Mga Pagpamalandong
Pagsubang sa adlaw
Ang tagsulat nagpuyo sa Idaho, USA.
Kini nga kinabuhi dili maoy katapusan; dunay daghang katahum ug kalipay nga moabut.
Imahe gikan sa Getty Images
Ang kabuntagon sa tingtugnaw tin-aw ug mabugnaw sa mga oras sa kaadlawon samtang gisugdan nako ang buntagon nga mga buluhaton sa akong dairy farm. Bug-at ang akong panghunahuna dihang gipamalandungan nako ang mga nanghitabo sa milabayng semana. Ang trahedya miigo sa gamay namong walog. Usa ka dugay na nakong higala sa high school, kauban sa iyang anak nga lalaki, iyang tin-edyer nga anak nga babaye, ug tulo sa iyang mga higala namatay tungod sa grabing pagkadisgrasya sa sakyanan. Ang akong mga anak dugay nang mga higala sa mga babaye nga naapil sa aksidente. Ang among pamilya, ug daghan pang uban, migahin sa semana sa pagbangutan tungod niini nga trahedya kauban sa mga pamilya nga hingtungdan. Katulo na mi makatambong sa serbisyo nianang semanaha ug motambong pa mi sa katapusang serbisyo, alang sa amahan ug sa iyang duha ka anak, karon.
Nagsagubang ko og duha ka dagkong pangutana dihang akong nasugdan sa pagkasabut ang unsay nahitabo.
Una, nagsubo ko ug naghunahuna nganong kini nga batan-ong mga bata kuhaon man sa dili pa nila makasinati og daghan nga ikatanyag sa kinabuhi. Dili na sila motubo, maminyo, makamisyon, makapanganak, ug makasinati og daghang kalipay sa mortal nga kinabuhi.
Ikaduha, bisan og mibati ko nga kami isip komunidad gusto kaayong motanyag og kahupayan sa mga pamilya, daw wala kami mahimo, walay paningkamot nga motandog sa ilang kasubo.
Samtang nagtrabaho ko, nasurprisa ko sa usa ka pagbisita sa ugangan sa akong higala nga namatay. Isip isig ka tig-ranso, diin ang trabaho walay hunong, kinahanglan dayon siyang makapalit og baka. Human nahimo ang transaksyon, nag-istorya mi og kadiyot kon kumusta ang iyang pamilya. Gipadayag nako sa iyaha ang akong panghinaot nga unta mas daghan ko og mahimo para nila. Gibati nakong walay ikatabang aron maminusan ang ilang kasakit. Apan nakadayeg ko sa iyang kakalma ug daw malinawon bisan sa nahitabo sa gisinati sa iyang pamilya.
Sa kalit akong naamguhan nga ang tubag sa usa sa akong mga pangutana anaa ra diay. Nagsige lang ko og kabalaka unsaon sa paghupay sa nagsubo nakong higala, nakalimot nga ang tinuod nga kahupayan ug kalinaw naggikan diay sa Espiritu Santo. Kini nga pamilya napanalanginan og dugang nga sukod niana nga kahupayan gikan sa Langitnong Amahan nga Siya lamang ang makahatag. Nasayud ko nga padayon silang nakadawat og kahupayan sa Ginoo, nga gisulti diha sa Basahon ni Mormon:
“Siya mohupay kaninyo sa inyong mga kasakit, ug siya mohangyo alang sa inyong katuyoan …
“O tanan kamo nga mga putli og kasingkasing, ipataas ang inyong mga ulo ug dawata ang makapahimuot nga pulong sa Dios, ug pagbusog sa iyang gugma; kay kamo makahimo, kon ang inyong mga hunahuna malig-on, sa kahangturan” (Jacob 3:1–2).
Dihang nanamilit na kami, migawas ko sa kamalig ug nakamatikud sa daktol nga nagkasawop sa kasadpang kapunaw-punawan. Matahum kadto nga talan-awon. Dayon milingi ko ug nakita ang nagsubang nga adlaw gikan sa sidlakan. Daw ang tibuok kapunaw-punawan lagsik nga gidayan-dayanan sa mga kolor. Matahum ang nagkasawop nga bulan; ang adlaw labihan kaanindot sa iyang pagsubang. Samtang mihunong ko sa makadiyot mahitungod niini nga pagtandi, akong nahunahuna nga bisan unsa pa katahum ug kamalipayon ang atong hunahuna bahin sa mortal nga kinabuhi, dili kini ikatugbang sa kalipay nga nagpaabut sa unahan kon magmatinud-anon kita ug magmasulundon. Akong naamguhan nga kadtong nangamatay wala mawad-i bisan unsa. Nagmaisugon sila sa ilang kinabuhi sa kalibutan ug mosinati pa og mas daghang kasinatian ug kalipay.
Wala madugay nianang adlawa, mitambong ko sa katapusang serbisyo kuyog sa akong pamilya. Nag-abut kami nianang adlawa sa puno kaayong tabernakulo, tinuoray nga nagsubwak sa mga tawo tungod sa suporta sa tibuok komunidad. Nianang adlawa ug sa mga panahon human niana, ang katawhan sa among walog nakasinati og espesyal nga kalinaw. Ang mga ginikanan migunit sa ilang mga anak og mas hugot ug among naamguhan nga ang among kinabuhi sa yuta mubo ra ug kinahanglan nga ipadayag namo nga mas kanunay ang among gugma sa pamilya ug mga higala. Napahinumduman ko sa gugma sa Ginoo para kanato ug sa katahum sa plano sa kaluwasan. Kini nga kinabuhi dili maoy katapusan; dunay daghang katahum ug kalipay nga moabut.