Kōppeļļo̧k Lan̄ ko kōn Jerbal an Tampeļ im Menmenbwij an Baam̧le
Jān Būreejtōn Russell M. Nelson
Būreejtōn eo an Doulul eo an Jon̄oulruo Rijilōk ro
Im jān Wendy W. Nelson
Jān juon presentation ilo RootsTech 2017 Family History Conference ilo Salt Lake City, Utah, USA, ilo Pāpode 11, 2017. N̄an alooje juon presentation kar rekoot ilo kajin English, Portuguese, ak Spanish, etal n̄an lds.org/go/1017Nelson.
Ilo presentation in aer ilo 2017 RootsTech, Būreejtōn Russell M. Nelson im kōrā eo pāleen, Wendy, rekar karuwaineneiki Armej ro Rekwojarjar n̄an lukkuun jar im ļōmņak kōn kain kaarmejete rot eo remaron̄ kōm̧m̧ane bwe en ļapļo̧k aer kōm̧m̧an jerbal in tampeļ im menmenbwij an baam̧le.
Būreejtōn Nelson: Ke jim̧aaō A. C. Nelson ekar juon ripālele im baba eo em̧m̧an dettan, baj 27 wōt an iiō, ke jemān ekar mej. Jilu allōn̄ tokālik, jemān eo emej, jim̧m̧aō, ekar waļo̧ktok im lotok e. Raan in lotok in ekar bon̄ in Eprōļ 6, 1891. Jim̧m̧aō Nelson ekar bwilōn̄ kōn lotok eo an jemān jon̄an ekar je en̄jake eo an ilo jōnōļ eo an n̄an baam̧le eo an im ro m̧ōttan.
“Ikar babu ilo peet eo aō ke Jema ekar deļo̧n̄tok ilo ruum̧ eo,” Jim̧m̧a Nelson ekar je. “Ekar itok im jijet iturājet in peet eo aō. Ekar ba, “Ekwe, nejū, ewōr wōt jejjo aō minit, ikar bōk mālim n̄an itok im lotok eok ium̧win jejjo minit ko. Em̧m̧an aō mour, nejū, im elōn̄ men ko ikar kōm̧m̧ani jān tōre eo ikar mej.’”
Ke jim̧m̧a Nelson ekar kajjitōk ippān ta eo me ekar kōm̧m̧ane, jemān ekar uwaake bwe ekar boub katakin gospel eo an Jisōs Kraist ilo laļ eo an jetōb.
“Kwojjab maron̄ pijaiki, nejū, ewōr jete jetōb ijeņ ilo laļ eo an jetōb rej jan̄in bōk gospel eo,” ekar ba. “Ak elōn̄ ro rej bōk e, im eļap tōprak ilo jerbal in eļap. Elōn̄ rej laudin̄din̄ ilo reim̧aanļo̧k n̄an ro m̧ōttaer me rej mour wōt laļ in n̄an jerbal n̄an er ilo tampeļ ko.”
Jim̧m̧a Nelson ekar jiron̄ļo̧k jemān, “Kōmij itōn etal n̄an tampeļ eo im liāpe n̄an kwe, Baba, iien eo emōkajtata kōm maron̄e.”
Jim̧m̧aō ekar uwaak: “Nejū, en̄ņe, ej jidikin wōt un eo unin aō kar itok n̄an lo eok kōn menin. Aaet jenaaj erom̧ juon baam̧le im mour ilo aolepān mour indeeo.”
Innām jim̧m̧a Nelson ekar kajjitōk, “Baba, gospel eo āinwōt katakin jān Kabun̄ ej ke m̧ool?”
Jemān ekar jitōn̄ļo̧k juon pija jān Būreejtōnji eo Kein Kajuon ej etoto ilo dipin ruum̧ in kiki eo.
“Nejū, baj āinwōt am̧ jeļā āinwōt am̧ loe pija in, baj āinwōt am̧ jeļā gospel in ej m̧ool. Gospel eo an Jisōs Kraist epād ippān kajoor eo n̄an lo̧mo̧o̧ren aolep em̧m̧aan im kōrā ro rej pokake, im ilo ejjeļo̧k bar iaļ remaron̄ in bōk lo̧mo̧o̧r ilo aelōn̄ in kiin̄ eo an Anij. Nejū, aolep iien eddāb n̄an gospel eo. Kwōn kōttāik eok, kwōn jar, kwōn m̧ōņōņō kōn priesthood eo, kwōn m̧ool, kwōn tiljek n̄an bujen ko kwaar kōm̧m̧ani ippān Anij. Lale kwaar kōm̧m̧ane jabdewōt men ko reban kabun̄ buruwōn Anij. O, gospel eo ej juon kōjeraam̧m̧an. Nejū, kwōn juon ļaddik em̧m̧an.”
