Seia Tatou Toe Feiloai
Lototoa i Fuafuaga Faatuina a Keriso
Mai i Aoaoga a Peresitene o le Ekalesia: Iosefa Samita (2011), 378.
E le mafai ona maoae tele lo outou lelei.
O a’u o se e alofa i le fuafuaga faatuina a Keriso faapea ma le loto mama, ola mama, ma se ala tonu ma le sa’o o le amio, ma se savali e paia.
Ou te talitonu i le ola i se olaga mama, amiotonu ma le paia i luma o le Atua ma lagona ai o lo’u tiute le tauanau o tagata uma i lo’u mana ina ia faia le mea lava lea e tasi, ina ia faamuta ai lo latou faia o le leaga ma aoao ai ia faia le lelei, ma lafoai a latou agasala e ala i le amiotonu.
O le faamalosia o lo tatou faatuatua e ala i le faaopoopoina o uiga lelei uma ia e teuteuina le fanau a Iesu faamanuiaina, e mafai ona tatou tatalo i le taimi o tatalo; e tatau ona tatou alolofa i o tatou tuaoi ia pei ona tatou alolofa ia i tatou lava, ma faatuatua i taimi o tofotofoga, ma iloa o le taui o ia mea e silisili i le malo o le lagi. E maeu lea faamafanafanaga! Faauta i se olioli! Ia ou ola i le olaga o e amiotonu, ma ia faapenei lo’u taui! …
I le avea o se tasi e matua naunautai i le faaolataga o tagata, sei ou faamanatu atu ia te outou uma o e tauivi ma le finafinau faaleAtua mo le amio mama, paia, ma poloaiga a le Alii. Ia amiolelei, ia faautauta, ia amiosa’o, ia limafoai; ae silisili ai i na mea uma, ia agaalofa, ma ia fua mai pea i galuega lelei. …
Ia agamalu ma agamaualalo, amiotonu ma mama; ia faafoi atu le lelei mo le leaga. … Ia lotomaualalo ma onosai i laasaga uma o le olaga; ona sili atu ai lea ona mamalu lo tatou manumalo.
Tatou te lagona e tatau ona apoapoai atu i o tatou uso ma le malosi tele, ina ia lotomaualalo ma lototatalo, ina ia savavali ai o fanau o le malamalama ma le ao, ina ia latou maua le alofa tunoa e tetee atu ai i soo se faaosoosoga, ma manumalo ai i mea leaga uma i le suafa lelei o le Alii o Iesu Keriso.
O le manatu e faapea o tagata taitoatasi uma lava e tauia e tusa ma lona lava filiga ma lona sogasoga a o i le tovine, e tatau ona musuia tagata uma o e ua valaauina e avea ma avefeau o nei tala lelei. …
O lo tatou faatuatuaga ua i le Atua, ma ua tatou naunautai, ma fesoasoani ia i tatou Lona alofa tunoa, ina ia faatumauina le fuafuaga faatuina ma tumau i le faamaoni seia oo atu i le iuga, ina ia faapaleina ai i tatou i o tatou pale o le mamalu faaselesitila, ma ulufale atu i le malologa ua saunia mo le fanau a le Atua. …
E le mafai ona maoae tele lo outou lelei. O le onosai e faalelagi, o le usitai e tamalii, o le faamagalo atu e alofa mutimutivale, ma o le faaeaina e faaleatua; ma o le na te tumau i le faamaoni seia oo i le iuga e le maumauina lona taui. O se tagata lelei o le a manumalo i mea uma e faamamaluina ai Keriso.