Erom̧ Rikaļoor ro Rem̧ool

Jān Būreejtōn Henry B. Eyring

Rikakpilōklōk eo Kein Kajuon ilo Būreejtōnji eo Kein Kajuon

Ilo aolep kweilo̧k in kwojkwoj, ewōr ippād jeraam̧m̧an in ilo ad kallim̧uri Jemedwōj Ilan̄ bwe jenaaj aolep iien keememej Rilo̧mo̧o̧r eo im kōjparok kien ko An bwe Jetōb eo An en maron̄ pād ippād iien otemjej (lale Moronai 4:3; 5:2; K&B 20:77, 79). Keememej E enaaj aolep iien itok n̄an kōj ilo ad bōk Etan iood. Jej kōm̧m̧ane menin ilo elōn̄ wāween ko ak eļaptata n̄e jej jerbal n̄an ro jet ilo Etan, riiti naan ko An rekwojarjar, im jar bwe jen jeļā ta eo Ekōņaan bwe jen kōm̧m̧ane.

Ekar waļo̧k menin n̄an n̄a ke ikar peptaiji juon likao. Ikar jeļā bwe kar kūr eō n̄an jerbal jān ro rikarejeran Rilo̧mo̧o̧r eo em̧ōj kapit er āinwōt juon mijenede n̄an katakin gospel eo im n̄an kam̧ool kōn E im kōn Kabun̄ eo An em̧ool. Mijenede eo m̧ōtta im n̄a kom̧ro kar kallim̧uri likao eo bwe enaaj erreo jān kajoor eo an Pinmuur eo an Jisōs Kraist ilo an ukweļo̧k kōn tōmak ilo Rilo̧mo̧o̧r eo im kar peptaij jān juon iaan rikarejar ro An ewōr maron̄ ippāer.

Ke ikar kotak lōn̄tak likao eo jān dān eo ilo jikin peptaij eo, ekar unoojdikdik tok n̄an lo̧jiln̄ū, “Irreo, Irreo.” Ilo iien ņe, ikar keememej peptaij eo an Rilo̧mo̧o̧r eo jān Jon Ripeptaij ilo Reba Jordan. Aaet eļapļo̧k, ikar keememej bwe ikar kōm̧m̧ane jerbal in lo̧mo̧o̧r eo an Rilo̧mo̧o̧r eo ekar jerkakpeje im emour—eo Jetōb Kwojarjar eo ekar pād ippān, āinwōt an kar pād ippān Jon.

N̄an n̄a im n̄an kōj kajjojo, keememej Rilo̧mo̧o̧r eo emaron̄ ļapļo̧k jān ad pedped wōt ioon juon ememeļo̧kjān kōn jeļā eo ad im en̄jake ko ad kōn E. Jemaron̄ kōm̧m̧ani jokālet ko aolep raan me remaron̄ kepaakļo̧k kōj n̄an E ilo raan kein.

Jokālet eo eļam̧ waan tata emaron̄ n̄an ad riiti jeje ko rekwojarjar. Jān kōm̧m̧ane menin, jemaron̄ bōk en̄jake ko jān ad epaake E. N̄an n̄a, epaake E eļaptata an itok n̄e ij riit ilo Bok in Mormon eo. Ilo minit ko jinointata ke ikar riiti jebta ko an 2 Nipai, ikar ron̄ jān aō kōļmenļo̧kjeņ kōn ainikien ko an Nipai im Liai rej kōmeļeļe kōn Rilo̧mo̧o̧r eo eļan̄n̄e rekar lukkuun jeļā E. Juon en̄jake in epaakļo̧k E ej itok.

N̄an kwe, jikin ko jet ilo jeje ko rekwojarjar remaron̄ kepaakļo̧k eok n̄an E. Mekarta ia eo im n̄āāt eo kwōj riiti naan ko an Anij ie, kōn juon bōro em̧ool im kōņaan em̧ool n̄an keememej Rilo̧mo̧o̧r eo, kwōnej kōļapļo̧k ikdeelel eo am̧ n̄an bōk Etan ioom̧ ilo aolep raan in am̧ mour.

Ikdeelel ņe enaaj ukōt wāween am̧ jerbal ilo Kabun̄ in an Irooj. Kwōnaaj jar n̄an Jemedwōj Ilan̄ kōn jipan̄ ilo kōļapļo̧k men̄e ta ko rej waļo̧k n̄an eok rej āinwōt juon kūr edik. Jipan̄ eo kwōnaaj kajjitōk kake ej maron̄ eo n̄an am̧ meļo̧kļo̧k eok make im likūt am̧ ļōmņak eļapļo̧k kōn ta ko Rilo̧mo̧o̧r eo ekōņaan n̄an ro otemjej kwaar kūr n̄an jerbal n̄an er.

Ikar en̄jake Pein im An epaake eō ilo aō jerbal ippān ajri ro nejin n̄e ij jar n̄an jeļā ewi wāween aō jipan̄ er loe aenōm̧m̧an eo me gospel in wōt ej bōktok. Ilo iien kein, ekar dik aō kea kōn aō loe eō āinwōt juon jinen im jemān ejeraam̧m̧an, ak ikar lukkuun kea kōn em̧m̧anļo̧k im ājmour eo an ajri ro nejū.

Ikdeelel eo n̄an leļo̧k n̄an ro jej jerbal n̄an er ta eo Rilo̧mo̧o̧r eo enaaj kar leļo̧k n̄an er n̄an tōl n̄an jar ko me rej akweļap ko n̄an Jemedwōj Ilan̄, em̧ool ilo etan Jisōs Kraist. N̄e jej jar ilo wāween in—ilo etan Rilo̧mo̧o̧r eo, kōn tōmak ilo E—Jemād ej uwaak. Ej jilkintok Jetōb Kwojarjar eo n̄an tōl, kaenōm̧m̧an, im kōketak kōj. Kōnke Jetōb eo ej aolep iien kwaļo̧k kam̧ool kōn Rilo̧mo̧o̧r eo (lale 3 Nipai 11:32, 36; 28:11; Ether 12:41), jon̄an maron̄ eo ad n̄an iakwe Irooj kōn aolepān būruwōd, ļōmņak, im kajoor ej ļapļo̧k (lale Mark 12:30; Luk 10:27; K&B 59:5).

Kōjeraam̧m̧an eo jān ad aolep iien im kiiō keememej E enaaj jidik kōn jidik im emakijkij ilo ad jerbal n̄an E, kwōjkwōj ioon naan ko An, im jar ilo tōmak ilo Etan. Im kakeememej in enaaj kōkōm̧anm̧an ļo̧k kōj bwe jen erom̧ rikaļoor ro an Irooj Jisōs Kraist ilo aelōn̄ in kiin̄ in An ioon laļ in—im tokālik pād ippān Jemān ilo aiboojoj eo an laļ eo ej itok.