Savali a le Au Peresitene Sili

Sailia o Keriso i le Kerisimasi

Saunia e Peresitene Dieter F. Uchtdorf

Fesoasoani Lua i le Au Peresitene Sili

Aso o le Olioli ma le Alofa Mutimutivale, fatuina e Sara Waddoups Morgan, faaaloaloga o le Falemataaga o Talafaasolopito o le Ekalesia

Mo i latou uma lava e fia malamalama po o ai i matou i le avea ai ma tagata o Le Ekalesia a Iesu Keriso o le Au Paia o Aso e Gata Ai, ou te fia ofoina atu se amataga ua faamatalaina e nei upu e tolu: Matou [te] Sailia Keriso.

Matou te saili ia aoao ia te Ia. Ia mulimuli ia te Ia. Ia avea atili e faapei o Ia.

O aso taitasi i le tausaga atoa, matou te sailia ai o Ia. Ae faapitoa lava i lenei taimi o le tausaga—le Kerisimasi, lea matou te faamanatuina ai le soifua mai o lo matou Faaola pele—o le a sili atu ona gauai atu o matou loto ia te Ia.

I le avea ai o se vaega o la matou sauniuniga mo le faamanatuina o le Kerisimasi, seia tatou mafaufau pe na faapefea e i latou na soifua i le lua meleniuma talu ai ona saunia e faafeiloai le taunuu mai o le Faaola.

O Leoleo Mamoe

Tatou te le iloaina le tele o mea e uiga i leoleo mamoe, pau o lea o i latou na “sa i le vao, sa nonofo ai ma leoleo po i lo latou lafu mamoe.”¹ Sa sili ona pei lava leoleo mamoe o tagata masani, e pei lava o le toatele o tagata lelei o e galulue i o latou aso ia maua se tupe.

E mafai ona latou suitulaga i tagata o e, i se tasi taimi, atonu e le o sailia lava i taimi uma le Keriso, ae na suia o latou loto ina ua matala mai le lagi ma folafolaina mai ia i latou le Keriso.

O i latou nei o e, ina ua uma ona faalogo i le siufofoga o avefeau faalelagi, na malaga loa lava i Peteleema i le fia vaai.²

O Le Au Makoi

O le Au Makoi o ni tagata aoaoina o e na suesueina le afio mai o le Mesia, le Alo o le Atua. E ala mai i la latou aoaoina, na latou iloaina ai faailoga na faasino i Lona fanau mai. Ina ua latou iloaina na faailoga, na latou tuua o latou aiga ma malaga atu i Ierusalema, ma fesili atu, “Po o fea o i ai le ua fanau mai le Tupu o tagata Iutaia?”³

E lei tumau pea lo latou malamalama ia Keriso i le na o se poto aoaoina. O le taimi lava na latou vaaia ai faailoga o Lona soifua mai, na latou gaoioi loa. Na latou malaga atu e saili le Keriso.⁴

E mafai ona suitulaga le Au Makoi ia i latou o e sailia le Keriso e ala i le aoaoina ma le suesueina faaleaoaoga. O lo latou tuuto atu i le meamoni ua iu ina taitaiina atu ai i latou e sailia le Keriso ma tapuai atu ia te Ia o le Tupu o tupu, le Faaola o tagata uma.

Simeona ma Ana

E mafai ona suitulaga Simeona ma Ana ia i latou o e sailia Keriso e ala i le Agaga. O nei agaga maoae o ni tagata lolotu faamaoni ma, e ala i le anapogi ma le tatalo ma e ala i le ola ai i ni olaga o le talitonu ma le usiusitai, na faatalitali ma le naunautai ia vaai i le aso o le afio mai o le Alo o le Atua.

E ala i le faamaoni, lotomaualalo, ma le faatuatua, na latou tulimatai atu ma le onosai le afio mai o le Faaola.

