Hugot nga Pagtuo, Paglaum, ug Grasya, Part 2
Usa ka Natubag nga Pag-ampo
Ang tagsulat nagpuyo sa New Jersey, USA.
Si Grace usa ka 11 anyos nga batang babaye nga nagpuyo didto sa Holland atol sa Ikaduhang Gubat sa Kalibutan. Ang iyang amahan gidakop isip piniriso sa gubat [prisoner of war].
Human gidakop si Papa, si Mama ang nag-atiman ni Grace, sa iyang duha ka igsoong lalaki, ug duha sa ilang mga ig-agaw. Dunay daghang ba-ba nga pakan-unon ug walay igong pagkaon alang sa tanan. Ang ilang pamilya nakadawat lamang og gamayng harina, mga utanon, ug mga patatas.
Usa ka adlaw mibagting ang doorbell. Misunod si Grace kang Mama aron makita kon si kinsa kadto. Sa dihang giablihan ni Mama ang pultahan, didto sa may pultahan nagbarug ang usa ka batan-ong opisyal sa Nazi. Ang kasingkasing ni Grace misugod sa pagpitik og paspas, ug gipugngan niya ang iyang pagginhawa. Unsa may iyang gusto?
“Pila man ka tawo ang nagpuyo niining balaya?” nangutana siya sa paos nga tingog.
“Ako, akong tulo ka anak, ug akong duha ka pag-umangkong lalaki,” miingon si Mama.
“Wala ang imong bana dinhi?” nangutana ang opisyal.
“Wala,” mitubag si Mama. “Gidakop siya.”
Gilibut og tan-aw sa opisyal ang balay. “Duna ka bay radyo? Dili mi gustong maminaw mo sa mga programa gikan sa among mga kaaway sa England ug Amerika.”
Gikuha ni Mama ang radyo ug gihatag kini sa opisyal.
“Dako kini nga balay,” miingon siya, nga milibut na usab og tan-aw. “Dako ra kaayo alang sa pipila lang ka tawo nga nagpuyo dinhi. Kinahanglan mong mobiya ugma. Kami na ang magdumala niining balaya.” Dali siyang mitalikod ug milakaw.
Dili makatuo si Grace sa unsay iyang nadungog. Gitan-aw niya ang mga mata ni Mama nga misiga sa kakurat. Dayon gisira ni Mama ang pultahan ug midiretso ngadto sa likod sa balay.
Hinay-hinay nga misunod si Grace sa luyo, nga paspas nga mipitik ang iyang kasingkasing. Mobalik ba gyud ang sundalo ug kuhaon ang ilang balay, sama sa pagkuha niya sa ilang radyo? Unsa man ang ilang buhaton? Asa man sila moadto? Unsaon man pagkahibalo ni Papa kon asa sila pangitaon pag-usab?
Mihunong si Grace sa gawas sa pultahan ni Mama ug mili-li sa sulod. Nagluhod si Mama, nga nag-ampo. Hilum nga mibalik si Grace ngadto sa sala hangtud nakabalik si Mama.
“Oh, Mama, unsa may atong buhaton?” nangutana si Grace.
Nanghupaw si Mama. “Ang ato ra gayung mabuhat mao ang pag-ampo ug pagsalig sa Ginoo nga Iya kitang protektahan.”
Ang batan-ong opisyal sa Nazi wala mobalik pagkasunod adlaw o sa sunod. Wala na gayud siya mobalik! Napabilin ni Grace ug sa iyang pamilya ang ilang balay.
Nasayud si Grace nga ang Dios mitabang sa iyang pamilya. Bisan kon ang gubat wala pa mahuman, nagbantay pa gihapon Siya kanila.
May sumpay pa …