Ipadan-ag ang Imong Kahayag

Andam nga Motabang!

Hi, ako si Aaron, taga British Columbia, Canada. Naningkamot ko nga mapasanag ang akong kahayag pinaagi sa pagkaandam nga motabang! Kon may butang nga kinahanglang buhaton, andam ko!

Tulo ka Pinulongan

Taga-Hongkong ang akong papa, ug Taga-Guangxi, China ang akong mama. Tulo ka pinulongan ang akong nahibaloan—Cantonese, Mandarin, ug English. Sa akong branch, Cantonese ang among sinultihan ug Mandarin sa sakrament miting, ug magtipon mi sa usa ka English og pinulongan nga branch sa Primary.

Tigtabang sa Hymnbook

Matag Dominggo motabang ko sa mga misyonaryo sa pag-apud-apod sa mga program. Siguraduon nako nga mahatagan ang tanan. Kon dunay walay hymnbook, dad-an nako sila aron makakanta sila.

Ang Paghimo Niini

Usahay duna mi mga kalihokan sa simbahan, ug kanunay kong magpabilin aron motabang og hipus sa mga lingkuranan ug mga lamesa. Kon duna mi program sa Primary sa sakrament miting, ganahan ko nga mosulti sa akong bahin.

Umaabut nga Misyonaryo

Ganahan kaayo ko nga magmisyon ugma damlag. Miingon ang akong magtutudlo sa primary nga pwede na kong magsugod og tigom karon. Mao nga nagtigum na ko og kwarta sa akong pangmisyon nga alkansiya.

Pag-ampo uban ni Lolo

Nasayud ko nga ang pag-ampo importante kaayo. Kon ang akong lolo kauban nako ug sa akong igsoong babaye ug mangadto sa lungsod ang akong mga ginikanan, siguradoon nako nga mag-ampo mi kanunay.

Unsaon Nimo nga Ikaw Mosanag?

• Motabang sa pagbutang o paghipos sa mga lingkuranan sa Primary.

• Mangita og tawo sa simbahan kinsa nagkinahanglan og higala.

• Mopunit sa sagbut.

• Mosiguro nga ang tanan dunay hymnbook.

• Motabang sa imong pamilya aron mahinumdom sa pag-ampo.

Padad-i Kami og Bitoon!

Unsaon nimo sa pagpasanag ang imong kahayag, sama sa gisugo ni Jesus nga atong buhaton? Padad-i kami og litrato sa imong bitoon kauban sa imong istorya, litrato, ug pagtugot sa ginikanan sa [e-mail].