O Le Toe Mauaina o Lona Faatuatua
O le ala e toe foi ai e le faigofie i taimi uma, ae o loo i ai lava iina.
O upu “[Pauu] ese atu ai i ala faasaina ma [ua] leiloloa.” (1 Nifae 8:28) atonu e le foliga mai e i ai se faamoemoega tele i le toatele o i tatou ao tatou faitau i ai i le Tusi a Mamona. O le matuai faafeagai a, e moni. E matuai faigofie lava le vaai faalemafaufau i se ituaiga iuga pogisa mo lenei vaega o tagata ua faamatalaina i le faaaliga a Liae i le laau o le ola—le vaega na tofo i le fua ona tuua lea i tua.
Ae o Te Oranoa M., 17 tausaga, mai Niu Sila e ese lona malamalama i ai. “O le mea e uunaia ai au e uiga i lenei mau,” ua fai mai ai o ia, “o le faapea e le o fai mai ua leiloloa i latou e faavavau.”
Oka se vaaiga a maoae! Ma o se vaaiga e sau mai se aafiaga patino. “O au, foi ia, na pau ese mai le Ekalesia,” ua fai mai ai o ia, “ae ua ou mafai ona toe foi mai.”
Mou Ese Atu
Na ola ae Te Oranoa i le Ekalesia ma e talanoa pea e uiga i le mauaina o lana lava molimau ma e oo lava i le setiina o sini faaleagaga. “Ae peitai o lena molimau na faasolo ina maalili,” o lana tala lea.
I nisi auala, sa tutusa ai o ia ma Amoleka, ae maise lava le ala na ia faamatalaina ai o ia lava i tagata o Amonaea: “sa ou faamaaa loʼu loto, ona sa valaauina au i le tele o taimi ae sa ou lē fia faalogo; o lea sa ou iloa e uiga i nei mea, peitai sa ou lē fia iloaina.” (Alema 10:6).
Mo Te Oranoa, sa i ai se uiga patino o lena mau. “E pei lava o Amoleka, na ou iloaina uma nei mea faaleagaga, ma na tau mai e le Agaga ia te au ia faia ni mea faapitoa, ae ona sa fai si ou loto maaa ma fai si faamaualuga, o le a ou le faia. Mulimuli ane, na pei ua mou ese atu lau molimau.”
I le iuga, na sili atu nai lo le na ona masani Te Oranoa i le tala a Amoleka. Na avea foi o se liliuga i le ala i le toe foi mai.
Sailia o se Manatuaga Mafanafana
E oo lava i le taimi na faasolo ai ina vaivai lona faatuatua, sa ia manatuaina pea ni aafiaga matagofie mai le taimi ua tuanai. E le galo lava ia Te Oranoa lona lagona ina ua auai i le malumalu faatasi ma lana vaega talavou po o le o atu i se konafesi a le au talavou.
“Sa i ai se mamanu,” ua ia fai mai ai. “Ou te mauaina se lagona lelei lava pe a ou sau i le lotu, ae ou te lei mauaina se lagona lelei ina ua ou misia le lotu.”
Na iu lava ina oo mai se aso ina ua filifili ai Te Oranoa ia vaai pe mafai ona ia toe fesootai i na lagona lelei. O le mea muamua lava na ia faia o le faitauina lea o lauga o le konafesi aoao talu ai.
O se lauga o le konafesi aoao o Oketopa 2016, “Aoao mai ia Alema ma Amoleka,” na saunia e Peresitene Dieter F. Uchtdorf, le fesoasoani Lua i le Au Peresitene Sili, na toe fagua ai se musumusuga i le agaga o Te Oranoa. Na ia iloaina le tele o lona lava olaga ma lagona e pei ona faamatalaina e Peresitene Uchtdorf pe na faapefea ona mou ese atu le faatuatua o Amoleka. Na sili atu foi le malosi o lona manatuaina nai lo se isi lava taimi o le fiafia na ia olioli ai ao sili atu le malosi o lona faatuatua. O le taimi lava lena, na ia manao ai e fai ni suiga.
“Na ou faamoemoe e saili se mea e toe faamumu ai le afi o lau molimau,” ua ia faamatalaina, “o lea na ou faitauina ai le lauga a Peresitene Uchtdorf, ma ioe, na ou lagonaina le fiafia faaleagaga!”
Faamoemoega mo le Faavavau
E lei faigofie i taimi uma le ala o le toe foi mai o Te Oranoa i le faatuatua, ae e i ai se malamalama faapitoa o le faamoemoe lena na ia faaauau ai pea: o le faamoemoe o se aiga e faavavau.
“E mafai ona faatasi e faavavau aiga,“ ua ia fai mai ai. “O lau miti sili lea, lou faamoemoe sili i le olaga. Soo se taimi lava ou te manao ai e aoao e uiga i se mea, pe ou te iloaina ua faigata se aoaoga faavae ona malamalama i ai, ou te taumafai e faafesootai atu i tua i aiga e faavavau. Mo se faataitaiga, aisea e taua ai le Togiola a Iesu Keriso ia te au? Mo se tasi itu, ou te manaomia Lana Togiola i lou olaga ina ia mafai ai ona ou agavaa e ulufale atu i le malumalu ma ia faamauina i lou aiga mo le faavavau atoa.”
Liliu Atu i le Atua
Atonu e aoga le manatua o tagata i le faaaliga a Liae o e na pauu ese ina ua uma ona tofo i le fua, o le mea moni, na tofo lava i ai. Atonu na latou iloaina lona lelei, e tusa lava pe mo na o sina taimi puupuu lava. Ma e mafai ona latou toe iloaina foi. O le faamoemoe lena na pipii i ai Te Oranoa, mo ia lava ma mo isi foi.
“E te le tau faaauau pea ona alu agai i lalo o na ala faasaina mo le taimi o totoe o lou olaga,” o lana tala lea. “E mafai ona e toe liliu i tua i le Alii i soo se taimi lava e te manao ai.”