Unsaon nako sa pagkahibalo nga ang akong paghinulsol hingpit na?

Si Elder D. Todd Christofferson sa Korum sa Napulog Duha ka mga Apostoles mitudlo nga “ang paghinulsol nagpasabut og paningkamot nga mausab” ug ang “tinuod nga kausaban mahimong magkinahanglan og balik-balik nga pagsulay.” Miingon usab siya nga “sa atong pagdangup sa Ginoo aron makompleto ang paghinulsol, kinahanglang naglakip kini og wala nay lain pa kondili ang pakigsaad sa pagkamasulundon ngadto Kaniya,” nga anaa sa pakigsaad sa bunyag ug sa sakrament (“Ang Balaanong Gasa sa Paghinulsol,” Liahona, Nob. 2011, 39). Ang hingpit nga paghinulsol nagpasabut usab sa paghulip sa nahimong pagpasakit ngadto sa uban. Agig dugang, miingon ang Ginoo nga ang tawo nga hingpit nga nakahinulsol sa iyang mga sala “mokumpisal [niini] ug mobiya [niini]” (D&P 58:43). Kinahanglang ikumpisal nimo ang tanang sala ngadto sa Langitnong Amahan ug ang grabing mga sala ngadto sa imong bishop usab. (Kon naa sa pagduhaduha, pakig-istoryahi ang bishop. Anaa siya sa pagtabang.)

Human sa paghimo niining mga butanga, ang paagi aron imong mahibaloan kon nahingpit na ba ang imong paghinulsol mao ang pagsusi ug pagbatyag sa mga epekto sa paghinulsol—kausaban sa imong mga tinguha, pagbati, panagway, mga relasyon, ug kinaiya. Ug, labaw sa tanan, ang paghinulsol nga hingpit magdala sa pakig-uban sa Espiritu Santo.