O Leo o Le Au Paia o Aso e Gata Ai
Afifi o le Kerisimasi mo Au?
Ata na tusia e Carolyn Vibbert
Sa ou auauna atu i le Misiona a Kalefonia Sacramento i le taimi o le Kerisimasi o le 2003. Na amata ona maua e lau soa ma isi faifeautalai tamaitai e toalua na matou nonofo faatasi i le fale mautotogi ni meaalofa ma tusi mai o latou aiga ma uo. Na ou iloaina o le a le tutusa lena mea mo au.
Na itiiti ni mea e maua e lou aiga i Atenitina, ma na masani ona tuai mai a latou tusi i le lua i le tolu masina. Na ou mamao ese mai lou aiga, ae na ou fiafia e faaalu le Kerisimasi i le auaunaga a Iesu Keriso.
I le Po o le Kerisimasi, na matou sauni e momoe ae fai mai ia te au se tasi o tamaitai faifeautalai e faapea na tuu e se tasi ni afifi i le faitotoa faatasi ma lou igoa o i luga.
“Mo au? E le mafai!” Sa ou fai atu ai, ma le ofo.
E lua ni pusa lapopoa na tusia ai lou igoa ae leai se tuatusi e toe faafoi atu i ai. Sa ou fiafia, ma na fiafia foi isi tamaitai faifeautalai mo au. Sa ou tatalaina afifi, ia na tumu i meaalofa, lole, ata a tamaiti, ma isi mea! Sa le mafai ona taofiofi ou loimata.
“O ai na ono auina mai ia te au nei afifi?” O ou manatunatuga ia. E leai se tasi o i matou na iloaina, ae ma matou olioli uma lava i le agaalofa.
I ni nai aso ina ua mavae le Kerisimasi, ou te lei iloaina lava po o ai na auina mai afifi. O lea na ou valaau atu ai i le ofisa o le misiona ma fesili i le failautusi pe mafai ona ia tau maia ia te au le igoa faalilolilo o le na auina mai afifi. Na ia tau mai ia te au faapea o ni tagata i se uarota o e na mananao ia tumau pea le faalilolilo na filifili e auina mai afifi ia te au faatasi ma ni mea o le Kerisimasi. O le a ou faafetai pea mo le agaalofa o le uarota na auina mai se alofa tele naua i lena Po o le Kerisimasi ma le lagolagosua na ou mauaina i le taimi o lau misiona.
Na ou aoaoina e faapea e mafai e tagata taitoatasi o le Ekalesia ona faia faifeautalai—e ui lava e mamao mai aiga—ia lagonaina o loo i ai i le aiga e ala i la latou uunaiga ma le auaunaga. O se tasi lena o Kerisimasi sili o lou olaga. Na ou auauna atu i le Faaola ma na lagonaina Lona alofa e ala i tagata o Lana Ekalesia.