A. C. Nelson, jim̧m̧aan Būreejtōn Russell M. Nelson.
Kōmeļeļe ko jān Bjorn Thorkelson; background, cell phone, im pija ko ilo tablet jān Getty Images
Sister Nelson: Ij iakwe aolep (B’s) kein. “Kwōn ettā, kwōn jar, kwōn m̧ōņōņō kōn priesthood eo, kwōn m̧ool, kwōn tiljek n̄an bujen ko kwaar kōm̧m̧ani ippān Anij. … Kwōn juon ļaddik em̧m̧an.” Jiljino (B’s) koņ ko kar liwaj n̄an eok jān jim̧m̧am̧ eo ejako. Ej āinļo̧k wōt an kōnono wōt Būreejtōn Gordon B. Hinckley (1910–2008) kōn (B’s) koņ ko an jiljilino.1
Būreejtōn Nelson: Ej āinļo̧k wōt, ejjab ke? Elukkuun aiboojoj n̄an n̄a bwe jim̧m̧aō emaron̄ likūti reko̧o̧t in n̄an kōm. Kōm kar katak bwe ajri ro nejin rekar maron̄ liāp n̄an e. Kōn menin un eo kōn lotok eo an eaar dedeļo̧k.
Jetōb in Ilaija
Būreejtōn Nelson: Juon āt eo eļap ilo jeje ko rekwojarjar ej kōmeļeļeik etke baam̧le elukkuun in aorōk. Āt in ej Ilaija. IL-AI-JA ilo Hibru ej meļeļein “Jeova ej aō Anij.”2 Ļōmņak kake! Ium̧win etan Ilaija rej meļeļe ko ilo Hibru jim̧or n̄an Jemān im Nejin.
Sister Nelson: Ilaija ekar rikanaan eo āliktata eaar kabwijer kajoor in liāp eo an Melkisedek Priesthood eo m̧okta jān tōre eo an Jisōs Kraist. Mijen eo an Ilaija ekar n̄an ukōt būruwōn ajri n̄an jemāer, im būruwōn jemāer n̄an ajri ro nejier, bwe ren maron̄ liāp, ak ijjelo̧kin “aolepān laļ naaj kar kanooj ko̧kkure ilo itok eo An” (Josep smith—History 1:39; eoon eo eaorōk kar kobaiktok). Ej juon kajin eo me ekanooj kajoor.
Būreejtōn Nelson: ikōņaan ļōmņak kōn jetōb in Ilaija āinwōt “juon lotok an Jetōb Kwojarjar ej kam̧ool kōn piktok eo ekwojarjar an baam̧le.”3 Ekkar n̄an Tikjinede eo ilo Baibōļ eo, “Kajoor eo an Ilaija ej kajoor in liāp eo an priesthood eo me men ko rej liāpi ak kōtļo̧ki ioon laļ in rej liāpi ak kōtļo̧ki ilo lan̄” (“Ilaija”).
Sister Nelson: Bwe n̄e jej ba bwe jetōb in Ilaija ej em̧m̧akūt ioon armej n̄an rōjan̄ er pukōt armej ro nukier remej, jej lukkuun ba bwe Jetōb Kwojarjar eo ej im̧we kōj n̄an kōm̧m̧ani men ko me renaaj kōtļo̧k bwe baam̧le ko ren liāp indeeo.
Būreejtōn Nelson: Ej juon men em̧m̧an n̄an ukōt būruwōn ajri ro n̄an jemāer ilo ad kwaļo̧k bwebwenato ko raorōk an baam̧le ko maron̄ būki im ememeji. Bōlen en wōr peba in menmenbwij ko an baam̧le, bwebwenato ko, pija ko, im men ko bwinnid aolep iien im̧aan mejād maron̄ kōkajoorļo̧k naan in kam̧ool ko ad (lale Mosaia 1:5). Ilo ad katotoiki men kein ilo dipin mōko im̧ōd, ioon tebōļ ko ad, kam̧butōr ko ad, iPād ko ad, im aaet ilo taļboon ko nejid, bōlen jenaaj bōk im̧we ko n̄an kōm̧m̧ani kālet ko rem̧m̧an im kepaakļo̧k Irooj im n̄an baam̧le ko ad.
