Ang biyahe latas sa Karaang Tabernakulo
Sama sa modernong mga templo, ang simbolismo sa tabernakulo makatudlo kanato mahitungod sa atong panaw balik sa presensya sa Dios.
Sulod sa liboan nga katuigan, ang mga templo mao ang dapit diin ang Dios mogamit sa mga ordinansa sa priesthood ug sa sagradong mga pakigsaad aron matudlo ngadto sa Iyang mga anak ang mahitungod sa Iyang plano sa kaluwasan.
Atol sa ilang mga pagbiyahe sa kamingawan, ang katawhan sa Israel gisugo sa pagtukod og tabernakulo aron ang Dios “magapuyo taliwala kanila” (Exodo 29:46). “Ang tabernakulo sa literal nagpasabut nga ‘dapit nga pagapuy-an’ ug gitawag kini nga ingon niini sa pagtuo nga ang Dios sa literal nagpuyo sulod sa mga utlanan niining sagrado nga dapit. Dihang nagkampo ang Israel, gipahiluna ang tabernakulo sa sentro gayud sa kampo (nagsimbolo sa ideya nga ang Dios mao ang sentro sa kinabuhi sa iyang katawhan).”1
Ikonsiderar kini nga mga item nga anaa sa tabernakulo kon unsay ikatudlo niini kanato mahitungod sa atong pagbalik sa presensya sa Dios.
MGA PAGHULAGWAY PINAAGI NI STEVE CREITZ / LISENSYA GIKAN SA GOODSALT.COM
Tabernakulo: Ang tabernakulo gilangkuban og tulo ka dibisyon diin ang tawo moagi aron makaabut sa presensya sa Dios: ang gawas nga tugkaran, dapit nga balaan, ug ang Dapit nga Labing Balaan (tan-awa sa Exodo 25–30).
Halaran [Altar]: Ang balaod ni Moises nagpresentar sa mga sakripisyo nga ihalad dinhi, nga nagtagna sa Manluluwas ug sa Iyang “mahinungdanon ug katapusan nga sakripisyo” (tan-awa sa Alma 34:10). Ang sakripisyo magsimbolo usab sa atong paghinulsol—paghunong sa atong mga sala ug paghalad og masulub-on nga kasingkasing ug mahinulsulon nga espiritu (tan-awa sa 3 Nephi 9:19–20; Giya ngadto sa mga Kasulatan, “Sakripisyo”).
Palanggana nga may tubig: Sa dili pa mosulod sa balaang dapit, ang mga pari mogamit sa bronse nga palanggana nga may tubig aron paghugas sa ilang mga kamot ug tiil (tan-awa sa Exodo 30:19–21), nga magpahinumdom kanato sa atong panginahanglan nga magmalimpyo samtang mangandam kita sa pagbalik sa presensya sa Ginoo (tan-awa sa 3 Nephi 27:19–20).
Ugbukanan sa kandila: Ang pito ka lampara nga sugnuran og lunsay nga lana sa oliba, maghatag og kahayag sa balaang dapit (tan-awa sa Levitico 24:2–4). Magpahinumdom kini kanato sa Kahayag ni Kristo ug sa Espiritu Santo, ang mga tinubdan sa espirituhanong kahayag.
Tinapay-nga-Gipahamutang-sa-Atubangan sa Dios: Ang dose ka hiwa sa walay pangpatubo nga tinapay gipahimutang kada Igpapahulay ibabaw sa lamesa sa Tinapay-nga-Gipahamutang-sa-Atubangan sa Dios, usa ka pulong nga nagpasabut “tinapay sa atubangan” sa Hebreohanon (tan-awa sa Exodo 25:30). Ang mga tinapay pagakaunon sulod sa balaang dapit sa matag Igpapahulay nga “usa ka tugon nga walay katapusan” (tan-awa sa Levitico 24:5–9).
Halaran sa Incienso: Ang mga pari mosunog og incienso matag buntag ug gabii sa altar nga ipahimutang atubangan sa tabil. Ang mosaka nga aso magrepresentar sa mga pag-ampo nga mosaka sa langit (tan-awa sa Pinadayag 5:8).
Tabil: Ang labawng sacerdote mosulod sa Dapit nga Labing Balaan lahus sa usa ka tabil. Querubin, o mga anghel, giburda sa tabil (tan-awa sa Exodo 26:31–33; D&P 132:19). Ang tabil magpahinumdom kanato nga samtang kita karon gitabilan gikan sa presensya sa Dios, ang Labaw nga Sacerdote [high priest]—si Jesukristo—moabli sa tabil.
Dapit nga Labing Balaan: Ang labaw nga sacerdote mosulod niining pinakasagradong dapit sa tabernakulo kausa sa usa ka tuig, sa Adlaw sa Pag-ula. Ang Dapit nga Labing Balaan nagrepresentar sa presensya sa Dios ug naglangkob sa arka sa pakigsaad, ang taklob niini gitawag nga halaran sa pagpasig-uli. “Ug didto ako makigtagbo kanimo, ang Ginoo miingon kang Moises “ug ako makigsulti kanimo” (Exodo 25:22; tan-awa usab sa Exodo 29:43; 30:36).2