Atong Luna

“Nalipay ko nga Imo kong Gidapit”

Paghulagway pinaagi ni Alyssa Petersen

Sa una nakong pakig-date ni Nate, nasurprisa ko nga dili diay siya Santos sa Ulahing Adlaw. Buotan kaayo siya, apan sa akong pag-uli, dili ko sigurado kon makig-date pa ko niya og usab.

Pagkasunod semana, nanawag si Nate sa pagsusi kong gusto ba kong mogawas sa gabii sa Bag-ong Tuig. “Pasayloa ko, Nate,” miingon ko. “Dominggo kana sa gabii, ug ang akong pamilya ug ako nagtan-aw sa broadcast gikan sa Unang Kapangulohan.” Misantop dayon nako ang inspirasyon ug midugang, “Welcome ra ka nga motan-aw uban namo kon ganahan ka.” Nakalitan ko nga miingon siyag oo.

Kusog kaayo ang Espiritu nga akong gibati dihang giawhag kami sa propeta sa paghimo og resolusyon nga maoy makapaduol kanamo kang Kristo. Gipaminaw og maayo ni Nate ang matag pulong. Human nga mipauli na siya, gibati nako ang kakalma ug kamalinawon. Pagkasunod buntag, nanawag siya nako.

“Gusto kong magpasalamat nimo, sa imong pagdapit nako kagabii,” miingon siya. “Ang tanan nakong higala dunay party, dili ko gustong moadto kay nahibalo kong dunay mga ngil-ad nga butang nga himoon. Nalipay ko nga gidapit ko nimo. Nindot kaayo ang akong gibati.”

Gibati nako ang Espiritu nga nagsulti nako nga nagbuhat ko og husto nga butang. Ang pagkamahigalaon nakatabang ni Nate nga mobati sa mga panalangin sa matarung nga pagpakabuhi. Nahibalo ko nga naghunahuna ang Dios kanatong tanan ug sa kanunay himoon Niya nga kita makapili sa matarung.

Rachel H., Texas, USA

Nasaag sa Tijuana

Usa kadto ka tuig, mibiyahe ang among pamilya sa Tijuana, Mexico, sa pagbisita sa pipila ka mga miyembro didto ug magbilin og pipila ka supply sa mission home. Apan dihang nakatabok na mi sa utlanan sa California, USA, ug sa Mexico, nangasaag mi. Walay usa namo ang dunay cellphone, mao nga walay paagi nga makakontak mi og tawo aron matabangan.

Sa katapusan, misugyot ang akong igsoong babaye nga mohunong mi ug mag-ampo. Mipiyong mi ug giduko ang among mga ulo samtang nag-ampo siya. Dihang nahuman siya, gibuka nako ang akong mga mata ug ang una nakong nakita mao ang taxi nga dunay sticker outline—sa San Diego California Temple! Misinggit ko, “Ang templo!”

Usa sa akong igsoon dali dayong migawas ug midagan padulong sa taxi, nga mihunong sa traffic. Nag-istorya sila og kadali ug midagan dayon og balik ug gisultihan siya nga magsunod lang mi niya. Nagsunod mi samtang nagliko-liko ug nag likay-likay sa traffic ug sa mga dalan sa Tijuana hangtud nakaabut mi sa mission home.

Kini nga kasinatian milig-on sa akong pagpamatuod nga buhi ang Langitnong Amahan ug nagbantay kanamo. Ang matinud-anong pag-ampo sa tibuok pamilya mao ang kinanindutang pagbati, ug ang Dios sa tinuod mitubag sa among mga pag-ampo.

Corbin D., California, USA

Nahuman na ba gyud ang Akong Family History?

Gusto gyud kong motabang sa akong family history, apan ang akong amahan duna nay pito ka henerasyon sa iyang family tree, ug ang tanang mga ordinansa sa templo nakompleto na. Sulod sa 11 ka tuig wala na siyay makit-ang impormasyon mahitungod sa iyang pamilya. Nawagtang ang akong tinguha ug paglaum. Miingon ko sa akong kaugalingon uban ang kasagmuyo, “Nahuman na ang akong family history. Asa pa man ko mangita og mga ngalan aron madala sa templo?”

Nakahukom kong motan-aw sa tanang impormasyon nga gihimo sa akong amahan sa Iyang FamilySearch tree ug ang tingog misulti nako nga duna pay daghang buhatunon. Nagsugod ko sa pag-search og impormasyon sa tanan pinaagi sa internet. Nakakita ko og daghang tawo nga akong kaapilyedo, apan dili ko makakita sa akong relasyon niining mga tawhana.

Dihang nahutdan ko sa pagluam, nakahukom kong magpuasa dungan sa akong mama aron molampus sa among family history. Pagkasunod Dominggo sa buntag samtang nangandam mi sa pagsimba, gibuhat nako ang naandan nakong pag-search sa internet, ug sa kalit nakit-an nako ang page nga dunay impormasyon nga sukad wa pa nako makita. Usa kadto ka milagro!

Pinaagi sa tabang sa bag-ong impormasyon, ako, sa edad nga 14, nakadala og 400 ka mga ngalan sa pamilya ngadto sa templo. Malipayon kaayo ko. Ang paborito nakong bahin mao ang pagpaambit niadtong mga ngalan ngadto sa kabatan-onan ug makita ang ilang kalipay nga dunay daghang kard sa ilang mga kamot.

Mopamatuod ko nga talagsaon ug kahibulungan kini nga buhat. Kon maghimo kita sa family history, tabangan kita sa Espiritu nga molampus ug matandog ang atong kasingkasing.

Guillermo T., Chile