Pukōt Jipan̄ ālkin Mej eo an Nancy
Rijeje eo ej jokwe ilo Georgia, USA.
Ta eo ij aikuj kar kōm̧m̧ane bwe in jino kōjerbal kajoor in kōmour eo an Jisōs Kraist ilo mour eo aō?
Kōmeļeļe ko jān Iker Ayerstaran
Ilo Pāpode 2016, kōrā eo pāleeō Nancy ekar jako ālkin 11 iiō in an en̄taan kōn kāānjer ilo ittin. Būrom̧ōj in eļap ikar en̄jake ilo allōn̄ ko jinoin ālkin an kar mej epen kōmeļeļeik n̄an juon eo ejjan̄in kar ioon jekjek rot in. Būrom̧ōj, liajļōļ, inepata, metak—ejjeļo̧k iaan naan kein remaron̄ kōmeļeļeik jon̄an en̄jake eo. Kar jab maron̄ jelm̧aeiki.
Kajoor in Kōmour eo an Rilo̧mo̧o̧r
Ilukkuun jeļā bwe Jisōs Kraist “Eaar wōnlaļtak iumin aolep men ko otemjeļo̧k” (K&B 88:6) bwe En maron̄ “jipan̄ [deor ak jipan̄] armej ro An ekkar n̄an m̧ōjņo̧ ko aer” (Alma 7:12). Meļeļe in bwe kajoor in Pinmuur eo an Rilo̧mo̧o̧r eļapļo̧k jān an baj letok n̄an kōj Jerkakpeje im lo̧mo̧o̧ren kōj jān jerawiwi ko. Kōn kajoor in, E emaron̄ bar kōmour kōj ilo iien ko reppen im aikuj ko jej jelm̧aeiki. Ke ij būrom̧ōj, ikar m̧ōkaj—lukkuun kōņaan—kajjieon̄ ekkatak ta eo ikar aikuj kōm̧m̧ane n̄an jino kōjerbal mōttan kajoor in an Rilo̧mo̧o̧r ilo mour eo aō. Emān wiik ikar riiti jeje ko rekwojarjar im kōnono ko jān Ritōl ro Routiej an Kabun̄ in. Ikar lukkuun tōmak bwe, jon̄an metak im en̄taan eo An, Rilo̧mo̧o̧r eo ekar jeļā metak eo me ikar en̄jake. Ak ewi wāween an kar jeļā eo An jipan̄ eō? Kōnke Ekar en̄taan kōn n̄a, ta eo ikar aikuj kōm̧m̧ane n̄an bōk jipan̄ eo me Ejelā wāween an jipan̄ eō?
Ālkin aolep etale ko, ekkatak, jar, im kabun̄jar ilo tampeļ, ikar jino meļeļe. Moktata, ekar alikkar bwe Irooj em̧ōj an kar rie, kaeņōm̧m̧an, im jipan̄ baam̧le ko ad, eļaptata ilo wiik ko mokta jān mej eo an Nancy. Ekar lōn̄ en̄jake an jetōb ko rekabwilōn̄lōn̄ me kiiō ij kile bwe rej kōjeraam̧m̧an ko jān kajoor in kōmour im kōkajoor eo epojak n̄an kōj kōn Pinmuur eo an Rilo̧mo̧o̧r. Im kōn jeļā in bwe Rilo̧mo̧o̧r ekar kōjparok kōj ilo wāween ko rejeņoļo̧k, kōn emake, eļap an kaeņōm̧m̧an. Āinwōt Shadrach, Meshach, im Abed-nego ro etto, Ekar pād ippād ilo “kijeek ebwil” (Daniel 3:17) ilo en̄taan ko ad.
Lōke Irooj
Ikar bar ekkatak bwe elōn̄ men ko remenin aikuj jān kōj bwe jen bōk aeņōm̧m̧an im kōmour an Irooj. Eļaptata, jej aikuj lōke E. Menin emaron̄ juon men epen n̄an kōm̧m̧ane. Etke ij aikuj lōke Anij n̄e Emaron̄ kar dāpij Nancy jān an mej? Uwaak eo n̄an kajjitōk in, ikar lukkuun ļōmņak kake menin bwe Irooj ekar ba n̄an Josep Smith:
“Jejjab maron̄ lo kōn mej ko remōjņo̧ mejād, kōn iien in, jon̄ok eo an ad Anij kōn men kein naaj itok tokālik im aiboojoj eo ej itok ālkin eļap en̄taan” (K&B 58:3).
Kōm kar jeraam̧m̧an kōn elōn̄ kōkaļļe ko kōn jekjek im iien mej eo an Nancy ekkar n̄an ankilaan Irooj. Ikar meļeļe bwe Jemed eo ekajoor pōtata im eļap iakwe ippān ekar kōtļo̧k bwe jen en̄taan kōn men kein kōnke, ilo karōk eo an Ewāppen kōn mour indeeo an baam̧le, en̄taan in ilo juon wāween emenin aikuj. Ilo aō jeļā menin, imeļeļe bwe mōttan wōt karōk eo An ejjab n̄an kijejeto wōt ak n̄an “kijejetoiki ilo em̧m̧an” (K&B 121:8). N̄an jon̄an eo me imaron̄ wūjlepļo̧k mālijjon̄ in n̄an E, iban bōk wōt jipan̄ ak naaj bar erreo. Em̧ōj aō en̄jake menin ilo elōn̄ wāween.
