Ang mga Visiting Teacher mga Representate sa Dios

Ni Alice C. Smith

Mahitungod ni Sister Smith

Si Alice Colton Smith (1913–2006) migradwar sa Columbia University niadtong 1934. Siya ug ang Iyang bana, si Whitney, namalhin sa Logan, Utah, USA, niadtong 1946 aron moeskwela sa Utah State University, diin nakakuha og master’s degree sa sociology ug dayon nahimo siyang sakop sa faculty. Isip assistant nga propesor, nagtudlo siya hangtud sa tunga-tunga sa mga tuig sa 1970, dihang ni-resign siya aron madugangan ang iyang pagtutok sa iyang pagserbisyo sa general board sa Relief Society. Gitawag si Sister Smith nga moserbisyo sa general board sa Relief Society niadtong 1964, nga nagserbisyo sulod sa 14 ka tuig. Gidala niya ang lahi nga kaalam ug intelektwal nga panglantaw sa board.

Gikan sa tuig 1960 hangtud sa 1963, nagpuyo ang mga Smith sa Vienna, Austria, diin gitawag sila nga i-establisar ang unang misyon sa mga Santos sa Ulahing mga Adlaw diin naa sa Austria ang ulohang buhatan.

Gihatag ni Alice Smith kini nga pakigpulong niadtong Oktubre 1969 sa sesyon sa mga opisyales sa kinatibuk-ang komperensya sa Relief Society; ang punctuation ug pag-capital gi-standadize.

Dihang gisaka ni Jesus ang uga nga kabungturan sa Galilea o gibaktas ang abugon nga kadalanan sa Judea, nakita Niya ang kakabus, mga sakit, mga balatian sa tanang matang. Nakakita siya sa mahinulsulong makasasala ug sa dili mahinusulon. Natagboan niya ang nanag-antus. Ug gumikan niini nga mga kasinatian ug sa lapad Niyang panabut miabut ang manggiloy-on Niya nga pagdapit, “Umari ka kanako.”

Niadtong 1830, mipahayag si Propeta Joseph Smith nga ang Dios mao “gihapon ang dili mabalhinon nga Dios” [D&P 20:17]. Mao nga, dili ikatingala nga niadtong Hulyo 28, 1843, 16 ka babaye ang napili “nga mangita sa kabus ug sa nanag-antus … aron mahupay ang panginahanglan sa tanan.”¹ Dise-sayis dinhi sa kalibutan nga dunay minilyon. Apan kinahanglang dunay sinugdanan. Niadtong 1843, dunay 16 ka visiting teacher; karon [1969], dunay kapin sa 100,000; ugma 200,000; sa adlaw human ugma duha ka milyon.

Pipila ka semanang milabay, nakahimamat ko og buotan nakong higala. Aktibo na siya sa Relief Society sulod sa daghang katuigan. … Gipangutana nako siya kumusta na siya sa Simbahan karon. Mabantayan ang iyang paghilom. Dayon, mitubag siya, “Oh, visiting teacher ra man ko.” Visiting teacher ra! Dihang nagbulag na mi, naghunahuna ko, unsa kahay iyang bation kon ang Manluluwas … moingon kaniya, “gusto ko nga mahimo ka nakong representante. Gusto kong sultihan ninyo ang mga kababayen-an nga [inyong bisitahan] nga gihigugma nako sila, nga naghunahuna ko kon unsa ang mahitabo kanila ug sa ilang mga pamilya. Gusto kong kamo ang akong katabang, sa pagbantay niini nga mga sister, sa pag-atiman kanila aron maayo ra ang tanan sa akong gingharian.” Kon magkita kaha mi human sa ingon niana nga miting, lahi na kaha ang iyang tubag? Dili ba Siya mitawag kaniya pinaagi sa Iyang priesthood sama kasigurado nga nagbarug Siya sa iyang presensya?

Pila kaha sa atong mga visiting teacher ang naghunahuna sa ilang kaugalingon nga “visiting teacher ra man ko”?

Ngadto sa visiting teacher gihatag ang dakong responsibilidad sa pagpangita niadtong nanginahanglan. Dugang pa, sultihan niya ang tanang sister nga iyang bisitahan nga may tawo nga naghunahuna ug ang Dios naghunahuna.

… Dili angay nga siya ang tawo nga magdali-dali sa katapusang adlaw sa bulan nga, “may pipila ra ko ka minutos—nasayud ko nga nabasa na ninyo ang mensahe ug mas nakahibalo mo niini kay nako, ug bisan pa wala mo magkinahanglan niini. Kumusta ka, ug magkita ta sa Relief Society sa sunod semana.” Kinahanglan nga ang visiting teacher magbilin kaniya og gugma nga mopanalangin sa gibisitahan nga sister ug sa iyang panimalay. …

… Matag semana samtang mag-uswag ang Simbahan, magtubo ang panginahanglan og mga visiting teacher. … Motabang sila sa pagpakigbugno sa kamingaw nga midagsang sa kalibutan ug kawalay pagtagdanay sa kasagaran sa dagkong mga siyudad. Sila ang mangita sa mga langyaw, sa mga biyuda, sa walay mga ginikanan, sa mga samaran, ug sa nangaluya, buot ipasabut mga sister nga mahunahunaon, mapinanggaong pag-amuma. … Motabang sila nga mahupay ang pisikal, emosyunal, ug mental nga pag-antus. Tabangan nila ang makasasala ug hupayon ang nanagsubo. Dad-on nila ang mensahe sa gugma sa ebanghelyo ngadto sa atong mga sister sa tibuok kalibutan. …

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan” [Mateo 11:28–30].

Panalanginan sa Dios ang mga visiting teacher. Kay kon molihok ang tanan, masayon ang yugo ug magaan ang palas-anon.

… Akong pag-ampo nga unta magpadayon kini. Amen.