Eļan̄n̄e jenaaj likūt ilo ejja jon̄an eo wōt, mekarta, ejjan̄in lukkuun bwe ijo em̧ōj ad kōm̧m̧ane. Āinwōt membōr ro an Kabun̄ in, itok limo eo ad ilo jerbal in menmenbwij an baam̧le em̧ōj an m̧weiur jān kōmeļeļe eo jān Irooj bwe er ijello̧kwid reban maron̄ weeppān im kōj ijello̧kun rimej ro ad jeban weeppān (lale K&B 128:15). Meļeļein bwe jej ekkejel ippān doon kōn kain̄i in liāp ko rekwojarjar an tampeļ eo. Jej aikuj in kajoor ilo ekkejel in jān rūtto ro jibūd im jim̧aad n̄an ro ineed. Eļan̄n̄e bwebwenato ko ad jej aiini im pija ko rej aikuj erom̧ tōprak eo āliktata an men ko jej kōm̧m̧ani—eļan̄n̄e jejeļā wōn ro jibūd im jim̧aad im jeļā men ko rekabwilōn̄lōn̄ kōn er, ak jej kōtļo̧k aer kalbuuj im jab maron̄ diwōj ilo turājet eo juon ilo aer jab bōk kain̄i ko—kain oktak in ej jāmin erom̧ jabdewōt jipan̄ n̄an ro jibūd im jim̧aad ro rej pād wōt im kalbuuj ilo laļ eo an jetōb.
Sister Nelson: Kōjparok bwebwenato ko an ro jibūd im jim̧aad eaorōk, ak ejjab aikuj in juon wāween eo ekōmettak ilo ad kadedeikļo̧k jerbal in kain̄i ko an ro jibūd im jim̧aad. Jej aikuj in kōm̧m̧an iien n̄an ro jibūd im jim̧aad meļeļe in kain̄i ko rekkar.
Būreejtōn Nelson: Im meļeļein menin kaarmejet iien ko ad ekkā ad julo̧k n̄an m̧akūtkūt ko jet. Jej aikuj in joļo̧k eļapļo̧k iien ilo tampeļ eo im ilo ad kappukot bwebwenato ko an baam̧le, ekoba indexing.
Sister Nelson: Kaarmejete em̧ool ej bōktok kōjeraam̧m̧an ko an lan̄.4 Em̧ōj aō kar jeraam̧m̧an n̄an lo elōn̄ ro jibū im jim̧aaō me ij en̄jake lōke raar pojak n̄an kōm̧m̧ani bujen ko ippān Anij im n̄an bōk kain̄i ko remenin aikuj aer. Elōn̄ iien, iaar kile bwe eļan̄n̄e ij jerbale juon būroojāāk etōr jān jon̄an im eaar maat aō iien, kajoor, im ļōmņak ko, eļan̄n̄e enaaj kar kōm̧m̧ane juon kaarmejet in iien kōn pukot meļeļe ko rej kakōrbōb kain̄i ko n̄an ro jibū im jim̧aaō ak kōn etal n̄an tampeļ n̄an erom juon ribōk jikin n̄an er, lan̄ ko raar peļļo̧k im kajoor eo im ļōmņak ko raar jino jiōb tok. Ilo jet wāween ikar maron̄ lo iien ko rebwe n̄an tōpar raan eo ikar aikuj kam̧ōje. Ekar lukkuun kabwilōn̄lōn̄, ak ekar waļo̧k aolep iien. Tampeļ im jerbal in menmenbwij an baam̧le rej bōktok n̄an eō juon lan̄lōn̄ eo me em̧ool ejjab jān laļ in.
Jerbal in Menmenbwij an Baam̧le im Mijenede
Būreejtōn Nelson: Eļan̄n̄e in kar juon mijenede rainin, ro m̧ōtta ruo rem̧m̧antata ilo ward ak branch eo ijo iaar jerbal ie renaaj kar ritōl mijen im rikapilōk an tampeļ im menmenbwij an baam̧le ilo ward eo.
