O Le Mea Faapapa

Na nonofo le aiga o Elder Dale G. Renlund ina ua 12 ona tausaga, i Suetena. I se tasi aso Sa, na aumai ai e le uo a Dale o Steffan se mea faapapa lapoa ma se afitusi i totonu o le fale Lotu. Sa fiafia Dale. Na ave e Dale le mea faapapa ma faaola le vavae. Na ia taumafai e tape le vavae, ae na mu ai ona tamailima ma pau ai le mea faapapa! Na tilotilo atu Dale ma Steffan ma le fefe tele ao faaauau ona mumu le vavae.

Na pa le mea faapapa! Na faatumulia le falelotu i se manogi leaga. Na vave lava ona ao mai i luga e Dale ma Steffan fasi mea faapapa ma tatala faamalama ina ia faaalu ai i fafo le manogi. Na la faamoemoe o le a leai se tasi e iloaina.

Ao o mai tagata i le sauniga faamanatuga, na latou iloaina lava. Na matuai malosi lava le manogi o lea na le mafai ai ona taulai atu tagata i le sauniga. Na lagona e Dale le faalumaina tele ma le maasiasi. Na ia iloaina o le mea na ia faia na le fiafia i ai le Tama Faalelagi.

Ina ua maea le lotu, na fai atu Peresitene Lindberg, le peresitene o le paranesi, ia Dale e sau i lona ofisa aua na ia iloa atu o loo i ai se mea ua faaletonu. Na tau atu e Dale ia Peresitene Lindberg lona salamo tele e uiga i le mea faapapa.

Na agaalofa Peresitene Lindberg. Na ia susueina tusitusiga paia ma fai atu ia Dale e faitau i nisi o fuaiupu ua vaseina. Na faitau Dale, “Faauta, o ia o lē ua salamo i ana agasala, o ia lava lea ua faamagaloina, ma o Aʼu, o le Alii, e lē toe manatuaina lava i latou. O le mea lenei e mafai ai ona outou iloa pe afai ua salamo se tagata i ana agasala—faauta, e taʼutaʼu atu e ia i latou ma e lafoai i ai” (MF&F 58:42–43).

Ina ua maea le faitau a Dale, na ia iloa atu Peresitene Lindberg ua ataata. Sa ia lagona ua faamagaloina o ia. Na lagona e Dale le fiafia, ao ia tuua le ofisa.

Na aoao Elder Renlund e faapea e mafai ona faamagaloina o ia pe a ia faia se mea sese. E mafai ona ia lagonaina le fiafia pe a ia salamo ma tausia poloaiga a le Tama Faalelagi.