O Leo o Le Au Paia o Aso e Gata Ai
Faasoaina Atu o le Alofa o le Faaola i le Kerisimasi
Ata na tusia e Julie Rogers
Sa ou fiafia lava e auai i Ie faalauiloa a le Ekalesia i le 2016 “Faamalamalama le Lalolagi” Sa ou tulimatai atu i le faamaeaina o luitau o aso taitasi, ae maise lava mo le aso lima: “Na fesoasoani Iesu i e mamai, e mafai foi ona e faia.”
O lena aso na ou tuua ai le galuega ae savali atu i le aai lanu efuefu ma se fuafuaga e asiasi atu i ou matua matutua. Sa ou matuai fiafia lava. O le taimi lea o le Kerisimasi ma sa matagofie le lalolagi. Na lologo le tatagi o le logo o le alofa mama i le ea atoa. Ao ou latalata atu i le nofoaga o le taavale o le auala, na taotaomia i lalo le leo o le logo e se fafine e leai se aiga na ee atu i le tagata ta logo.
“E te pepelo!” na ia ee atu ai. “Ua ou fia ai, ua ou maalili, ae ua e aveina uma lava ma oe! E te pepelo!”
O le toatele o tagata na le amanaia o ia, ma na faaauau le taina o le logo a le ta logo. Na ou faamauluina au mea faalogo, ae na ou faalogoina pea le ee a le fafine, “E te pepelo! Ua ou fiaai! Ua ou maalili.”
Na ou manatuaina sa i ai se pepa 20-tala i lau taga. Na ou mafaufau e tuu atu i le fafine. “Leai,” o lou mafaufau lea. “Afai ou te tuuina atu lenei tupe i se tasi, e tatau ona ou tuuina atu i se tasi e lelei.” Ona faamanatu mai lea e le Agaga ia te au le luitau ma po o ai lea ou te taumafai e faataitai i ai. O Iesu o le Tupu o tupu, ae na Ia auauna atu i e e sili ona maualalo i e maualalalo. Sa ou iloaina le mea e tatau ona ou faia.
Sa ou savali agai atu i le fafine. Sa lei ee o ia i le taimi lea, ae o ona mata na moeiini ma na tafe mai loimata i lalo o ona alafau. Na ou aumai le pepa 20-tala mai lau taga ma tuu atu ia te ia.
“Faigata le aso?” Sa ou fesili ai.
Sa ia vaai mai i luga ia te au. “Ioe,” o lana tala lea.
“Ou te faamalie atu,” o lau tala lea. Na ou opo faataamilo ou lima ia te ia, ma na ia tagi i ou tauau seia oo ina taunuu mai le taavale o le auala.
“Faafetai lava,” na fai mai ai le fafine ina ua ma faatofa. “Ae le na o le mo le tupe. Faafetai lava mo le opo. Sa ou manaomia se opo.”
O le opoina o soo se tagata i le auala e le o se mea na ou fuafuaina e fai, ae na ou iloaina o se mea e ono faia e Iesu. Ou te faafetai na tuuina mai e le Alii ia te au le avanoa e auauna atu ai e pei o le mea Na te ono faia. Na fesoasoani Iesu i e mamai, i e matitiva, ma e na manaomia le fesoasoani. E mafai foi ona ou faia.