O Mafuaaga e Valu e Avea ai le Kerisimasi o se Taimi MAOAE e Avea ai ma se Faifeautalai
E i ai se mea e uiga i aso malolo e avea ai le faasoa atu o le talalelei o se mea e sili atu ona lelei!
Ata na tusia e Manu Callejon
E te alofa i au uo. E te fiafia i le talalelei. Ae e te le iloaina lava pe faapefea ona tuu faatasi le lua lea.
Afai e foliga mai lenei mea e pei lava o oe, e te le o tuuatoatasi. E toatele tagata e mananao e faasoa atu le talalelei ia latou uo ae e fefefe e uiga i le avea ma se tagata e faatauanau pe faavalevalea. E mafai ona avea le faasoa atu o le talalelei o se mea faapopole tele.
Ae aua lava le fefe! E tusa lava pe e te lei taua muamua le Ekalesia i se tasi, e mafai ona faatumuina lou vaitau o faigamalologa i le tele o taimi faafaifeautalai masani, faigofie, ma mafai atoatoa lava ona faia. E faapefea?
O le mea muamua lava e fai o le tatalo. Taumafai e fesili atu i le Tama Faalelagi mo avanoa e faasoa atu ai le talalelei. Tatalo ia iloa po o ai e talanoa i ai pe valaaulia ma tatalo mo le lototoa e fai moni ai lava!
O le mea lona lua o le amata loa. Ma amata nei loa. O se mea lilo lenei: O le galuega faafaifeautalai e matuai faigofie lava i le vaitau o le Kerisimasi. Aisea? E i ai a matou mafuaaga e valu.
-
E fiafia uma tagata i se pati manaia.
O avanoa e, atonu o lau uarota po o lou aiga foi o le a fuafuaina se pati o le Kerisimasi. Valaaulia se uo e auai mai i le fiafia! Atonu o le a i ai se pese po o se savali e faatatau uma lava i le Faaola, ma atonu o le mea tonu lena e manaomia e lau uo e faalogo i ai.
-
O le valaaulia o tagata i le lotu i le taimi o le Kerisimasi o se mea e masani tele ai.
E i ai se mea e uiga i le Kerisimasi lena e mananao ai tagata e o i le lotu! O le taimi sili lenei e faailoa atu ai i au uo e taliaina lava i latou e o mai e vaavaai pe faapefea ona tapuai tagata o lau lotu i le Faaola.
-
O meaai mama o le Kerisimasi o se ala sili lea e faia ai se valaaulia po o se savali o le talalelei ia sili atu le suamalie.
Ae faapefea se ipu kuki faatasi ma lau mau e sili ona fiafia i ai? Ae a sina sukalaki ma se upusii e uiga i le Kerisimasi? Ioe, faamolemole!
-
O aiga e matele lava ina faapotopoto faatasi.
O le faaaluina o le taimi faatasi ma aiga o se vaega tele o tu masani o le Kerisimasi, ma e ao ona faigofie lava le talanoa e uiga i lou aiga, o a outou tu masani o aso malolo, ma a outou talitonuga e uiga i aiga.
-
O moli ma le koko o ni mea masani.
Inu le koko pe matamata i teuga o le Kerisimasi faataamilo i le taulaga mo se afiafi faaleaiga po o se gaoioiga o le Mutuale. O gaoioiga o aso fiafia e malie mo tagata uma, ma o se ala sili mo se uo ia vaai ai pe faapefea ona e ola i lau tapuaiga.
-
O Savali Faamamona o le Kerisimasi e matagofie ma faigofie ona faasoa atu.
Tuu le agaga o le Kerisimasi i agafesootai e ala i le faasoa atu o le “A Savior Is Born—Christmas Video”! E toafia au uo i le Facebook o le a fiafia e vaai i se agelu laitiiti o fesoasoani i se teufale faalii i le “The Reason Behind Christmas” po o se tala manaia e uiga i le le manatu faapito i le “The Coat: A Story of Charity”? Sue le LDS.org po o le Mormon Channel mo nei vaega ma isi savali o le Kerisimasi e faasoa atu.
-
O le Kerisimasi o se faamanatuina o le Faaola.
O le tele o Kerisiano o le a sili le taulai atu i le Faaola i le vaitau o le Kerisimasi. E faaopoopo atu i le faasoa atu o manatu faaleauaunaga i aso taitasi, o le a faamamafaina foi e le Mormon.org aoaoga a le Faaola ma auala e “Faamalamalama ai le Lalolagi.” Atonu o le mea sao lava lena o loo sailia e au uo e faamanatu ai Keriso i le Kerisimasi.
-
E tele naua auala e tuuina atu ai ma auauna atu ai i le vaitau o le Kerisimasi!
O le auauna atu o se auala ofoofogia e avea ai o se faifeautalai, ma e tele avanoa e auauna atu ai i isi i le vaitaimi o aso malolo. E mafai ona e asiasi i se falemai o tagata matutua, usu pese o le Kerisimasi i se tuaoi, pe foai atu ni meaai i se nofoaga mo tagata sulufai i le lotoifale. E mafai ona e maua manatu faaleauaunaga mo aso e 25 muamua o Tesema e ala i le asiasi i le Mormon.org.
O le a se mea o loo e faatali i ai?
Ona o le talalelei, ua e iloaina e uiga ia Iesu Keriso ma faamoemoega uma ua Ia aumaia. O se meaalofa ofoofogia lena, ma o se tasi lena o meaalofa e mafai ona e tuuina atu i isi. Afai e te fesili atu ma le faamaoni i le Tama Faalelagi mo avanoa e faasoa atu ai le talalelei, o le a Ia uunaia oe ia iloa po o ai e mafai ona e talanoa atu i ai. O le Kerisimasi o se taimi o le faasoa atu, o le tuuina atu, ma le manatuaina o Iesu Keriso.