Ang Pulong sa Dios Ngadto sa Iyang mga Anak

Ni Presidente Dieter F. Uchtdorf

Ikaduhang Magtatambag sa Unang Kapangulohan

Gisultihan kita sa mga kasulatan nga ang unang butang nga gihimo sa Dios human sa paglalang sa lalaki ug babaye mao ang pagpakig-istorya kanila.¹ May importante Siyang impormasyon ug bililhong mga instruksyon nga ihatag kanila. Ang Iyang tuyo dili aron mabudlay o mabalaka sila apan sa paggiya kanila ngadto sa kalipay ug mahangturong himaya.

Ug kadto sinugdanan lamang. Sukad niadtong adlawa, padayon ang Ginoo sa pagpakigsulti sa Iyang mga anak. Napreserbar ang Iyang mga pulong, nga gibahandi, ug gitun-an sa iyang mga disipulo sa tanang henerasyon. Gitahud kini niadtong nagtinguha nga masayud sa kabubut-on sa Dios, ug nagsaksi kini sa kamatuoran nga “ang Ginoong Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna.”²

Mao na kini ang sundanan sukad pa sa sinugdanan sa panahon, ug ang sundanan nagpadayon karon. Dili lang kini usa ka maanindot nga sugilanon sa Biblia; estabilisado kini nga pamaagi sa Dios sa pagsulti sa importanting mga mensahe ngadto sa Iyang mga anak. Mopatubo siya og mga tawo gikan sa atong taliwala, tawagon sila nga mahimong mga propeta, ug mohatag kanila og mga pulong nga isulti, diin kita gidapit nga “[mo]dawat, ingon og gikan sa [Iyang] kaugalingon nga ba-ba.”³ Mipahayag ang Manluluwas nga, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”⁴

Usa kini sa labing mahimayaon, makadasig, ug malaumong mga mensahe sa Pagpahiuli—wala magpakahilum ang Dios! Gihigugma Niya ang Iyang mga anak. Wala kita Niya pasagdi nga maglatagaw ra sa kangitngit.

Kaduha matag tuig, sa Abril ug sa Oktubre may oportunidad kita nga makapaminaw sa tingog sa Ginoo pinaagi sa Iyang mga sulugoon sa talagsaon nato nga mga kinatibuk-ang komperensya.

Akong ihatag kaninyo ang personal nakong pagsaksi nga sa layo pa kaayong panahon, sa dili pa moadto sa podium ang usa ka mamumulong sa kinatibuk-ang komperensya, migahin na siya og labihang paningkamot, pag-ampo, ug pagtuon agig tubag sa assignment nga mamulong. Ang mensahe sa matag komperensya nagrepresentar og dili maihap nga oras sa pagpangandam ug kinasingkasing nga pangaliyupo aron mahibaloan unsay gitinguha sa Ginoo nga madunggan sa Iyang mga Santos.

Unsa kahay mahitabo kon kitang mga tigpaminaw motugbang sa paghimo’g preparasyon sa atong kaugalingon? Sa unsang paagi kaha lahi ang atong paghangop sa kinatibuk-ang komperensya kon gitan-aw nato ang komperensya nga usa ka oportunidad aron makadawat og mga mensahe gikan sa Ginoo mismo? Pinaagi sa mga pulong ug musika sa kinatibuk-ang komperensya, makalaum kita nga makadawat og personal nga mga tubag sa bisan unsang pangutana o problema nga atong gisagubang.

Kon may pagduha-duha kamo kon ang Langitnong Amahan makigsuti ba gayud kaha kaninyo, pahinumduman ko kamo sa yano apan mahinungdanong mga pulong nga gikanta sa atong mga bata sa Primary: “[Kamo] anak sa Dios, ug gipadala [kamo] dinhi.” Tuyo Niya ang pagtabang nga makabalik kamo “sa pagpuyo uban niya sa umaabut.”

Kon moduol kamo sa Langitnong Amahan isip Iyang anak, pwede kang mangutana Kaniya inubanan sa sinserong kasingkasing, “Giyahi ko, ubani ko, asa moadto. Unsay buhaton.” Mamulong Siya kaninyo pinaagi sa Iyang Balaang Espiritu, ug kamo ra ang magbuot sa “pagbuhat sa iyang kabubut-on.” Mosaad ko nga kon buhaton ninyo, ang “grasya gitagana.”⁵

Ang giya sa Ginoo gikinahanglan karon nga mas labaw kay sa milabayng kasaysayan sa kalibutan. Samtang mangandam kita sa pagpaminaw sa pulong sa Ginoo, magmakugihon kita sa pagpangita sa Espiritu sa kamatuoran aron kon ang Ginoo mamulong pinaagi sa Iyang mga sulugoon, makasabut kita, malig-on, ug magmalipayon.⁶

Mopamatuod ko nga “pinaagi sa pagbuhat niini nga mga butang ang mga ganghaan sa impyerno dili makabuntog batok [kanato]; oo, ug ang Ginoong Dios mopatibulaag sa mga gahum sa kangitngit gikan sa [atong] atubangan, ug mohimo sa mga langit sa pagkurog alang sa [atong] kaayohan, ug himaya sa iyang ngalan.”⁷

Ang Pagtulun-an gikan Niini nga Mensahe

Atol sa kinatibuk-ang komperensya makadawat kita og personal nga mga tubag sa atong mga pangutana ug mga problema kon paminawon nato ang mga pinili nga sulugoon sa Dios. Ikonsiderar ang paghisgut sa mosunod ngadto sa imong mga gitudloan: Sa unsang paagiha makapangandam ka sa pagdawat og sama nianang mga tubag atol sa kinatibuk-ang komperensya? Giawhag kita ni Presidente Uchtdorf nga “magmakugihon sa pagpangita sa Espiritu sa kamatuoran.” Unsa kaha ang buot ipasabut niana, ug unsaon ninyo sa pag-apil niini sa inyong pagpangandam? Agig dugang sa mga panalangin nga gihisgutan sa Doktrina ug mga Pakigsaad 21:6, unsa nga mga panalangin ang moabut pa kon mangandam kamo sa pagpaminaw sa mga pulong sa Ginoo pinaagi sa Iyang mga sulugoon? Pwede nimong dapiton kadtong imong mga gitudloan nga isulat sa journal ang unsay gitudlo sa Espiritu kanila niini nga komperensya.