Mga Istorya sa Kasulatan
Si Elijah ug ang Biyuda
Gikan sa 1 Mga Hari 17.
Usa ka propeta nga ginganlan og Elijah mipasidaan sa katawhan nga dunay mahitabo nga kagutom. Dili moulan, ug dili motubo ang mga tanom. Atol sa kagutom, miinom og tubig si Elijah gikan sa sapa. Ang Dios mipadala og mga langgam aron dad-an siya og pagkaon. Apan ninghubas ang sapa. Gisultihan sa Dios si Elijah nga pangitaon ang usa ka babaye sa lungsod, ug siya mopakaon kaniya.
Nakit-an ni Elijah ang babaye nga nangahoy aron isugnod. Nangayo si Elijah kaniya og makaon. Miingon ang babaye nga duna lamang siyay gamay nga harina ug lana nga nahabilin aron makaon niya ug sa iyang anak nga lalaki.
Misaad ang propeta nga kon mopaambit siya sa iyang pagkaon ngadto niya, dili siya mahutdan. Ang biyuda dunay hugot nga pagtuo kang propeta Elijah ug mipaambit sa iyang pagkaon.
Kada adlaw, dunay igo nga pagkaon nga ilang makaon. Usa kadto ka milagro! Dayon ang anak nga lalaki sa biyuda nasakit ug namatay, apan gibuhi siya pagbalik ni Elijah. Napanalanginan ang babaye tungod sa pagpaminaw sa propeta.
Mapanalanginan ko kon maminaw ko sa propeta.