Ang Pagtisok og mga Binhi sa Ebanghelyo sa Kasingkasing sa akong Mama
Ang tagsulat nagpuyo sa Utah, USA.
Gibuhat nako ang tanan nga akong mahunahunaan aron makatudlo ni mama mahitungod sa Simbahan, apan ang open house sa templo ang mihimo sa tanang kalainan.
Imahe gikan sa Getty Images
Mipasakop ko sa Simbahan sa 14 anyos pa ko. Gitugutan ko sa akong mga ginikanan nga mabunyagan, apan walay usa kanila ang may interes nga magpasakop o gani sa pagkat-on mahitungod sa Simbahan.
Sulod sa kapin sa 10 ka tuig, akong pangandoy sa akong pamilya nga mahibalo sa kalipay nga akong gibati sa gipahiuli nga ebanghelyo ni Jesukristo, apan atol niana nga mga dekada, misimba ko, nakadawat sa akong endowment, ug nagserbisyo og ful-time nga misyon nga walay suporta sa akong pamilya.
Dihang miuli ko sa Mexico human sa akong misyon sa Temple Square sa Salt Lake City, Utah, USA, mipuyo ko kauban sa akong mama. (Nagdiborsyo ang akong mga ginikanan sa nag-high school pa ko.) Nagsugod ko sa pagtrabaho sa Mexico Missionary Training Center, mao nga abtik kong midapit kaniya sa pakighimamat sa mga elder ug sister nga akong gitudloan. Klaro kaayo (ug usahay mas labaw pa) nga dapiton nako ang mga misyonaryo nga nagserbisyo sa akong ward para ikauban ang akong mama ug ako sa panihapon. Gibuhat nako ang tanan aron lang ikauban niya ang mga misyonaryo, sa panghinaot nga mangutana siya mahitungod sa ebanghelyo, apan daw walay kahimoan ang akong mga paningkamot.
Sa akong tan-aw nakatagbo na niya ang matag paris nga misyonaryo nga akong gikauban atol sa tulo ka tuig nga panahon, ug wala gihapoy nahitabo.
Niadtong 2008, mibalhin ko sa Estados Unidos aron ipadayon ang akong degree sa nursing. Sa nagkaduol na ang katapusan sa tuig, human sa dako nga pagpausab sa Mexico Templo sa Mexico City gipahigayon ang usa ka open house. Gihangyo nako ang akong mama nga moadto ug motan-aw kon unsa ang templo samtang duna siya niini nga oportunidad. Human sa gihimo nakong daghan nga pag-awhag, miuyon ra siya nga mobiyahe og 70-ka milyas (113 km) nga biyahe aron motambong sa open house.
Dihang nakigsulti ko niya pagkahuman, misulti siya sa kahinam mahitungod sa iyang nasinati. Giingnan ko niya nga nagplano siya nga mobalik. Gani, nakabalik siya sa daghang higayon atol sa nahibiling semana sa open house. Mitambong pa gyud siya sa cultural celebration sa wala pa ang pagpahinungod sa templo.*
Sa pagkasunod nga pag-istorya namo sa telepono, gisultihan ko ni Mama nga dapiton niya ang mga misyonaryo nga motudlo niya. Daw ingon og sa walay rason, nagpangutana na siya ug gihimo ang mga butang nga akong gipangandoy sa dugay nang panahon. Dihang miuli ko atol sa Kapaskohan sa bakasyon sa eskwela, akong namatikdan nga lahi na siya. Daan man siya nga buotan ug manggiloy-on, dunay dakong kausaban diha kaniya—ang pagkakabig.
Mibalik ko sa eskwela nga natingala sa mga nanghitabo. Usa ka semana ang milabay, nanawag si Mama ug miingon, “Sonia, gusto lang kong mahibalo kon kanus-a ka mouli sa Mexico, kay bunyaganan na ko.”
Hilabihan ang akong kahinam, malipayon kaayo! Mipauli ko pagka-Pebrero para sa iyang bunyag. Makatingala kaayo para nako ang pagtan-aw niya nga mosimba, makita nga modawat ug moserbisyo og calling, ug molambo sa ebanghelyo. Nasayud kong nahibalo siya nga tinuod kini.
Pagkaanindot nga mamati niya nga mag-ampo. Natandog kaayo ko nga nakapaminaw niyang mag-ampo para nako ug nga luwas ako sa wala pa ko mobalik sa Estados Unidos. Walay ikapahisama sa usa ka pag-ampo sa ginikanan para sa anak.
Nganong wa man dayon kini mahitabo? Wala ko kahibalo. Tingali nagkinahanglan nga matisok pa sa kinabuhi sa akong mama ang binhi sa dili pa niya madawat ang ebanghelyo. Tingali ang templo mitandog kaniya sa paagi sa panahon nga wala mahimo sa una nakong mga paningkamot. Ang pagkakita sa buhat sa Ginoo sa kinabuhi sa akong mama nagpahinumdom kanako sa mga panahon nga akong nakita ang Iyang kamot sa kaugalingon nakong kinabuhi, ug naghatag kini kanako og dakong paglaom kon unsay pwede Niyang buhaton sa kinabuhi sa uban pa nakong mga kasakop sa pamilya.
Nasayud ko nga ang Ginoo nakaila kanato ug naggiya Siya sa atong kinabuhi. Dihang gitugutan nako Siya nga mogiya sa akong kinabuhi, mapahimutang ako sa eksaktong mga dapit. Kon sundon nako ang kaugalingon nakong kabubut-on, modangat kini og dugay ug sa kadaghanan mas lisud. Mas palabihon nako nga ang Ginoo mosurprisa kanako ug mopakita kanako unsa katalagsaong mga butang ang Iyang giandam.