Savali a Faiaoga Asiasi
Naunau e Tauave Avega a le Tasi
Ia suesue ma le agaga tatalo lenei savali ma saili mo uunaiga ia iloa ai mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?
“Ua siomia i tatou e i latou e manaomia lo tatou gauai atu, la tatou faamalosiau atu, la tatou lagolago, la tatou faamafanafana, lo tatou agalelei,” na saunoa mai ai Peresitene Thomas S. Monson. “O i tatou o lima o le Alii i luga o le fogaeleele, ua i ai le tiutetauave e auauna atu ai ma siitia Ana fanau. O loo faalagolago mai o Ia ia i tatou taitoatasi.”1
Na saunoa mai Peresitene Henry B. Eyring, le Fesoasoani Muamua i le Au Peresitene Sili: “Sa amata se suiga tele i lou loto ina ua e oo mai i totonu o le Ekalesia. Sa e osia se feagaiga, ma e mauaina se folafolaga lea na amata suia ai lou lava natura. …
“… Na e folafola atu o le a e fesoasoani i le Alii ia faamāmāina a latou avega ma ia faamafanafanaina. Ua uma ona tuuina atu ia te oe le mana e fesoasoani ai e faamāmāina na avega pe a e mauaina le meaalofa o le Agaga Paia.”2
”Tatou te mananao ia faaaoga le malamalama o le talalelei e vaai atu ai i isi e pei ona silasila i ai le Faaola—i le agaalofa, faamoemoe, ma le alofa mama,” le saunoa mai a Jean B. Bingham, le Peresitene Aoao o le Aualofa. ”O le a oo mai le aso o le a tatou maua ai se malamalama atoatoa o loto o isi ma o le a faafetai o le a ofo mai ia i tatou le alofa mutimutivale—e pei lava ona tatou ofo atua mafaufauga ma upu o le alofa moni i isi. …
“O la tatou matafaioi ma le avanoa o le taliaina lea o mea ua faaleleia i tagata uma a o tatou tauivi ia avea e pei o lo tatou Faaola.”3
Ao tatou tauaveina avega a le tasi ma tausia a tatou feagaiga, o le a sili atu lo tatou nofouta i le mana faamalolo a Iesu Keriso. Na aoao mai Elder Jeffrey R. Holland o le Korama a Aposetolo e Toasefululua: “Mafaufau i le le mafuatiaina o le tau o le Faasatauroga ma le Togiola, ou te folafola atu ia te outou o le a Ia le fuli mai Lona tua ia i tatou i le taimi nei. Ina ua Ia fetalai atu i e matitiva i la le agaga, “O mai ia te au,” o lona uiga ua Ia silafia le auala i fafo ma ua Ia silafia le auala i luga. Ua Ia silafiaina aua sa savali ai o Ia i le ala. Ua Ia silafia aua o Ia o le ala.”4
Mau Faaopoopo
Faatuatua Aiga Toomaga