Atong Luna
Ang Husto nga Tubag nga Giisip nga Sayop
Mga paghulagway pinaagi ni Matthew Shipley
Sa dihang mi-enrol ko sa klase sa philosophy sa high school, medyo nabalaka ang akong papa. Sa philosophy, ang tanan kwestyunon, lakip na ang pagka-anaay Dios. Ang akong magtutudlo nagtudlo namo og mga butang nga misupak sa relihiyon ug milimud sa pagka-anaay Dios.
Usa ka eksamin sa philosophy nangutana, “Nganong mianhi man kita sa yuta?” Ang tubag nga ako untang ihatag mao nga aron hingpit nga makab-ot ang potensyal sa tawo ug moangkon sa atong dapit diha sa sirkulo sa kinabuhi. Wala nako gisulat kana nga tubag tungod kay dili kana maoy akong gituohan.
Hinoon, akong gisulat, “Mianhi kita sa yuta aron pagasulayan ug makabalik aron makapuyo uban sa atong Langitnong Amahan sa kahangturan kauban ang atong mga pamilya.”
Pagkahuman niana, ang magtutudlo mitawag nako ug nangutana kon nakahibalo ba ko sa husto nga tubag sa pangutana. Giingnan nako siya nga nakahibalo ko pero dili ko mosulat og butang nga akong nahibaloan nga dili tinuod.
Gipangutana ko niya kon relihiyuso ba ko ug sa unsa nga simbahan ko nahisakop. Giingnan nako siya nga miyembro ko sa Ang Simbahan ni Jesukristo sa mga Santos sa Ulahing mga Adlaw. Giingnan ko niya nga wala pa siya makaila og bisan kinsa nga relihiyuso nga estudyante nga maisugong mibarug sa iyang mga gituohan ug misulat sa maong tubag.
“Wala ka nako hatagi sa kinadak-ang grado tungod kay ang imong tubag dili maoy husto,” miingon siya. “Pero hatagan ka nako og mga puntos tungod sa kaisug nga mosulat sa unsay imong gituohan.”
Malipayon ko tungod kay mitubag ko sumala sa akong mga kombiksyon ug mga kamatuoran sa ebanghelyo nga akong nahibaloan ug gipaningkamutan nga masunod.
Benjamin M., Chile
Kahayag sa Templo
Pipila ka ting-init ang milabay, ang mga batan-ong lalaki sa akong ward nag-mountain biking. Medyo gikuyawan ko tungod kay primero to nako. Ang akong higala nga si Jacob usa ka eksperyinsyado nga biker, mao nga nagplano ko nga magpaduol niya.
Human makapahulay og kadiyot didto sa ibabaw, misugod mi sa paglugsong sa bukid. Mas hinay ko kay sa uban diha sa grupo ug naulahi, ilabi na human ko natumba sa pipila ka higayon sa likuon kaayong mga dapit. Mihunong si Jacob aron tabangan ko matag higayon nga matumba ko, ug gisulayan namo nga makaapas sa grupo.
Sa pagsawop sa adlaw, klaro na nga nasaag mi. Sobra na sa tunga sa oras sukad namo nakita ang among grupo, ug nagkangitngit na nga dili na kaayo namo maklaro ang agianan. Nag-ampo ko, nangayo sa Langitnong Amahan og tabang ug kaisug nga magpadayon. Dayon si Jacob ug ako nakahukom nga magpadayon sa pagbisikleta sa usa ka partikular nga direksyon. Samtang miliko mi sa usa ka eskina, among nakita ang labing hayag ug maabi-abihong talan-awon—ang Draper Utah Temple! Ang suga nga naggikan sa templo midan-ag sa among agianan, ug nakahimo mi sa pag-uli nga luwas ngadto sa among mga lider ug mga higala.
Matag higayon nga makita nako ang templo, mapahinumduman ko sa kalinaw ug tabang nga gihatag didto ngari namo. Matag higayon nga mobati ko nga nawala diha sa kangitngit sa kalibutan, mahimo kong motan-aw sa templo alang sa kahayag nga akong gikinahanglan.
Joel G., Utah, USA
Pagbaton og Bag-ong Higala
Naglingkod ko sa lamesa sa kan-anan uban sa akong mga higala sa dihang nakabantay ko og usa ka bag-ong batang lalaki—si Michael. Nakahukom siya nga molingkod uban sa mas magulang nga mga batang lalaki, kinsa nagsugod sa pagbugal-bugal niya. Dayon akong nahibaloan nga si Michael dunay autism.
Gipangutana nako si Michael kon gusto ba niya nga molingkod tupad nako ug sa akong mga higala. Mibalibad siya, tingali nahadlok na sa mga tawo nga bugal-bugalan na usab siya.
Pagkasunod adlaw, gipaila-ila nako siya sa akong mga higala. Akong makita nga nalipay siya nga wala ko mohunong sa pagtimbaya niya. Daghan kaayo siya og maistorya. Alegre kaayo siya!
Kada adlaw, akong masulti nga si Michael nagkaanam na ka malipayon nga tawo. Naghinam-hinam siya nga makigdungan og paniudto sa iyang mga higala. Ang paglingkod uban ni Michael sa tingpaniudto nakamugna sa wala madugay og usa ka makahuluganong panaghigalaay. Wala lamang kini makatabang ni Michael, pero nakatabang usab kini nako.
Ang pagbati nga makaserbisyo sa uban usa sa labing talagsaong pagbati dinhi sa kalibutan.
Laura P., Illinois, USA