O Le Pepa LANU MUMU
E alala le tusitala i Iuta, ISA.
Oi aue! Ua toe mamulu atu foi le isi pepa a Tanielu.
“A ou lelei ma agalelei ma fesoasoani i se tasi ou te vaai i ai, ou te fiafia lava” (Children’s Songbook, 197).
Na vaai atu Mateo i le galuega o le matematika i le laupapa ma tusi faavave i lalo i lana api e tusi ai faamatalaga. O lana mataupu e fiafia i ai o le matematika, o lea sa matua manao ai lava o ia e gauai atu. Ae sa tau le lagona atu e ia le mea o loo fai mai ai Mrs. Santos aua o loo talanoa mai lana uo o Tanielu.
“Shh! Tanielu, ua le mafai ona ou lagona!” Na musumusu atu ai Mateo. Ae sa faaauau pea ona talanoa Tanielu. Na iu lava ina lagona mai o ia e Mrs. Santos.
“Tanielu, ua e toe faalavelave foi,” na fai atu ai Mrs. Santos. “Ua uma ona tuuina atu ia te oe le lapataiga. Ua tatau nei ona e tuuina mai ia te au se pepa.”
Na aapa atu lemu lava Tanielu i totonu o lana kesi ma tuu atu ia te ia se pepa mumu. Na solovi i lalo ona tauau, ma ia tilotilo atu i le fola. Na tuu atu e Mrs. Santos ni pepa i tamaiti aoga pe a amio lelei ma mulimuli i faatonuga. E tusi e tamaiti aoga o latou igoa i pepa ma tuu i totonu o se fagu i aso taitasi. Ae e tatau ona e toe faafoi atu le pepa pe afai e te le amio lelei. O aso Faraile uma lava, e avae ai e Mrs. Santos se pepa mai le fagu, ma o le e manumalo e filifilia se faailoga mai le pusa oa a le vasega! Na tele lava pepa a Tanielu e tatau ona toe faafoi atu ona o le tautala, o lea na le malo ai lona igoa i le tele o taimi. Na faanoanoa Mateo ona sa toe mamulu atu le isi pepa a Tanielu.
Sa tamoe atu Mateo i fafo i le malae i le malologa e taalo soka. Na ia vaai atu ia Tanielu o loo tutu na o ia i tafatafa o taupega. Na ia iloa atu o loo tagi Tanielu. Na manao Mateo e fesoasoani ia te ia ia maua se lagona sili atu.
“E te fia taalo soka?” Na fesili atu ai Mateo.
E lei faia se tala a Tanielu. Na taumafai Mateo e talanoa atili atu ia te ia, ae na ona faliuese lava o Tanielu.
“Ia, o le a ou i ai i le malae soka pe afai e sui lou mafaufau.”
Na alu atu Mateo e taalo ma isi ana uo, ae sa ia faaauau pea ona mafaufau ia Tanielu. O le a atoa le valu tausaga o Mateo ma toeitiiti ona papatiso lea. Na ia manao ia faapei o Iesu ma ia avea ma se uo lelei. Pe i ai se mea e mafai ona ia faia e fesoasoani ai ia Tanielu ia aua nei oo i se faafitauli?
O le aso na sosoo ai, sa faitauina ai e le vasega se tala i ni vaega toalaiti. Ae nai lo le faitau, na togi maualuga e Tanielu lana tusi i le ea.
Na taumafai Mateo e taofi o ia. “Tanielu, e tatau ona tatou faitauina le tusi, ae le o le taalo ai.”
Na toe togi e Tanielu le tusi. Na vaai atu Mrs. Santos i ai toeitiiti lava pa i le faaalo. Na ia savali atu ia Tanielu ma tuu atu lona lima mo se pepa. Na aapa atu Tanielu i totonu o lana kesi. Na vaaia le popole i ona foliga ao ia faaauau le sueina.
“Auoi, leai! Masalo ua leai ni ana pepa!” Na mafaufau ai Mateo. O le leai o ni pepa o lona uiga e tatau ona nofo Tanielu i totonu mo le malologa. Na amata ona mafaufau loloto Mateo. O le a se mea e mafai ona ia faia? Ona ia maua lea o se manatu lelei.
“Tanielu,” na fai atu ai Mrs. Santos, “afai e leai sau pepa mo au, ona—”
Sa manava loloa Mateo. “E mafai ona ou totogi mo ia, Mrs. Santos?” na ia fesili atu ai.
Sa fifilemu le vasega. E leai lava se tasi na fesili atu muamua faapea ia te ia. Sa le mautonu Mateo po o le a le mea o le a ia fai mai ai.
Sa foliga tei Mrs. Santos. Ona ia ataata lea. “O oe o se uo lelei tele. Ioe, e mafai ona e totogia le pepa a Tanielu mo ia.” Na tuu atu e Mateo se tasi o ana pepa ia Mrs. Santos.
“Faafetai, Mateo,” na fai atu ai Tanielu.
“Ioe!” na fai atu ai Mateo. “E te manao e faitau faatasi nei loa?”
Na lue atu le ulu o Tanielu ma ave ae i luga lana tusi.
Ao amata ona faitau e Tanielu, na lagona e Mateo le mafanafana ma le fiafia i totonu. O le manatu lelei lena na sau mai le Agaga Paia! Na iloa e Mateo na finagalo Iesu ia te ia e fesoasoani atu ia Tanielu—aua e alofa o Ia ia Tanielu. Ma na lagona foi e Mateo le alofa o Iesu!