Pe Faapefea ona LAGONAINA le Agaga Moni o le Kerisimasi

Saunia e Peresitene Thomas S. Monson

Mai le Faigalotu o le Kerisimasi a le Au Peresitene Sili 2013.

O le Kerisimasi o se vaitau mamalu tele o le tausaga. O se taimi pisi tele foi lea mo le toatele o i tatou. Ou te faamoemoe ma tatalo e faapea tau ina ia aua nei matele tele i tatou i fiafiaga o le vaitau o le Kerisimasi ona tatou tuu ai lea o la tatou faamamafa i mea sese ma le maua ai nai fiafiaga faigofie o le faamanatuina o le soifua mai o le Paia e Toatasi o Peteleema.

O le mauaina o le olioli moni o le Kerisimasi e le maua mai le faatatope ma faanatinati ia tele atu ni mea e fai. Tatou te maua le olioli moni o le Kerisimasi pe a tatou avea le Faaola ma taulaiga o le vaitau.

O la tatou faamanatuina o le Kerisimasi e tatau ona avea ma ataata o le alofa ma le le manatu faapito na aoao mai e le Faaola. O le foai atu, ae le o le maua mai, e aumaia ai le agaga atoa o le Kerisimasi. Tatou te lagonaina ai le agaalofa sili atu o le tasi ma le isi. Tatou te aapa atu ma le alofa e fesoasoani ia i latou ua itiiti mea ua maua. O o tatou loto e faamaluluina. E faamagaloina ai fili, manatua ai uo, ma usiusitai ai i le Atua. O le agaga o le Kerisimasi e faasusuluina ai le ata o le faamalama o le agaga, ma tatou te vaavaai atu ai i fafo i le olaga pisi o le lalolagi ma sili atu ai ona tatou manatu i tagata nai lo mea o le olaga. Ina ia malamalama i le uiga moni o le agaga o le Kerisimasi, e na o lo tatou sailia lava o le Agaga o Keriso.

Tau ina ia tatou tuuina atu e pei ona tuuina mai e le Faaola. O le ofoina atu o le tagata lava ia, o se meaalofa e paia. Tatou te ofoina atu o se faamanatuga o mea uma na tuuina mai e le Faaola. Tau ina tatou tuuina atu foi ni meaalofa na e maua ai le taua faavavau, faatasi ma a tatou meaalofa na e iu lava ina taei pe faagaloina. Oka se sili atu o le tulaga o le a i ai le lalolagi pe ana tatou tuuina atu uma ni meaalofa o le malamalama ma le agalelei, o le auaunaga ma le faauoga, o le agaalofa ma le agamalu.

Ao siomia i tatou e le vaitau o le Kerisimasi i lona mamalu, tau ina ia tatou, e pei ona faia e Makoi, sailia se fetu pupula, le fetu faapitoa lena e taialaina i tatou i la tatou faamanatuina o le soifua mai o le Faaola. Tau ina ia tatou faia uma le malaga i Peteleema i o tatou mafaufau, ma aveina faatasi ma i tatou se loto agamalu, ma agaalofa o sa tatou meaalofa i le Faaola.