O Le Talalelei a Iesu Keriso o se MALUTAGA ma se Puipuiga
E alala le tusitala i Curitiba, Pasila.
O aoaoga i le Mataupu Faavae ma Feagaiga e mafai ona puipuia ai i tatou mai faigata o le a tatou feagai ai ao tatou sauniuni mo le Afio Mai Faalua o le Alii.
O lo Tatou Faaola, mai le SuperStock/Getty Images; ata i tua atu saunia e David Clapp/Getty Images
E finagalo le Alii e puipuia Lona nuu. I se vaitaimi o le tele o le sauaga i le Ekalesia, na Ia faamamafaina ai le taua o le faapotopoto i Siona “mo se puipuiga, ma mo se sulufaiga mai le afa” (MF&F 115:6; faaopoopo le faamamafa).
O lenei sulufaiga ma le puipuiga e maua e ala i le ola ai i le talalelei a Iesu Keriso ao tatou “suesue i nei poloaiga” (MF&F 1:37). O le mea lea, sei o tatou iloiloina ni mataupu faavae o loo maua i le Mataupu Faavae ma Feagaiga na, pe a malamalama i ai ma ola ai, o le a aumaia ia i tatou le puipuiga ma o le a avea ma sulufaiga mai i faaosoosoga, mea leaga, ma isi tulaga lamatia o tatou feagai ai i le aso.
E Puipuia i Tatou ao Tatou Sailia le Agaga Paia
O le mauaina o le Agaga Paia faatasi ma i tatou e mafai ona avea o se sulufaiga ma se puipuiga mai le lalolagi. Na folafola mai le Alii e faapea afai o le a “toaga i ai” Oliva Kaotui i le meaalofa o faaaliga, “o le a laveai ai oe i fafo mai lima o ou fili, lea a na le faapea, po ua latou fasioti ia te oe ma aumai lou agaga i le faafanoga” (MF&F 8:4). Ia matauina lena mea e ala i le leo o le Agaga, e mafai ona puipuia Oliva Kaotui mai le oti ma mai le agasala.
O le mauaina o le upumoni e ala i le mana o le Agaga Paia o le a puipuia ai foi i tatou mai manatu o tagata ma pepelo ma taufaasese a Satani. Na folafola mai e le Alii e faapea “o i latou o e e popoto ma ua latou talia le upumoni, ma ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē tatuuina i latou i lalo ma lafo i le afi, ae o le a latou gafatia le aso.” (MF&F 45:57; faaopoopo le faamamafa). E tusia e le mana o le Agaga Paia le upumoni i o tatou loto ma puipuia i tatou mai le faaseseina.
Ae o le faalogo i musumusuga a le Agaga e le faapea o le a puipuia ai i tatou mai faigata uma lava. O loo faaalia mai e le Vaega 122 o le Mataupu Faavae ma Feagaiga e faapea e tusa lava pe agavaa, e mafai lava ona tatou feagai ma faanoanoaga ma luitau. I le silafaga ma le atamai o le Atua, “Ua silafia e le Atua ia mea uma” (MF&F 127:2), “o nei mea uma [tatou] te maua ai le poto masani, ma o le a avea mo [o tatou] lelei” (MF&F 122:7).
E Puipuia i Tatou ao Tatou Mulimuli i Perofeta Soifua
I le aso na faatulaga ai le Ekalesia, na poloaiina ai e le Alii Lana Au Paia e faalogo i le perofeta:
“Ia outou uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i o’u luma;
“Ona o lana [le peresitene o le Ekalesia] upu ia outou talia, e pei lava ua mai i loʼu lava gutu, i le onosai ma le faatuatua atoa.
“Aua o le faia o nei mea o le a le manumalo ai faitotoa o seoli ia te outou; ioe, ma o le a faamataaese e le Alii le Atua le malosi o le pouliuli mai o outou luma, ma luluina le lagi mo lo outou lelei, ma le mamalu o lona suafa” (MF&F 21:4–6).
Ua tau mai e le Alii ia i tatou i le Mataupu Faavae ma Feagaiga e faapea “o i latou o e e lē fia faalogo i le siufofoga o le Alii, po o le leo o ana auauna, pe lē gauai i upu a perofeta ma aposetolo, o le a vavae ese mai totonu o le nuu” (MF&F 1:14; faaopoopo le faamamafa).
O le faalogo ma faaaoga aoaoga a perofeta soifua o le a aumaia le puipuiga ma le saogalemu, aua latou te saunoa i o tatou faafitauli o aso nei ma tau mai ia i tatou mea tatou te manaomia ona fai e manumalo ai i nei luitau. Oka se faamanuiaga ofoofogia o le i ai o ni failauga soifua a le Alii.
