raar jeļā ewi jon̄an aorōk in jon̄ak ko n̄an eō, raar kautiej im kar bōjrak aer kapoik eō. Raar jeļā im kar kauteij n̄e ij etal jen ruum̧ eo n̄e rej alooj pija ko renana ak ron̄jake al ko renana.
Naan in kam̧ool eo aō ekar kōkajoor ļo̧k jen en̄jake in, im inaaj kajjieon̄ in jab lelaļ ļo̧k jon̄ak ko aō kōn wōt ro m̧ōtta. Ij barāinwōt jeļā bwe wāween eo em̧m̧antata n̄an jelm̧ae kālet ko reppen ej n̄an jeļā jon̄ak ko am̧ im jirōk likattōttōt kaki jān jinoin.
Ijeļā bwe Jemedwōj Ilan̄ eaar uwaaki jar ko aō kōn kajoor n̄an anjo̧ jān kapo. Ij m̧ōņōņō bwe Jetōb Kwojarjar ekar kōkajoor eō n̄an kōm̧m̧an kālet jim̧we. Ijeļā bwe jon̄ok ko an Kabun̄ in rej n̄an kōjparok kōj, im ij m̧ōņōņō bwe kālet n̄an ļoori rekar jipan̄ eō kālet n̄an kobatok ilo Kabun̄ in.