Armej ro ewōr aer ikdeelel ippāer make n̄an jeļā jabdewōt men kōn ro jibūer im jim̧m̧aer. Men in ej erom̧ juon iien em̧m̧an n̄an mijenede ro. Āinwōt mijenede ro rej katak n̄an iakwe armej ro rej katakin er, renaaj kajjitōk kōn baam̧le ko aer. “Ro jibōm̧ im jemam̧ rej mour wōt ke? Ro jibūm̧ im jim̧aam̧ rej mour wōt ke? Kwōjeļā ke kajjeen emān epepen in ro jibūm̧ im jim̧aam̧?” Kōnono ko epidodo aer ibebtok n̄e ro rej kepaaktok er n̄an kōnono ippān mijenede ro rej ruwainene n̄an kōnono kōn armej ro rej iakwe er.
Ilo wāween in emaron̄ erom̧ men eo em̧m̧an n̄an mijenede ro, ekoba ro uwaan baam̧le ko, n̄an kajjitōk, “Kwōjeļā ke kajjeen jabdewōt ro jibum̧ im jim̧m̧am̧? Kwōjeļā ke et ko etāer?” Em̧ool bwe rikkatak ro an mijenede ro reban jeļā āt ko aolep rūwalitok an ro jibūer im jim̧m̧aer.
Innām mijenede ro remaron̄ kōm̧m̧ane ļōmņak in: “Ewōr juon m̧ōtta ilo kabun̄ eo aō eo emaron̄ jipan̄. Eļan̄n̄e jemaron̄ lo et ko an jet iaer ak bōlen aolepān etan ro jibūm̧ im jim̧m̧am̧, enaaj ke wōrtokjān awa ko kwaar julo̧k n̄an pukoti wōn ro rej jibūm̧ im jim̧m̧am̧?” In m̧ōttan ilo kabun̄ in, aaet, ej ward tampeļ im family history consultant eo.
Sister Nelson: Ij ļōmņak emaron̄ juon men em̧m̧an n̄an mijenede ro n̄an jeļā bwe rejjab makeļo̧k iaer n̄e rej kappukot im katakin ro rej ikdeelel kōn m̧ool ko an gospel eo em̧ōj an jepļaaktok an Jisōs Kraist. Būreejtōn George Q. Cannon (1827–1901), eo ekar jerbal āinwōt juon rikakpilōklōk n̄an emān Būreejtōn ro an Kabun̄ in, ekar katakin bwe ilo raan kein āliktata, ro rej kobatok ilo Kabun̄ in rej kobatok kōnke ro jibūer im jim̧m̧aer rekar jar kōn juon iaan ro ineer bwe en kobatok ilo Kabun̄ in bwe er, ro jibūer im jim̧m̧aer, maron̄ bōk kain̄i ko raorōk jān jerbal kōn er.5
Mour Ijo Eutiejtata: Juon Koņ An Baam̧le
Būreejtōn Nelson: Mour Ijo Eutiejtata ej juon koņ an baam̧le. Jān wōt kain̄i in lo̧mo̧o̧r ko an gospel eo an Jisōs Kraist baam̧le ko remaron̄ bōk ijo eutiejtata. Jem̧ļo̧k eo eļaptata n̄an kōj ro rej kajjieon̄ ej bwe jen m̧ōņōņō āinwōt juon baam̧le—em̧ōj an bōk menin letok kwojarjar eo, liāp ippān doon, im m̧aanjabpopo n̄an mour indeeo im̧aan mejān Anij.
Sister Nelson: Kajjojo kūlaaj ko ilo Kabun̄ in jej pād ie, kajjojo iien jerbal, kajjojo bujen jej kōm̧m̧ane ippān Anij, kajjojo kain̄i ko an priesthood jej būki, men otemjej ko jej kōm̧m̧ani ilo Kabun̄ in rej tōlļo̧k kōj n̄an tampeļ eo ekwojarjar, m̧weo imōn Irooj. Eļap kajoor epād n̄an ruo ripālele im n̄an ajri ro nejier kōn kain̄i in liāp eo n̄e rej kōjparok bujen ko aer.