I le Mataupu Faavae ma Feagaiga 101:43–62, o loo faaaogaina e le Alii se faataoto e uiga i se tovine e faaalia ai le taua o le faalogo i se perofeta soifua. O loo faatusa e le faataoto le perofeta i se tagatavaai i luga o se olo. I aso anamua na fausia ai e tagata ni olo lea e mafai ai e se tagatavaai ona vaai i tua atu o le aai ma lapataia tagata pe a lata mai le fili.
E amata le faataoto: “Fausia se olo, ina ia mafai e se toatasi ona vaavaai atu i le fanua faataamilo, e avea o se leoleo i luga o le olo, ina ia le gauia i lalo oʼu laau olive pe a sau le fili e faaleaga ma ave mo i latou lava le fua o loʼu tovine” (fuaiupu 45; faaopoopo le faamamafa).
Na aoao mai Elder M. Russell Ballard o le Korama a Aposetolo e Toasefululua e uiga i le puipuiga ma faamanuiaga na e oo mai i le mulimuli i le fautuaga a se perofeta soifua: “O se mea maoae, ou uso e ma tuafafine, le i ai o se perofeta a le Atua faatasi ma i tatou. … Afai tatou te faalogo i le fautuaga a le Alii ua faailoa mai e ala i upu a le Peresitene o le Ekalesia, o la tatou tali e tatau ona sao ma vave. O loo faaalia i le talafaasolopito e faapea, e i ai le saogalemu, filemu, manuia ma le fiafia i le tali atu i fautuaga faaperofeta.”1
E sili atu le taua o le puipuiga faaleagaga nai lo le puipuiga faaletino lena e oo mai i le faalogo i perofeta. E matuai manaomia lava, aua “Ua saili foi Satani e faasese outou, ina ia mafai ona ia faatoilalo outou” (MF&F 50:3). O le faalogo i perofeta e puipuia ai i tatou mai manatu o le lalolagi ma “le taufaasese poto o tagata, lea ua latou taooto faapupuna ai e faasese,” (MF&F 123:12).
E Puipuia i Tatou ao Tatou Faamaoni i Faaipoipoga
Faamatalaga mai Choosing Everything, saunia e Brian Kershisnik, e le mafia ona kopiina; ata i tua atu saunia e Claudio Contreras/naturepl.com/Getty Images
Ua folafola mai e le Alii ia i tatou e faapea o le feagaiga fou ma le faavavau o le faaipoipoga e mafai ona faavavau (tagai i le MF&F 132:19).). O lenei aoaoga faavae o le faaeaga o se sulufaiga mai i sootaga taufaasese lea ua taatele i lo tatou lalolagi. E ui i le tele o leo o le lalolagi o loo faapea mai o le faaipoipoga o se faiga tuai, e le talafeagai pe le manaomia, ua folafola mai e le siufofoga o le Atua, “Ai se na te faasa le faaipoipo ua lē faauuina o ia e le Atua, ona o le faaipoipoga ua faauuina e le Atua mo le tagata” (MF&F 49:15).
Ua aoao mai i tatou e le Alii pe faapefea ona puipuia a tatou faaipoipoga, “Ia e alofa i lau ava ma lou loto atoa, ma ia e pipii atu ia te ia ae lē o se isi” (MF&F 42:22).
Na faamatala mai e Peresitene Spencer W. Kimball (1895–1985) le natura atoa lava o lenei poloaiga:
“Ma a fetalai mai le Alii o lou loto atoa e leai lava ma se faatagaga po o se avanoa e faasoa ai pe vaelua, pe faaogea foi. Ma, i le tamaitai ua faaupuina faapea: ‘Ia e alofa atu i lau tane ma lou loto atoa ma pipi’i atu ia te ia ae le o se isi.’
“O upu ae le o se isi, e tuu ese ai tagata uma ma mea uma. O le toalua la o le faatumutumuga lea o le olaga o le tane po o le ava, ma e le mafai e le olaga tafao po o le olaga faigaluega po o le olaga faaupufai po o se isi mea lava ona suitulaga i luma atu o lau soa, o lou toalua.”2
O mea tatou te vaai i ai e aafia tele ai i tatou mo le lelei po o le leaga. Ou te manatu o le mafuaaga lena ua lapataiina ai i tatou e le Alii i le fuaiupu lenei: “O ia o le e vaai atu i se fafine i le manao ia te ia, o le a faafiti e ia le faatuatua, ma o le a lē maua e ia le Agaga; ma afai e lē salamo o ia o le a tuli o ia i fafo” (MF&F 42:23; faaopoopo le faamamafa).