Na iu lava, o lo latou faatuatua na tauia ao tuuina atu e Maria ma Iosefa ia i latou le pepe lea o le a i ai se aso e tauaveina ai i Ona luga agasala a tagata uma.⁵

Tagata talitonu i totonu o sa Nifae ma sa Lamana

O le tala faamomoiloto i le ala na vaavaai atu ai tagata talitonu i le Lalolagi Fou mo faailoga o le soifua mai o le Faaola o loo maua i le Tusi a Mamona.

E te manatuaina i latou na i ai le faatuatua ia Keriso na tauemuina ma sauaina. O tagata atamamai o na aso na tuuaia e na talitonu i le tumau ai i talatuu faavalea. O le mea moni, o tagata le talitonu na malomaloa i la latou tauemuga lea na latou faia ai “se faanunununu tele” i le laueleele (3 Nifae 1:7). Na latou faifai ia i latou o e na talitonu e faapea o le a soifua mai le Faaola.

Na matuai faateleina lo latou ita ma le saua lea na latou naunau ai e fasiotia i latou uma na talitonu i le Faaola. Ua faamaumauina i le Tusi a Mamona le faaiuga maoae.⁶

O e na talitonu na soifua ai i lena taimi e mafai ona suitulaga ia i latou o e sailia le Keriso e tusa lava pe toe mai i ai isi, ula mai, ma faifai mai. Latou te sailia Keriso e tusa lava pe taumafai isi e aveseseina i latou e faapea e vaivai, le popoto, pe faigofie ona faaseseina.

Ae o le mataita o isi e le faavaivaia ai tagata talitonu moni mai le sailia o Keriso.

Matou te Sailia Keriso

I le tausaga atoa, ma atonu e faapitoa lava i lenei vaitau o le Kerisimasi, o le a faamanuiaina i le toe fai atu o le fesili “O faapefea ona ou sailia Keriso?”

I se taimi faigata tele o lona soifuaga, na tusia ai e le Tupu maoae o Tavita, “Le Atua e, o lou Atua lava oe; ou te ala saili ia te oe; ua fia inu lou agaga ia te oe; ua ou matua naunau atu ia te oe”⁷

Atonu o lenei uiga faaalia o le sailia o le Atua o se tasi o mafuaaga na faamatalaina ai Tavita o se tagata e tusa ma le finagalo o le Atua.⁸

I lenei vaitau o le Kerisimasi ma i le tausaga atoa lava, tau ina ia tatou saili ma o tatou loto ma agaga lo tatou Faaola pele, le Alii o le Filemu, le Toatasi Paia o Isaraelu. Mo lenei manao, i le tulaga lautele, ua faamatalaina ai e le gata po o ai i tatou i le avea ai ma tagata o Le Ekalesia a Iesu Keriso o le Au Paia o Aso e Gata Ai ae sili atu lava po o ai moni lava i tatou i le avea ai ma soo o Keriso.

Faamatalaga

1. Luka 2:8.

2. Tagai i le Luka 2:15.

3. Tagai Mataio 2:1–2.

4. Tagai Mataio 2:11.

5. Tagai i le Luka 2:22–38.

6. Tagai 3 Nifae 1.

7. Salamo 63:1.

8. Tagai Galuega 13:22.

Aoao Atu mai Lenei Savali

E mafai faapefea ona sili atu lo tatou sailia o Keriso, e pei ona fautuaina mai e Peresitene Uchtdorf? E mafai ona e uunaia i latou e te aoaoina e fesili ifo ia i latou lava, “O faapefea ona ou sailia Keriso?” Mafaufau e valaaulia i latou e amata ona faasoa atu pe faapefea ona latou sailia taitoatasi Keriso i le taimi o a latou suesuega faaletusipaia i le aiga i aso taitasi. E mafai foi ona e maimoa i le vitio o le Kerisimasi i le Mormon.org faatasi ma i latou e te aoaoina ma valaaulia i latou e auai i lenei avanoa faaletausaga ia sailia Keriso e ala i le mulimuli i Ana aoaoga.

• Vaavaai mo Iesu