Jeļa Mokta jān Am̧ Etal: Peptaij ko ilo Tampeļ

Jān Heather J. Johnson

Māākijiin ko an Kabun̄ in

Ejjab Aikuj kōttar. Aolep membōr ro rerreo, ekoba jodikdik ro im membōr ro rekāāl, remaron̄ jerbal ilo tampeļ eo kiiō.

standing in front of temple doors

“Jen lukkuun juon armej ej etal n̄an tampeļ eo im juon armej eo ej iakwe tampeļ eo,” Būreejtōn Howard W. Hunter ekar ba (1907–95). “Jej aikuj mōkaj n̄an tampeļ eo ilo emakijkij … n̄e ejjeļo̧k men ko rej bōbraeik kōj. Jej aikuj etal ejjab wōt kōn ro nukid remej ak barāinwōt kōn kōjeraam̧m̧an eo ad make ilo ad kabun̄jar ilo tampeļ eo, kōn ko̧kwojarjar im kōjparok me rej pād ilowaan depdep ko an tampeļ eo” (“A Temple-Motivated People,” Ensign, Feb. 1995, 5).

Kōkapilōklōk in ej iookļo̧k aolep membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata—aaet men̄e kwōj juon membōr ej kab peptaij. Toon wōt am̧ erreo, ejjeļo̧k iien kōttar m̧oka jān am̧ maron̄ etal n̄an tampeļ eo. Iien eo wōt kwōj peptaij im kapen uwaan Kabun̄ eo, komaron̄ bōk juon peba in mālim an tampeļ ejjab aitok kitien kōjerbale.

Peba in mālim in ej kōtļo̧k am̧ deļo̧n̄e tampeļ eo n̄an kōm̧m̧ani jerbal in peptaij ko im kapen ko n̄an ro nukum̧ em̧ōj aer mej. Ilo am̧ jerbal im kabun̄jar ilo tampeļ eo, komaron̄ kōkajoorļo̧k naan in kam̧ool eo am̧ kōn gospel eo.

Jān en̄jake eo an kein kajuon ilo tampeļ eo, Natalia Lorena Figueroa jān Argentina ekar ba, “Ilo jikin peptaij eo ilo tampeļ eo, ikar alooje an juon brother kar peptaij kōn jim̧m̧a im ro ulōpa. Innām ikar peptaij kōn bubu im kōrā ro nej jinō. Lan̄lōn̄ eo ikar en̄jake eaar jej uwaan. Dān in kōmjaaļaļ eaar wōtlo̧k jān meja, im iaar en̄jake okmāņāāņ ilo ubō jan̄in kar wōjake m̧okta.” Ejja kain kōjeraam̧m̧an kein rej kōttar wōt ro rej karbab n̄ane im kōjerbal peba in mālim eo an tampeļ ejjab aitokin kitien kōjerbale.

Kajjitōk ko Emakijkij Kajjitōk Kaki

Ewi wāween bwe in bōk juon peba in mālim an tampeļ ejjab aitok kitien kōjerbale.

• Kwōj aikuj 12 am̧ iiō ak rūttoļo̧k im erom̧ juon membōr erreo an Kabun̄ in. Em̧m̧aan ro rej aikuj bōk Aaronic Priesthood eo, eo emaron̄ in dedeļo̧k ilowaan wōt juon wiik ālkin peptaij.

• N̄an bōk juon peba in mālim, bisop eo am̧ ak branch būreejtōn eo ej intōrpiu kwe. Intōrpiu in enan̄in ļo̧k wōt eo kwaar bōke m̧okta jān am̧ kar peptaij. Kwonaaj kōnono kōn naan in kam̧ool eo am̧ kōn gospel eo im am̧ pokake kien ko.

• Peba in mālim eo ej em̧m̧an ium̧win juon iiō.

Ta jet iaan kōjeraam̧m̧an ko an wōr juon ad peba in mālim an tampeļ ejjab aitok kitien kōjerbale?

