Mga Baruganan sa Visiting Teaching

Mag-ampo nga Litukon ang Ngalan sa Matag Sister

Ang atong gugma ug inspirasyon bahin sa atong bisitahan motubo kon mapaubsanon kitang mag-ampo para sa matag sister nga litukon ang ilang pangalan.

Usa ka sister misaysay nga atol sa usa ka lisud nga panahon sa iyang kinabuhi, ang tawag sa telepono o yano nga text message sa kasagaran moabut gikan sa iyang mga visiting teacher “ilabi na sa lisud nga mga panahon.” Mura og nahibalo sila sa panahon gayud nga kinahanglan kong madasig. Nahibalo siya nga sila nag-ampo alang niya, atol sa ilang pagbisita ug samtang sila anaa sa ilaha.

Mipaambit ang mga kasulatan og daghang ehemplo bahin sa mga lalaki ug mga babaye nga nag-ampo nga gilitok ang pangalan para sa uban. Apil sa pinakamahinuklugon mao ang amahan ni Alma nga Batan-on. Gisultihan si Alma nga Batan-on sa anghel, giingnan siya nga ang iyang amahan “nag-ampo uban ang hugot nga pagtuo mahitungod kanimo … ; busa, tungod niini nga katuyoan ako ania aron sa pagdani kanimo sa gahum ug pagtugot sa Dios, nga ang mga pag-ampo sa iyang mga sulugoon unta matubag sumala sa ilang hugot nga pagtuo” (Mosiah 27:14).

Ang pag-ampo alang sa usag usa moabli sa atong kasingkasing aron madawat ang mga panalangin nga maoy tinguha sa Ginoo nga ihatag kanato. “Ang tumong sa pag-ampo dili mao ang pag-usab sa kabubut-on sa Dios apan ang pagsiguro sa atong mga kaugalingon ug sa uban sa mga panalangin nga ang Dios andam nang mohatag, apan gihimong kondisyonal sa atong pagpangayo niini.”¹

“Hunahunaa ang atong gitipon nga kalig-on kon ang matag sister adunay sinsero nga pag-ampo matag buntag ug gabii gani, mas maayo pa, mag-ampo sa walay paghunong ingon nga gisugo sa Ginoo,” miingon si Julie B. Beck, kanhi Kinatibuk-ang Presidente sa Relief Society.² Ang pag-ampo para niadtong atong i-visiting teaching makalig-on kanato nga mga indibidwal ug isip mga Santos sa Ulahing Adlaw nga kababayen-an.

Si Presidente Henry B. Eyring, Unang Magtatambag sa Unang Kapangulohan, miingon: “Mag-ampo mo aron mahibalo sa ilang pagbati. … Kinahanglan mong masayud unsay gustong ipabuhat sa Dios sa pagtabang nila ug sa paghimo niining tanan, kutob sa inyong mahimo, nga mobati sa gugma sa Dios para kanila.”³

Pagtuo, Pamilya, Kahupayan

Mubo nga mga Sulat

1. Giya sa mga Kasulatan, “Pag-ampo.”

2. Julie B. Beck, “Unsay Labing Maayo nga Mahimo sa Santos sa Ulahing mga Adlaw nga Babaye: Barug nga Lig-on ug Dili Matarug,” Liahona, Nob. 2007, 110.

3. Henry B. Eyring, “Ang Priesthood ug ang Personal nga Pag-ampo,” Liahona, Mayo 2015, 86.

Ikonsiderar Kini

Unsa ang bag-o lang inspirasyon ug mga ideya ang miabut kanimo samtang nag-ampo ka para sa tinagsa nga mga sister nga imong gi-visit teach?

Pangalagad

Kay sa maghatag og piho nga mensahe, kini nga pahina mo-feature og lain-laing baruganan matag bulan aron pagtabang kanato nga mangalagad sa usag usa sa mas epektibong paagi. Samtang kamo mag-ampo ug mangayo og inspirasyon, mahibaloan ninyo ang spiritwal nga mensahe ug pagserbisyo nga gikinahanglan sa matag sister.