Si Jesus Mao ang Kristo: Ang Pagpamatuod sa mga Propeta sa Ulahing mga Adlaw
Mga Paghulagway pinaagi ni Jim Madsen
Midapit ang Ginoong si Jesukristo, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako” (D&P 19:23). Abi ninyo, kini nga bersikulo mao ang kasulatan nga Tema sa Mutual karong tuiga. Nakahunahuna na ba mo kon unsaon ninyo sa pagkat-on ug pagpaminaw sa Iyang mga pulong?
Usa ka paagi nga makakat-on kita mahitungod Kaniya mao ang mga Presidente sa Simbahan; isip mga propeta sa ulahing mga adlaw kinsa gitawag nga espesyal nga mga saksi ni Kristo, mipamatuod sila, ug padayon nga mopamatuod, sa kabalaan sa premortal, mortal, ug kinabuhi human sa kamatayon nga mga tahas sa Manluluwas sa mahangturong plano sa Langitnong Amahan.
Premortal nga Kinabuhi
“Kita nasayud nga ang kaluwasan mahitabo pinaagi ni Kristo; nga siya ang Kinamagulangang Anak sa Amahan sa Kahangturan; nga siya ang napili ug naordinahan nang daan sa konseho sa langit nga mopahigayon sa walay kinutuban ug mahangturon nga Pag-ula; nga siya ipakatawo sa kalibutan isip Anak sa Dios; ug siya ang naghatag og kinabuhi ug imortalidad dinhi sa kalibutan pinaagi sa ebanghelyo.”1
Presidente Joseph Fielding Smith (1876–1972), ika-10 nga Presidente sa Simbahan
“Ang Anak sa Dios … adunay gahum sa pagbuhat sa mga kalibutan, sa pagmando kanila. Mianhi siya dinhi isip ang Bugtong Anak sa pagtuman sa usa ka misyon, … sa pagpahinabo sa kaluwasan sa tanang mga katawhan. Pinaagi sa paghatag sa Iyang kinabuhi Iyang giablihan ang pultahan sa pagkabanhaw ug mitudlo sa paagi diin kita makabaton og kinabuhing dayon.”2
Presidente Harold B. Lee (1899–1973), ika-11 nga Presidente sa Simbahan
“Si Jesukristo mao gihapon kaniadto ug sa karon ang Ginoong Dios nga Makagagahum. (Tan-awa sa Mosiah 3:5.) Gipili na Siya sa wala pa Siya matawo. Siya ang makagagahum sa tanan nga Tiglalang sa mga langit ug sa yuta. Siya ang tinubdan sa kinabuhi ug kahayag sa tanang butang.”3
Presidente Ezra Taft Benson (1899–1994), ika-13 nga Presidente sa Simbahan
Mortal nga Kinabuhi
“Ang tumong sa misyon ni Kristo sa yuta mao ang paghalad sa iyang kaugalingon isip usa ka sakripisyo sa pagtubos sa katawhan gikan sa mahangturong kamatayon. …
“Walay laing tawo nga adunay gahum sa pagluwas sa mga kalag sa mga tawo ug mohatag kanila og kinabuhing dayon, gawas ni Ginoong Jesukristo, ubos sa sugo sa Iyang Amahan.”4
Presidente Wilford Woodruff (1807–98), ikaupat nga Presidente sa Simbahan
“Si Jesus mao ang Manunubos sa kalibutan, ang Manluluwas sa katawhan. …
“Siya mianhi aron sa pagtudlo kanato sa kinaiya sa Dios, ug pinaagi sa panig-ingnan ug pinaagi sa lagda mitudlo sa dalan diin kon kita maglakaw niana, modala kanato balik ngadto Kaniya. Siya mianhi aron sa pagbugto sa higot sa kamatayon nga naghigot sa tawo, ug mihatag og dalan alang sa pagkabanhaw nga mibuntog sa kadaugan sa lubnganan ug sa kapait sa kamatayon.”5
Presidente Heber J. Grant (1856–1945), ikapito nga Presidente sa Simbahan
“Giimpluwensyahan ni Jesukristo ang pagkatawhanon labaw pa kay ni bisan kinsa nga nabuhi . …
“… Giayo Niya ang masakiton, gibalik ang panan-aw sa buta, mipalayas sa dautang mga espiritu, gibalik ang kinabuhi sa namatay, mihupay sa dinaugdaog, misangyaw sa maayong mga balita sa ebanghelyo sa paghigugma, mipamatuod sa Amahan, mitudlo sa mahangturong plano sa kaluwasan, ug gipahimutang ang buluhaton sa usa ka organisasyon nga mohatag og kaluwasan alang sa kaluwasan sa tawo—nga Iyang Simbahan.”6
Presidente Spencer W. Kimball (1895–1985), ika-12 nga Presidente sa Simbahan
Postmortal [Human sa mortal] nga Kinabuhi
“Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon pag-usab sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon sumpay lamang niini.”7
Presidente Joseph Smith (1805–44), unang Presidente sa Simbahan
“Siya mibuntog sa kamatayon, impyerno ug ang lubnganan, ug mibarog nga madaugon isip Anak sa Dios, ang Amahan sa kahangturan, ang Mesiyas, ang Prinsipe sa kalinaw, ang Manunubos, ang Manluluwas sa kalibutan. … Siya nagmadaugon sa tanan, ug sa kahangturan mikayab ngadto sa tuong kamot sa Dios.”8
Presidente John Taylor (1808–87), ikatulong Presidente sa Simbahan
“Akong ihatag ang balaan nakong pagsaksi ug mapasalamatong mosaksi nga si Jesus mao ang Kristo, ang Manluluwas sa kalibutan. Sigurado gayud nga Siya ang sentro sa atong pagsimba ug ang yawe sa atong kalipay. Sundon nato ang Anak sa Dios sa tanang paagi ug sa tanang aspeto sa atong kinabuhi. Ato siyang himoon nga atong ehemplo ug atong giya.”9
Presidente Howard W. Hunter (1907–95), ika-14 nga Presidente sa Simbahan
“Dili igo ang akong pagpasalamat alang sa Pag-ula nga gihimo sa Manluluwas ug akong Manunubos. Pinaagi sa Iyang sakripisyo sa katapusan sa Iyang kinabuhi sa pagkahingpit—kadto nga sakripisyo nga gihalad uban sa dili matukib nga kapait—nabugto ang mga higot sa kamatayon, ug ang pagkabanhaw sa tanan nahimong sigurado. Lapas niini, ang mga pultahan sa celestial nga himaya naabli para sa tanang modawat sa balaanong kamatuoran ug motuman sa mga lagda niini.”10
Presidente Gordon B. Hinckley (1910–2008), ika-15 nga Presidente sa Simbahan