Gikalimtan ba Kaha Ko sa Dios?
Edwin F. Smith
Utah, USA
Paghulagway pinaagi ni Allen Garns
Nangita ko bisan asa. Kaduha ko nagbalik-balik gikan sa opisina ngadto sa luna nga trabahoanan sa fabrication nangita sa importanting mga pisa nga gikinahanglan aron makompleto ang crane nga among ikarga sa barko sa usa ka instalasyon para sa militar. Nakaiskedyul na ang paglarga duha na lang ka adlaw—igo ra gyud nga matuman namo ang tagal sa kontrata. Magsagubang gyud og grabing silot ang akong kompanya kon dili namo matuman ang among pasalig.
Misulod ko sa storeroom sa opisina ug gibalik na usab sa pagsusi ang kulang nga mga pisa. Gisusi nako ang tanang kahon ug nakumpirma nga na-order na gyud ang mga pisa. Ulahi na kaayo kon mag-order og usab sa mga pisa unya moabut na ang tagal. Nawad-an ko sa paglaum. Mipauli ko, padayong naghunahuna unsaon sa pagsulbad ang problema.
Mihimo ko og dali ug dili kaayo kinasingkasing nga pag-ampo sa wala pa mohigda ug naningkamot nga makatulog. Sa akong hunahuna akong gisubay og maayo ang akong tanang gibuhat nianang adlawa, nanghinaot nga akong mahinumduman ang butang nga akong nakalimtan. Wala kaayo ko makatulog hangtud alas 3:00 sa buntag.
Sa katapusan milingkod ko. Gitan-aw nako ang unlan nga akong gibutang sa salog aron mapahinumduman ko sa pag-ampo. Morag di ko ganahang mag-ampo. Tibuok adlaw na kong nag-ampo apan mibati nga tanan nakong gisulti walay nahimong kalainan. Gikalimtan ba kaha ko sa Dios?
Wala nay laing maadtoan, midailos ko sa higdaanan ug nagsugod sa pag-ampo. Nangutana ko sa Langitnong Amahan kon nasayud ba Siya sa akong sitwasyon. “Langitnong Amahan,” nangamuyo ko, “Nasayud Ikaw kon asa ang mga kulang nga pisa. Mahimo bang pahibaloon usab ko Nimo—karon?”
Nianang pagkabuntag, miadto ko sa akong opisina. Gipahimutang ang akong briefcase sa akong lamesa ug mibati nga kinahanglan nakong susihon ang storeroom sa katapusang higayon. Misulod ko sa storeroom ug gitan-aw og balik ang mga kahon nga natan-aw na nako sa miaging adlaw. Usa ka dakong kahon ang natumong sa akong panan-aw. Morag lahi ra kining tan-awon.
Sa pagpaduol og tan-aw nakita nga dili kini usa ra ka kahon kondili duha ka kahon nga gitaput. Gialsa nako ang ibabaw nga kahon gikan sa usa nga diha sa ilawom. Sa ilawom nga kahon, akong nakita ang mga pisa! Militok ko og pag-ampo sa pasalamat ug mibalik sa akong opisina aron ipahibalo sa mga trabahante nga nakit-an na ang mga kulang nga pisa.
Sa kalit, akong naamguhan nga dili lang ang mga pisa ang akong nakit-an, apan nadiskubrihan pud nako nga ang Langitnong Amahan nahibalo kon asa na ko ug nga ako importante para Kaniya. Wala makalimot kanako ang Dios, ug Siya dili gayud.