Ina ia puipuia mai osofaiga a le fili, e tatau ona tosina atu o tatou mata ma loto tau lava o o tatou toalua ma le Alii. E le tatau ona tatou faatagaina o tatou mata e fetilofai pe manao atu i se tasi e ese mai o tatou toalua. Tatou te manaomia ona loka o tatou loto ma mafaufau ina ia puipuia mai lena faaosoosoga. O le fua lenei a le Alii mo le faamanuiaina i le faaipoipoga.
E Puipuia i Tatou ao Tatou Auauna atu i se Misiona
E tele o tatou avanoa e auauna atu ai i le Ekalesia, ma o le Alii “[e] fiafia e faamamalu i latou o e e auauna ia te [Ia]” (MF&F 76:5). O loo aoaoina ni mataupu faavae sili i le Mataupu Faavae ma Feagaiga e uiga i auaunaga faamisiona.
Ua folafola mai le Alii e faapea “Ma o soo se tagata e alu atu ma talai atu lenei talalelei o le malo, ma lē vaivai e tumau pea i le faamaoni i mea uma, o le a lē vaivai i le mafaufau, pe faapouliuligia, pe i le tino, itutino, po o soogaivi; ma o le a lē paʼū se lau o lona ulu i le eleele e aunoa ma le lē iloa. Ma o le a latou lē o fia aai, pe fia feinu” (MF&F 84:80). Ia matauina e le o faasaoina i tatou e le Alii mai faigata ae ua folafola mai o le a tatou i ai i Lana tausiga mamana.
Na Ia faaopoopo mai, ”O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’uagelu, e sapasapai outou i luga” (MF&F 84:88). Afai tatou te auauna atu ia te Ia, ”Ma o le a oo mai o le a tumau le mana i ou luga; o le a ia te oe le faatuatua tele, ma o le a Ou faatasi ma oe, ma muamua atu i ou luma.” (MF&F 39:12). O i latou e auauna atu faamisiona ma o latou loto atoa ua i ai le folafolaga faapea o le a latou “manuia faaleagaga ma faaletino,” (MF&F 14:11).
Ua faalauteleina foi e le Alii lenei puipuiga i aiga o i latou o e auauna atu: “O Aʼu, o le Alii, Ou te tuu atu ia i latou se folafolaga o le a Ou tuu atu mea mo o latou aiga; o le a tatalaina se faitotoa aoga mo i latou, mai le taimi lena i luma” (MF&F 118:3).
Ma ua folafolaina i faifeautalai faamaoni faapea “ma ua faamagaloina oe i au agasala, ma o le a faafafa ia te oe i fusisaito e tele i luga o lou tua,” (MF&F 31:5). O lenei faamanuiaga o se sulufaiga mo o tatou agaga.
E Puipuia i Tatou ao Tatou Usiusitai i le Tulafono o le Sefuluai
Ua tatou maua le aoaoga lenei e faatatau i le sefuluai i le Mataupu Faavae ma Feagaiga: “Faauta, ua taʼua nei o le asō seia oo i le afio mai o le Atalii o le Tagata, ma e moni o se aso o le taulaga, ma o se aso mo le totogiina o le sefuluai e loʼu nuu” (MF&F 64:23).
Ou te fia faapea atu o le tulafono o le sefuluai e faafeagai i le faamatematika aua o le 90 o le a sili atu nai lo le 100. Ao tatou tuuina atu i le Alii le 10 pasene o la tatou tupe maua, ua Ia folafola mai e “toina pupuni o le lagi, ma sasaa atu le manuia mo outou, ina seia silisili ona tele” (Malaki 3:10; tagai foi i le 3 Nifae 24:10).
Ina ia iloiloina pe o le a le malosi o lo tatou faatuatua, e mafai ona tatou vaai i o tatou uiga faaalia i le tulafono o le sefuluai. O le totogiina o le sefuluai e le o se fesili i tupe; o se mataupu tau i le faatuatua.
Ua aoaoina i tatou e Peresitene Henry B. Eyring, le Fesoasoani Muamua i le Au Peresitene, “E ala mai i a tatou filifiliga i le taimi nei, ia avea ma se tagata e totogi atoa le sefuluai, ma a tatou taumafaiga tumau e usitai, o le a faateleina lo tatou faatuatua, ma e i ai le taimi e faamalūlūina ai o tatou loto. O le suiga lena o o tatou loto e ala i le Togiola a Iesu Keriso, e sili atu nai lo le ofoina atu o a tatou tupe po o mea e maua, e mafai ai e le Alii ona folafola mai ia i latou o e totogi atoa sefuluai le puipuiga i le aso gataaga. [tagai MF&F 64:23]. E mafai ona tatou maua le faamautinoaga o le a tatou agavaa mo lena faamanuiaga o le puipuiga pe a tatou tautino nei e totogi atoa le sefuluai ma ia tumau i le faia o lena mea.”3
E Puipuia i Tatou ao Tatou Usiusitai i le Upu o le Poto
Ua tatou ola i se taimi ua lamatia ai lo tatou soifua maloloina e le tele o mea faataumaoi. I le silafia ai e le Alii, o mea ua tatou feagai ai, na aoaoina ai le Perofeta o Iosefa Samita i le 1833 e faapea “Ona o mea leaga atoa ma togafiti ua faia ma o le a tupu pea i loto o tagata faatuputupu leaga i aso e gata ai, ua ou lapataia ai outou, ma muai lapataiina outou, i le tuuina atu ia te outou o le poto lenei i se faaaliga” (MF&F 89:4).