• Komaron̄ jerbal n̄an armej ro nukum̧ em̧ōj aer mej im ro jet remej ilo am̧ kōm̧m̧ani peptaij ko im kapene ko aer ilo etaer.

• Komaron̄ keememej peptaij eo am̧ make im kapen eo am̧ make im bujen ko kwaar kōm̧m̧ani.

• Aaet men̄e ejjab maron̄ emakijkij am̧ etal n̄an tampeļ eo, komaron̄ bōk peba in mālim eo am̧ ippam̧ āinwōt juon kein kakeememej tampeļ im kallim̧ur ko am̧ n̄an erom̧ juon eo erreo n̄an etal n̄an e.

• Mour erreo kōn peba in mālim an tampeļ ejjab aitok kitien kōjerbale ejipan̄ eok kōpooj eok n̄an bōk kain̄i ko an tampeļ am̧ make an menin letok kwojarjar eo im liāp.

Ewi wāween aō karōke juon iien aō loļo̧k tampeļ eo?

• Kajjitōk ippān juon ritōl an ward ak branch eo, āinwōt ward mission leader eo ak būreejtōn eo an Doulul eo an Kōrā ro, n̄an jipan̄ ilo karōk juon iien loļo̧k n̄an tampeļ eo.

• Jikejuuļ ko n̄an kajjojo iien peptaij ko ilo tampeļ rej pād ilo online ilo temple.lds.org. Komaron̄ barāinwōt kūrļo̧k tampeļ eo n̄an meļeļe ko.

• Eļan̄n̄e ej kein kajuon am̧ etal n̄an tampeļ eo, komaron̄ kūrļo̧k tampeļ eo n̄an kōm̧m̧an juon jikejuuļ appointment. Ilo wāween in renaaj m̧aanjabpopo n̄an karuwaineneiki eok im kōmeļeļeiki ta eo kwonaaj kōm̧m̧ane ilo tampeļ eo.

• Kōņak nuknuk ko am̧ ilo Jabōt n̄an tampeļ.

• Bōkļo̧k ippam̧ļo̧k juon bar nuknuk mouj itulowa. Jet tampeļ rej letok nuknuk lowa ko remouj, ak jet tampeļ rejjab. Tampeļ eo enaaj lewaj juon white jumpsuit im to̧o̧l.

Ta eo ij aikuj kōtmān n̄e ij etal n̄an tampeļ eo n̄an kōm̧m̧ani peptaij ko im kapen ko?

• N̄e kwōj etal n̄an tampeļ eo, m̧okta kwōnaaj etal n̄an tebōļ eo im̧aan kōjem̧ eo. Juon rijerbal ilo tampeļ eo enaaj lale peba in tampeļ eo am̧.

• Innām em̧m̧aan ro im kōrā ro rej jepelļo̧k n̄an ruum̧ in jānij ko. Private locker ko rej litok n̄an likūt nuknuk ko jej jāniji jāni n̄an jumpsuit mouj eo rej litok.

• Rijerbal ro ilo tampeļ eo renaaj tōlļo̧k eok n̄an ijo koņaaj kōm̧m̧ane peptaij ko im kapen ko.

• Peptaij ko im kapen ko kwonaaj bōk koņaam̧ ie renaaj ejjeļo̧k oktak jān kar eo am̧ make ke kwaar peptaij im kapen, bōtaab kwōnaaj peptaij ilo etan juon armej emej.

• Ālkin am̧ kadedeļo̧k am̧ bōk koņaam̧ ilo kain̄i ko, kwōnaaj bar ro̧o̧lo̧k n̄an ruum̧ in jānij nuknuk eo im jāniji nuknuk in peptaij ko n̄an nuknuk ko am̧.

• Ejjab aikuj wōr ikūm̧kūm̧ kōn etal n̄an tampeļ eo. Rijerbal ro an tampeļ eo repād aolep jikin kwōj etal ie ilowaan tampeļ eo. Renaaj jipan̄ eok.