Aoao Atu i le Ala a le Faaola
Siitiaina o a Matou Talanoaga Faaleaiga
O le tusitala o loo auauna atu nei o le peresitene o le Misiona a Pasila Curitiba.
E mafai faapefea ona tatou fesoasoani ia tatou fanau ia sili atu ona toaaga i le aoaoina o le talalelei?
I se taimi ua tuanai, na ma popole ai ma lou toalua e uiga i le mamanu o amioga ua atiina ae i nisi o la ma fanau talavou i le taimi o suesuega faaleaiga, afiafi faaleaiga, e oo lava i a matou talanoaga faafuasei, taitoatasi e faatatau i le talalelei. Sa itiiti so latou tulaga aoaoina—o se auai faaletino, se vaai sao i mata mai lea taimi, ma tali e taitasi upu—ae sa latou le auai i le aoaoina moni lava.
Na ma iloaina ina ia mafai ona latou mauaina ni molimau malolosi ma ia aafia i le liua loloto, ma patino e ala i le mana o le Agaga Paia, na manaomia lo latou faia ia sili atu. E finagao le Faaola i Ona soo ina ia le na ona faalogo i Ana upu—E finagalo o Ia ia latou faatinoina Ana aoaoga ma le faatuatua (tagai Aoao Atu I le Ala a le Faaola [2016], 30).
I se tasi po na ma talanoa atu ia i latou e uiga i o ma lagona. O lo ma faamoemoega o le fefautuaai ma i latou i se talanoaga e taialaina e le Agaga. O la matou talanoaga, e ui i lea, na vave lava ona le manuia ma iu i se lauga e tasi le itu. Na faalogo le ma fanau tama i la ma savali, ae o latou mafaufau ma loto na tumau le maaa.
O lena aafiaga na faapopoleina ai i maua, o lea na ma manatunatu loloto ai ma lou toalua pe faapefea ona ma fesoasoani i le ma fanau ia sili atu le faamaoni ia latou aoaoga o le talalelei, ma uunaia i latou ia gaoioi nai lo le faagaoioia e ala atu i a ma tautalaga ma lauga. O a ma fesili na taitaia i maua e atiina ae se fuafuaga e faaautu i mea na ma aoaoina mai le suesueina o tusitusiga paia, o upu a perofeta soifua, ma isi punaoa a le Ekalesia e faatatau i le aoao atu ma le aoao mai. O la tatou fuafuaga e faitauina faapea:
Taitaia a Tatou Fanau e Saili le Agaga Paia i Talanoaga Faaleaiga
Ia faatupuina le alofa ma le faaaloalo. O le alofa e faamaluluina loto. O upu alofa o le a fesoasoani e saunia a tatou fanau mo le uunaiga a le Agaga Paia. O le a faafaileleina foi lo latou manao ma le naunau ia auai i le aoaoina faamaoni, ma faaleagaga. O le faaaloalo ia tatou fanau e ala i le faalogo i ai ma faatauaina o latou manatu ma lagona o le a fesoasoani ia i latou e lagonaina ua sili atu le saogalemu ma naunau atili ai e faasoa mai mea o loo latou lagonaina.
Aoao atu e ala i le Agaga. O le vaavaaia ma le faaeteete ma faalogo ia tatou fanau o le a saunia i tatou e filifili e ala i le Agaga mea e fai atu, po o a fesili e fai, po o le a le valaaulia e tuuina atu lena mea o le a taitaia i latou e saili le faatosinaga a le Agaga i la latou aoaoina.
Ia taula talanoaga uma i le afioga a le Atua. Ao mafai ona fesoasoani le faasoa atu faatasi o o tatou lava manatu ma lagona e uiga i le talalelei, o mau ma upu a perofeta o aso e gata ai o le a masani ona saunia se sootaga i le Agaga e sili atu le loloto, ma sili atu le mamana (tagai MF&F 84:45).
Ia avea le Faaola o le autu o talanoaga e faatotonugalemu i le talalelei. O le a oo mai se uiga moni ma le mana ia tatou talanoaga ao vaai a tatou fanau pe o faapefea ona fesootai a tatou talanoaga i le Faaola ma Lana Togiola, “o le faavae autu o le aoaoga faaKerisiano” (Boyd K. Packer, “O le Puluvaga,” Ensign, Oke. 1977, 56).
Fai fesili musuia. O fesili aoga o le a taitai atu ai a tatou fanau e maua sao le upumoni ma le malamalama mai tusitusiga paia ma upu a perofeta faatasi ma le fesoasoani a le Agaga. O mea latou te aoaoina i lena ala o le a sili atu le taua ia i latou nai lo a tatou faamatalaga e sili le manino o na lava aoaoga.
Uunaia tagata o le aiga e faia le talanoaga. Pe a faaaoga e a tatou fanau a latou lava upu e faamatala ai mea o loo latou vaaia, mafaufauga, po o lagona, latou te valaaulia le Agaga Paia e fesoasoani ia i latou ia iloa mea e fai atu ma le ala e fai atu ai. O lena faagasologa o le a fesoasoani ia i latou e iloa ai ma malamalama manino atili ai i mea e finagalo le Alii ia i latou e aoao ma lagonaina.
Ia onosai! O le a galue le Agaga Paia ia tatou fanau ao latou suesueina o latou mafaufau ma loto mo le upumoni ma le malamalama. Tatou te manaomia le tetee atu i le faaosoosoga e faamuta la latou suesuega faapuupuu e ala i le osofaia vave atu i manatu patino ma fofo faaletagata lava ia.
Aoao atu i Faataitaiga. O le tauivi e aoao ma ola i le talalelei i le ala lava e tasi tatou te tau atu ia tatou fanau o le a fesoasoani ia i tatou e agavaa ai mo le lagolago ma le taiala a le Agaga ia tatou talanoaga.
Ao tatou taumafai e faaaoga la tatou fuafuaga, ua tatou aoaoina e faapea o le valaaulia o le faatosinaga a le Agaga Paia ia tatou talanoaga faaleaiga o le a manaomia ai le faataitaiga ma le taimi. Ae tatou te mumusu e lotovaivai ma fiu gofie. I se tasi po, na fesili mai ai ma le faamaoni lava le ma tama teine e 10-tausaga le matua, na uunaia e se fuaiupu mai le Tusi a Mamona na matou faitauina o se aiga, “E faapefea ona e aoao e ala i le Agaga Paia?” Sa ou ataata. Na ou iloaina ua matou faia sina alualu i luma!