Būreejtōn Nelson: Aolep raan jej kālet ia eo jekōņaan mour ie n̄an indeeo jān wāween ad ļōmņak, en̄jake, kōnono, im m̧akūtkūt. Jemedwōj Ilan̄ ekar kwaļo̧k bwe jerbal eo An im aiboojoj eo An ej n̄an kakūrm̧ool jab wabanban im mour indeeo an ajri ro Nejin (lale Moses 1:39). Ak E ekōņaan bwe jān kālet n̄an ro̧o̧lļo̧k n̄an E. Eban kipel kōj ilo jabdewōt wāween. Jim̧we im jejjet ej ilo ad kōjparok bujen ko ad ej kwaļo̧k n̄an E ewi jon̄an ad kōņaan ro̧o̧l ļo̧k im mour Ippān. Kajjojo raan ej bōk kōj epaakļo̧k ak bōk kōttoļo̧k jān maron̄ aiboojoj eo ad an mour indeeo. Kōj kajjojo aikuj in kōjparok bujen ko ad, ukweļo̧k aolep iien, im pukot n̄an erom̧ āinwōt ad Rilo̧mo̧o̧r. Innām im innām wōt baam̧le ko remaron̄ ippān doon n̄an indeeo.
Sister Nelson: Ej aō naan in kam̧ool bwe jekdo̧o̧n ewi jon̄an an jeraam̧m̧an mour eo am̧ kiiō, ak jekdo̧o̧n ewi jon̄an jab itok limo eo im rup bōro eo emaron̄ in, am̧ bōk kuņaam̧ ilo tampeļ im menmenbwij eo an baam̧le enaaj kōkōm̧anm̧anļo̧k. Ta eo kwōj aikuji ilo mour eo am̧ kiiō? Eļapļo̧k iakwe? Eļapļo̧k lan̄lōn̄? Eļapļo̧k am̧ kauweik eok make? Eļapļo̧k aenōm̧m̧an? Eļapļo̧k iien ko raorōk? Eļapļo̧k kōn juon en̄jake bwe komaron̄ kōm̧m̧ane juon oktak? Eļapļo̧k limo? Elōn̄ļo̧k uwaak ko n̄an kajjitōk ko am̧ kwoj pukōti? Eļapļo̧k am̧ ekkejelļo̧k ippān ro jet? Eļapļo̧k am̧ meļeļe kōn ta eo kwōj riiti ilo jeje ko rekwojarjar? Eļapļo̧k am̧ maron̄ n̄an iakwe im n̄an jeorļo̧k bōd? Eļapļo̧k am̧ maron̄ n̄an jar kōn kajoor? Eļapļo̧k im̧we im ļōmņak ko ejaaki n̄an jerbal eo am̧ im būrojāāk ko jet? Eļapļo̧k am̧ iien n̄an ta ko relukkuun aorōk?
Ij akweļap ippāmi n̄an kōm̧m̧an juon kaarmejete an iien n̄an Irooj kōn kōļapļo̧k iien joļo̧k ilo kōm̧m̧an jerbal in tampeļ im menmenbwij an baam̧le, innām lale ta ej waļo̧k. En̄in ej naan in kam̧ool eo aō bwe n̄e jej kwaļo̧k n̄an Irooj bwe jej m̧ool kōn jipan̄ ro jibūd im jim̧aad, lan̄ ko renaaj peļļo̧k im jenaaj bōk aolep men ko jej aikuji.
Būreejtōn Nelson: Jemaron̄ im̧we aolepān raan eo kōn jerbal im menmenbwij an baam̧le im en̄jake ko ippān ro jet. Bōtaab jej aikuj in kōm̧m̧ane juon men n̄an kanooj en̄jake lan̄lōn̄ eo kōn kōj make. Ikōņaan lewaj juon idajon̄jon̄ n̄an kajjojo iaad bwe en̄jake eo eaiboojoj an jerbal in en maron̄ wōnm̧aanļo̧k wōt im em̧ool ļapļo̧k. Ij karuwaineneik kom̧ n̄an lukkuun ļōmņak kōn ta kain kaarmejete eo—emaron̄ juon kaarmejete an iien—komaron̄ kōm̧mane n̄an am̧ maron̄ kōm̧m̧an eļapļo̧k jerbal in tampeļ im menmenbwij an baam̧le iiō in.
Jej bōk kuņaad ilo jerbal eo an Anij Ekajoor Pōtata. E ej mour. Jisōs ej Kraist eo. En̄in ej Kabun̄ eo An. Kōj jej ajri in bujen ro Nejin. Emaron̄ kōjatdikdik iood.