O i latou o e usitai i le tulafono a le Alii mo le soifua maloloina “o le a latou maua le maloloina i o latou pute ma le su i o latou ivi; ma o le a latou maua le poto ma oa silisili o le malamalama, o oa natia lava; ma o le a taufetuli ae le vaivai, ma o le a savavali ae le matapogia [soifua maloloina faaletino].”
Ma ua folafola mai e le Alii le saogalemu ia i latou o e tausia lenei tulafono: “Ma o Aʼu, o le Alii, Ou te tuu atu ia te i latou se folafolaga, e faapea o le a laaloa le agelu o le faafanoga ia te i latou, e pei o le fanauga a Isaraelu, ma lē fasia i latou.” (MF&F 89:18–21).
O lenei folafolaga e le faapea o le a tatou le feoti, aua o le oti o se vaega o le fuafuaga e faavavau. Ae “o le agelu o le faafanoga, o ia lea e sau e faasala i e amioletonu ia latou agasala, e pei o ia i taimi anamua na taia ai tagata Aikupito le faamaoni i la latou amioleaga [tagai Esoto 12:23, 29], o le a laaloa i le Au Paia.”4
E Puipuia i Tatou ao Tatou Tutu i Nofoaga Paia
Ata o le olo mai le Getty Images; Malumalu o Sacramento Kalefonia, saunia e Sandra Rast
Ua poloaiina pea lava pea i tatou e le Alii ia “tutu i nofoaga paia” (tagai MF&F 45:32; 87:8; 101:22). E mautinoa lava o o tatou malumalu o nofoaga paia. Na aoao mai Peresitene Iosefa Filitia Samita (1876-1972):
“Afai tatou te malamalama i le mea ua tatou faia, ona avea lea o le faaeega paia o se puipuiga ia i tatou i o tatou olaga atoa—o se puipuiga e le maua ese tagata e le alu i le mamalu.
“Na ou faalogo i lou tama o [Peresitene Iosefa F. Samita] o fai mai faapea, i le itula o tofotofoga, i le itula o faaosoosoga, na te mafaufau ai i folafolaga, o feagaiga sa ia faia i le Maota o le Alii, sa avea ma puipuiga mo ia.”5
E faatasi ai ma malumalu, o faletatalo ma potuaoga o falelotu o le Ekalesia ma o tatou aiga ua faapaiaina, o ni nofoaga paia. O nei nofoaga e paia pe afai o tagata e faaaogaina e mama i le loto ma ola i poloaiga a le Atua. Pe afai tatou te tausia poloaiga, tatou te olioli i le mafutaga, taitaiga, ma le mafanafana o le Agaga Paia. Afai e mafai ona avea o Ia ma a tatou soa tumau, ona mautinoa lea o le a tatou tutu i nofoaga paia.
Faaiuga
Ua tatou vaai i le Mataupu Faavae ma Feagaiga i ni vaega eseese o puipuiga na e tuuina mai e le talalelei a Iesu Keriso ia i tatou pe a tatou saili e aoao ma ola i nei mataupu faavae. E mafai ona tatou fesili po o fea e maua ai lenei puipuiga.
Na faaalia e le Alii, Lona alofa ma le alofa mutimutivale i le Au Paia, na folafola mai o le a Ia faatasi ma i tatou “Ia fiafia, le fanau iti e; ona ua Ou i ai i lo outou lotolotoi, ma Ou te lei tuulafoaia outou” (MF&F 61:36). “Faalogo mai, … ua fetalai mai ai le Alii lo outou Atua, o Iesu Keriso lava, lo outou fautua, o lē ua silafia vaivaiga o le tagata ma le ala e fesoasoani ai ia i latou o e ua faaosoosoina.” (MF&F 62:1).
Pe a tatou faaaogaina le Togiola ma aoaoga a lo tatou Faaola o Iesu Keriso i o tatou olaga, e mafai ona tatou maua le puipuiga ma le sulufaiga lena e tuuina mai ia i tatou le malosi e faamama ai a tatou avega, faatoilalo a tatou agasala ma faigata, ma faia i tatou ia avea ma Au Paia.