O Le Maneta o Pesepesega o le Kerisimasi

E lei iloaina e nei talavou le tele o le fiafia o le a la aumaia i ni nai pese faigofie.

O se pesepesega mo Joaquin

O pesepesega e le o se mea tele i le tu masani o le Kerisimasi a Atenitina. O le mea moni, o le Kerisimasi iinei e ese lava mai le ata o aisa masani atonu e te mafaufau i ai. Ona matou te nonofo i le Itulagi i Saute, o le Kerisimasi ou te mafaufau ai i se ipu salaki fualaau lapoa lava!

O lea, ina ua fautua mai ou matua matou te faataitaia le pesepesega o se aiga, na matou lagonaina ma ou tei se faalogona fefiloi o le le mautonu ma le fiafia. Matou te lei mautinoa a matou tulaga faamusika, o lea na matou filifili ai e faia ma aumaia ni kuki e tuu atu i tagata na matou asia o se mafuaaga e ataata ai, ia tau ane ai.

Sa avea se tamaloa e igoa ia Joaquin o se vaega o la matou uarota i le mea e gata mai ai lou manatua. O lena Tesema na ma’i ai o ia ma na le mafai ai ona toe auai i le sauniga faamanatuga. O lou tama ma tuagane o nisi o i latou na aveina atu le faamanatuga ia te ia i le falemai pe a tuua le lotu i aso Sa.

I le aso Sa ao lumanai le Kerisimasi, na feosofi uma lo matou aiga i totonu o le taavale e asia Joaquin, ma le faamoemoega o le a matou aumaia se agaga mafanafana o le Kerisimasi. Ina ua matou taunuu, na faasino mai e le tamaitai tausimai ia i matou lona moega. Na i ai ana tusitusiga paia ma se tusipese i tafatafa o lona moega, e pei sa ia faatalitalia i matou.

Sa matuai manino lava lona fiafia na matou i ai iina, ma na vave lava ona matou lagonaina uma le alofa mo ia. Na saunia, faamanuiaina, ma tufa atu e ou tuagane le faamanatuga. Sa matou usuina, ae lei tuua o ia le “Sa Iutaia o Leoleo Lelei”: “Ia faamanu i le Alii; ia manuia o lalo nei, manuia lalo nei” (Viiga, nu. 121).

E mautinoa lava o le filemu ma le manuia lena na ulu mai i o matou loto ao ia valaauina i matou o “agelu” ma faafetai mai ia i matou mo le asiasiga, ae pau le mea na matou manaomia o le aumaia o na lagona ia te ia.

Julia G., Buenos Aires, Atenitina

O Le Fale Mulimuli o le Po

O le Po lea o le Kerisimasi, ae ou te lei manao e alu i le pesepesega.

Ae ui i lea, na manatu lou tina o le a avea o se vaega malie pe a feosofi le aiga i totonu o la matou taavale tuai ma tietie atu i lalo o auala aisa o tuaoi e usu ni pese i ni tina e toatolu ua maliliu a latou tane i la matou uarota, ma na fiafia lou tama e lagolago lana fautuaga.

Sa ou lagonaina le lofituina. O ai e fia faalogo ia i matou? O le a ou oti i le ma pe a ou vaaia se tasi ou te iloaina. Na ou tolotolo atu i le nofoa i tua ao tomumu ma faalii, faatasi ma lou tuagane ma lou uso.

O le tietie atu i le fale muamua sa na o ni nai poloka le mamao ese. E lei tali mai se tasi. Na matou tietie atu i le fale lona lua. Na faapena foi, e leai se tali. Na amata ona ou fiafia.

Ao matou agai atu i le alataavale vaapiapi i la matou fale mulimuli, na ou mafaufau, “Faamolemole ia aua nei i ai se tasi i le fale.”

Ua pogisa nei fafo. Ao tuitui ma faatali lou tina, na tumau pea le pogisa o le faapaologa i luma. Lelei. O le a vave lava ona matou oo i le fale, lea o le a mafai ai ona ou sola i totonu o lou potumoe.

Na faafuasei lava le ola mai o le moli o le faapaologa ma matala mai le faitotoa. Sa matuai ou maasiasi lava. Na ou lagonaina le mautinoa ua matou faalavelave ia te ia.

“O mai i totonu, o mai i totonu,” na fai mai ai le fafine laitiiti, paee lava. Na ia faasino atu i lana piano tuai sasao.

“Pe e te ta piano?” na ia fesili atu ai i lou tina. “Sei tatou pepese faataamilo i le piano,”

O lona agalelei ma le fiafia na faamaluluina ai lou loto. Atonu e lei afaina tele lava ia te ia lo matou i ai iina. Ina ua matou usuina ni nai pese na ia ofoina mai loa ia i matou le koko vevela.

“Pe mafai ona e sau e fesoasoani?” na ia fesili mai ai ia te au. Ao ma ulu atu i le umukuka, na ou ofo i le vaaia o se seti laulau matagofie lea na teuteuina faaiila lava mo le Kerisimasi. Sa matuai foliga fiafia lava! I nofoaga ua setiina taitasi sa i ai se tamai, afifi na afifiina ma le faaeteete.

“E mo ai lenei mea?” Sa ou fesili ai. Na ou iloaina sa nofo toatasi o ia.

“Mo ou tuaoi,” na ia faamatala mai ai. “Ou te valaaulia i latou na e pei o au i Kerisimasi taitasi—i latou e leai ni aiga lata mai—e o mai mo se aiga o le taeao o le Kerisimasi ma sina meaalofa itiiti.”

Na fiafia tele lou faiai e 13 tausaga le matua i le manatu. Na faatumuina lou loto malo i le faaaloalo. Oka se matagofie o lenei potu. Oka se matagofie o lenei uso matua saasaa. Oka se matagofie o lou tina i le aumaia o i matou iinei. Sa ou fiafia i le faaiuga.

Na faafetai mai lenei uso ia i matou mo le asiasiga i le lotu i le masina na sosoo ai. Na ia tau mai ia i matou faapea na o matou lava tagata na manatua o ia i lena tausaga. I ni nai masina mulimuli ane, na ia maliu faafuasei lava.

Ou te toe tepa i tua i lena Kerisimasi ma lagona le loto faafetai mo ni matua ofoofogia ma mo lenei uso matua, o i latou taitoatasi ia na mananao e aumaia le olioli o le Kerisimasi i isi.

Brooke K., Iuta, ISA