Em̧ōj aō kapilōk ajri ro nejū n̄an kōm̧m̧ane ta eo ikar ekkatak ilo en̄jake in ippa make:
-
Kōtļo̧k bwe metak in en̄jake ko reppen ren kaanjoiki eok n̄an em̧m̧an in mour āinwōt rikaļoor.
-
Wūjlepļo̧k Būruōm̧ ilo jar.
-
Eļan̄n̄e kwōj illu ippān Anij kōn an kōtļo̧k bwe jorrāān ren waļo̧k, kajjitōk bwen pinej jenkwōn illu n̄an tōmak im meanwōd.
-
Kallim̧ur bwe kwōnaaj iakwe E im lukkuun niknik n̄an jem̧ļo̧kin.
-
Idaak jān naan ko an Anij aolep iien—jān jeje ko rekwojarjar im kōnono im jeje ko an rikanaan ro raan kein im rūkaki ro.
-
Etal n̄an tampeļ kōn juon ikdeleel n̄an ekkatak men ko an mour indeeo.
-
Pukōt armej ro me būrabōļōm ko aer rej erom̧ būrabōļōm ilo tōmak, im kōkajoor er kōn naan in kam̧ool eo am̧ kōn katak ko.
Juon Kam̧ool an Rijilōk
Tarin juon allōn̄ ālkin mej eo an Nancy, ekar wōr juon bon̄ ke ikar en̄jake būrom̧ōj ilo n̄a eo ekar lukkuun ļap. Ikar en̄jake eļap metak im būrom̧ōj aolepān raan eo. Ikar keememej katak eo an Elder Jeffrey R. Holland jān Doulul eo an Rijilōk ro Jon̄oulruo bwe “iaļ n̄an lo̧mo̧o̧r emōj tōl … ilo Gethsemane.”1 Men̄e en̄taan ko aō ban keidi n̄an Rilo̧mo̧o̧r, bon̄ōn eo me ikar pād ilo juon iien “emarok im meeo.”2
Ālkin en̄jake in iumwin jejjo iien im jar kōn jipan̄, ekar itok ilo kōļmenļo̧kjen eo aō ta eo ikar kōkaļļeki ilo kamputōr eo aō jejjo iiō m̧okta ļo̧k. Iaar lo leta eo im kar wanlaļļo̧k n̄an ta eo ij pukote. Ekar juon iien intōrpiu ippān Elder Richard G. Scott jān Doulul eo an Jon̄oulruo Rijilōk ro (1928–2015) eo me rekar kajjitōkin e kōn jako eo an kōrā eo pāleen, Jeanene, kōn kāānjer ilo 1995. Elder Scott ekar uwaak, “Moktata, … ikar jab luuji. Ej pād ijo iturājet in ran̄ōl eo juon. Em̧ōj am kar liāp kōn kain̄i ko rekwojarjar an tampeļ eo, im kōm̧ naaj bar ippān doon n̄an indeeo.”3
Pija in Atlanta Georgia Temple
Bon̄ōn eo naan ko rekar itok kōn juon kajoor eo me ijjan̄in kar en̄jake m̧okta. Ekar āinwōt juon em̧ eo emeram ej ebbōl ilo juon bon̄ōn emarok. Ijjan̄in kar riiti juon men eo me ekar kajju im em̧ōkaj an im̧we eō. Marok kab metak rekar jako. Ekar āinwōt Alma ke ekar “jab bar keememejļo̧k metak ko [An]” (Alma 36:19). Kam̧ool in an juon rijilōk ekar un̄ūr eō ilo tum̧wilaļ in būruō. Ikar bwilōn̄ bwe juon katak eo ikar meļeļe kake jān ke ikar dik emaron̄ kar erom̧ juon men ekabwilōn̄lōn̄. Ikar kile ippa make ke ij antooneļo̧k wāween an maron̄ Elder Scott kar jeļā menin. Im ilo tōre eo, ikar kile bwe ikar barāinwōt jeļā. Eļan̄n̄e ij tiljek, emaron̄ wōr ippa kōjatdikdik eo me ekar wōr ippān Elder Scott. Ilo an lōn̄ jidik būromōj im liajļōļ jān iien eo, ijjan̄in bar en̄jake m̧wilaļ in metak im būrom̧ōj eo me ikar en̄jaki bon̄ōn eo.
Menin ej kajoor eo an Rilo̧mo̧o̧r me ekar letok n̄an kōj bwen jipan̄ kōj ilo mālijjon̄ ko jej jelm̧aeiki. Ijeļā bwe būrom̧ōj an baam̧le eban lukkuun jako, ak em̧ōj oran̄ļo̧k ilo men eo ij ņa etan kōjeraam̧m̧an ko “rekajoor” im “wānōk” an Pinmuur eo an Rilo̧mo̧o̧r.4 Em̧ōj ad epaake ļo̧k Rilo̧mo̧o̧r, em̧ōj en̄jake kam̧ool ko An, im em̧ōj rejtake kōn jet iaan pedped ko an bujen ko ad.