O Le Malo Faapitoa o le Po o le Kerisimasi
E alala le tusitala i Idaho, ISA.
E masani lava o le po sili lea o le tausaga. O lenei o le a faaleagaina!
“Sing the carols of the Christ child: Let your neighbors know you care” (Children’s Songbook, 51).
E fiafia Clara i tu masani o le Po o le Kerisimasi a lona aiga. Muamua latou te taumafaina ni ia mo le aiga o le afiafi ma kuki o le Kerisimasi mo meaai suamalie. Ona latou asiasi atu lea i le maketi o le Kerisimasi. Pe a latou taunuu atu i le fale, latou te faitauina faatasi le tala o le Kerisimasi mai le Tusi Paia. Ma ao lei o e momoe latou te faaolaina le laau Kerisimasi mo le taimi muamua ma mafai loa ona tatala le meaalofa e tasi a le tagata. O le po sili lea ona fiafia i ai Clara i le tausaga. Sa le mafai ona ia faatali!
Seia oo ina faia e Tina se faaaliga.
“O le a i ai sa tatou malo faapitoa o le Po o le Kerisimasi i lenei tausaga. Manatua Ms. Rainer?”
Sa gugulu Clara. “Le tuaoi lea na valaaulia e Tama i le lotu i le vaiaso talu ai?”
“E sa’o. O lae ua aumai nei e Tama.”
Na faapau ifo Clara i le nofoa. E mafai faapefea ona ia maua se lagona lelei ma fai mea malie ao i ai se tagata ese iina? Ua faaleagaina le Po o le Kerisimasi! Ia, e lei sau Ms. Rainer i le lotu ina ua valaaulia o ia e Tama. Masalo o le a le mafai foi ona sau o ia i lenei taimi.
Ae ina ua ulu mai Tama i le faitotoa, na o mai faatasi ma le “malo faapitoa” Na foliga lelava ma pei e faanoanoa Ms. Rainer. Na faatalofa atu i ai Clara. Ae e lei manao o ia e toe fai se isi tala. I le taimi o le meaai sa na ona ia taulai atu lava i lana meaai ao talatalanoa Tina ma Tama ma Ms. Rainer.
“Pe na e avea muamua ni lesona siva?” na fesili atu ai se leo malu. Na vaai atu Clara o loo faatalitali mai Ms. Rainer mo ia e tali atu. Na lue atu lona ulu ma toe vaai i lalo i lana ipu.
“Ma au foi,” na fai atu ai Ms. Rainer, o loo filemu lava pea lona leo. “O le a lau ituaiga siva e fiafia i ai?”
Na faamimigi tauau o Clara ma tulei solo ana fualaau faisupo i lana ipu.
“Ou te fiafia i le palei,” na fai atu ai Ms. Rainer. “Sa ou i ai i se au siva i le iunivesite. I se tasi tausaga na matou malaga taamilo ai i Europa atoa lava. Sa ofoofogia lava.”
Sa vaai atu i luga Clara. E foliga ofoofogia lena mea.
“O le a le isi mea e te fiafia i ai?”
Sa ataata laitiiti atu Ms. Rainer. “Taina o le piano. Ma le matematika.”
Na faalapopoa mata o Clara. “E mo’i? O le matematika o lau mataupu e fiafia i ai!”
Na talanoa atu Clara ia Ms. Rainer mo le taimi o totoe o le aiga o le afiafi. Na ia iloaina na maua se tikeri i le kolisi i le matematika a Ms. Rainer ma sa aoga ia avea ma polofesa o le matematika ina ua fetaui ma lona toalua. Na ia faia ni filifiliga leaga ma ua i ai nei i le falepuipui.
Ina ua uma le aiga o le afiafi, na i ai pea Clara i tafatafa o Ms. Rainer ao latou savavali faataamilo i le maketi o le Kerisimasi. Ma ao latou faitauina le tala o le Kerisimasi, na ia faasoa atu ana tusitusiga paia ia Ms. Rainer ina ia mafai ona ia mulimuli i le faitauga.
Na vave oo mai le taimi e tatala ai meaalofa. Na maua e Clara ni ofu moe mafanafana lanu viole. Sa le mafai ona ia faatali e faamaulu! Ae na ia lagonaina sina faanoanoa ona e lei maua se meaalofa a Ms. Rainer.
O le taimi lava lea na tuu atu ai e Tina se meaalofa ia Ms. Rainer. Na ataata Ms. Rainer ma le matamuli ma tatala se pea totini lanu moana malosi. Na ia tilotilo atu i luga ia Tina ma mata ua tumu i loimata. “Fa’afetai lava. E te le tau manaomia lava le tuuina mai ia te au o se mea.“
Na alu atu Clara i lona potumoe ma faamaulu lona ofu moe fou. Sa le mafai ona ia taofia le mafaufau ia Ms. Rainer. Na foliga mai sa ia matuai faafetai lava ua maua ni totini mo le Kerisimasi!
Ao faamaulu e Clara ona lava totini vulu, na ia faalogoina se musika matagofie ua amata ona tata mai. Na ia momoe atu i le fogafale i lalo ma maua ai Tina ma Tama o loo pepeseina ni pese o le Kerisimasi ao taina e Ms. Rainer le piano. Na faatasi atu i ai Clara. Ao ia pese, na tupu ae se lagona mafanafana i lona loto. “Ou te matea e le leaga tele lava le i ai o se malo faapitoa i le Po o le Kerisimasi,” na ia mafaufau ai.
I le aso Sa, na sau Ms. Rainer i le lotu ma nonofo faatasi ma le aiga o Clara i le taimi o le sauniga faamanatuga. Na foliga fiafia moni lava o ia. Na ataata Clara ao ia faasoa atu lana tusipese ia Ms. Rainer. Atonu ua oo mai le taimi e faaopoopo ai se tu masani fou o le Po o le Kerisimasi.