Ang Gubat alang sa Inyong Kabubut-on
Ang inyong kabubut-on angay lang nga panalipdan.
Litrato gikan sa Getty Images
Ang pagtuman sa mga sugo sa Dios nagdala og kagawasan. Ngadto sa tawo nga wala makaangkon og pagpamatuod bahin niana nga kamatuoran, ang maong pamahayag mahimong makapalibug. Kay, kon ang usa sa inyong mga silingan moduol ug mohatag kaninyo og usa ka lista sa mga butang nga angayan ninyong buhaton (o dili mabuhat), morag makapaminus kana sa personal nga kagawasan.
Hinoon, ang pagtuman sa mga sugo sa Dios tinuod gayud nga makapahimo ninyong gawasnon—gawasnon gikan sa negatibong mga sangputanan sa sala ug gawasnon sa pagtagamtam sa mga panalangin nga moabut tungod sa pagkamatarung.
Apan, ang pagsupak sa mga sugo sa Dios, moresulta sa pagkaulipon. Usa ka paagi sa paghunahuna bahin sa pagkaulipon mao ang pagkawala sa kabubut-on. Lisud ang paghimo og daghang kapilian alang sa inyong kinabuhi kon anaa kamo sa pagkaulipon.
Nasayud kita gikan sa mga kasulatan nga si Satanas “nagtinguha sa paglaglag sa kabubut-on sa tawo” (Moises 4:3) didto sa premortal nga kinabuhi. Nasayud usab kita nga wala siya makadaug niana nga gubat ug nga kamo anaa sa nagmadaugon nga habig!
Ang makalipat nga bahin mao nga si Satanas nagpadayon gihapon sa pagkuha sa inyong kabubut-on. Pero ayaw kahadlok. Madaug usab ninyo kini nga gubat.
Pagpakabuhi diha sa Pagkaulipon
Diha sa Basahon ni Mormon, si Jesus nagtudlo, “Kamo kinahanglan magbantay ug mag-ampo sa kanunay, tingali unya og kamo matintal sa yawa, ug kamo mabihag ug mahimo nga ulipon kaniya” (3 Nephi 18:15).
Ang maulipon sa yawa makalilisang paminawon! Pero kon maghunahuna kamo sa maong kapalaran, lagmit ba kamong maghunahuna kasagaran kalabut sa katapusang paghukom? Sa pagkatinuod dunay lain pang matang niini nga pagkaulipon. Ug kasagaran medyo maliputon kini.
Si Elder Quentin L. Cook sa Korum sa Napulog Duha ka mga Apostoles nagtudlo, “Ang mga tawo mahigut o maulipon dili lamang ngadto sa makadaut, makaadik nga drugas apan ngadto usab sa makadaut, makaadik nga mga pilosopiya nga makaguba sa matarung nga pagpuyo” (“Mga Lamentaciones ni Jeremias: Pagbantay sa Pagkaulipon,” Okt. 2013 nga kinatibuk-ang komperensya).
Ang maulipon sa makaadik nga mga butang sama sa drugas o nicotine sayon ra masabtan. Pero unsa kaha kon maulipon sa gawi sa pagpamakak? Pinaagi lamang sa usa ka pagpamakak, sayon ra nga malit-ag sa kaugalingon ninyong binuhatan.
Unsa kaha kon maulipon sa pagkadaling masuko o usa ka gawi sa pagpanglibak?
O sa yano ra nga dili paghimo sa inadlaw nga mga buhat sa pagkamatarung (pag-ampo, pagtuon sa kasulatan, ubp.) nga gipangayo sa Dios gikan kanato? Moresulta ba usab kana sa pagkawala sa kabubut-on?
Oo, moresulta kini. Ania ang usa ka paagi sa paghunahuna niana. Unsa ang mahitabo sa mga atleta o mga musikero kon hingpit silang mohunong sa pagpraktis? Tubag: sa dili madugay mawad-an sila sa abilidad nga modula sa ilang pinakamaayo. Samtang morag dili kana sama sa pagkawala sa kabubut-on, tinuod gayud kana. Ang atleta o musikero nga mapakyas sa pagtrabaho sa ilang kahanas dili na makahimo og daghang kapilian kon unsaon paggamit niana nga kahanas. Pinaagi sa pagpaminus sa ilang mga abilidad, mas minus na karon ang ilang mahimo kay sa kaniadto. Ang ilang mga opsyon makuhaan.
Sa samang paagi, sa tinuod lang dili kamo makahimo sa inyong pinakamaayo kon wala ang pakig-uban sa Espiritu Santo. Nagkinahanglan kamo sa Iyang tabang kada adlaw gayud. Usa kini sa labing mahinungdanong mga gasa nga inyong malauman nga madawat niining kinabuhia, ug ang inadlaw nga matarung nga pagpuyo mao ang paagi sa pag-angkon niana nga gasa.
Pagpangita sa Tinuod nga Kagawasan
Si Apostol Pablo nagtudlo, “Busa kinahanglan managbarug kamo nga malig-on, ug ayaw na kamo pagpasangon pag-usab sa yugo sa pagkaulipon” (Mga Taga-Galacia 5:1). Diha sa Basahon ni Mormon, si Haring Benjamin nagtudlo, “Ug ubos niini nga ngalan kamo mahimo nga gawasnon, ug wala nay lain nga ngalan diin kamo mahimo nga gawasnon. Wala nay lain nga ngalan nga gikahatag diin ang kaluwasan moabut; busa, ako manghinaut nga kamo kinahanglan modala diha kaninyo sa ngalan ni Kristo” (Mosiah 5:8).
Ang tinuod nga kagawasan nagagikan sa pagsunod kang Kristo. Busa pilia nga mahimong gawasnon!