Usa Ka Ba ka Higala nga Sama sa Alpirel?

Ni Marissa Widdison

Mga Magasin sa Simbahan

Ang tagsulat usa ka sakop sa komitiba sa Simbahan nga may kalabutan sa pagpugong sa paghikog.

Unsay imong mahimo aron mapakita sa imong mga higala nga anaa ikaw alang kanila?

Sa dihang nawala si Abel, gipangutana sa Ginoo ang iyang igsoon nga si Cain kon asa siya. “Ako ba ang magbalantay sa akong igsoon nga lalaki?” mitubag si Cain.

Sa laing pagkasulti, si Cain morag miingon, “Unsaon man nako pagkahibalo? Ang pagbantay niya dili nako trabaho.”

Si Jesukristo, sa laing bahin, nagtudlo kanato og lahi nga mensahe mahitungod sa pag-atiman sa uban. Miingon siya nga kinahanglan natong itratar ang laing tawo sa paagi nga gusto natong trataron, nga naglakip sa pagtabang sa usag usa, pag-atiman sa usag usa, ug pagbantay sa usag usa (tan-awa sa Lucas 6:31).

Dunay mga tawo sa imong palibut nga nanglimbasug og usa ka butang. Mahimong ikaw mismo nanglimbasug og lisud nga mga panahon. Bisan unsa pa ang kahimtang, makahimo ka og kalainan pinaagi sa pagpili nga mosunod kang Jesukristo.

Mga Higala nga Sama sa Alpirel

Usa ka grupo sa managhigala nakakita og dili sagad nga paagi sa pagtabang sa usag usa. Nagagikan sila sa lain-laing mga kahimtang ug mga background sa pamilya, pero nagpakabana silang tanan sa usag usa ug gustong lig-unon ang ilang panaghigalaay.

Usa sa ilang mga higala dunay lisud kaayo nga kahimtang sa panimalay. Iya silang gisultihan nga usahay nangandoy siya nga mahanaw na lang pero gitago lang ang iyang mga pagbati sa likod sa usa ka pahiyum kay nabalaka siya nga hukman siya sa uban.

Ang iyang mga higala ganahan nga mahibalo siya nga luwas siya kauban nila ug nga ang kalibutan usa ka mas maayong dapit tungod kay anaa siya niini. Mao nga naghimo sila og usa ka plano: magsul-ob sila og alpirel. Kada usa nila nagsul-ob og alpirel diha sa ilang sinina kada adlaw aron sa pagpahinumdom nila, ug sa usag usa, nga mipasalig sila sa paghimo og usa ka luwas, sigurado, masaligan nga panaghigalaay—ug nga gusto sila nga ang usag usa magpabilin.

Mga katuigan na ang milabay, kining batan-ong babaye nakahinumdom gihapon sa iyang mga higala nga sama sa alpirel ug mapasalamaton alang sa seguridad nga iyang gibati kay nasayud nga nagpakabana sila kaniya.

Unsay Imong Mahimo?

Dili, dili kinahanglan nga magsul-ob ka og alpirel aron sa pagsuporta sa imong mga higala. Pero mahimo nimong pangutan-on ang imong kaugalingon kon unsay imong mahimo aron mabantayan ang imong mga higala, mapalig-on kadtong kinsa tingali nanglimbasug, ug mahimong higala nga makaluwas alang ni bisan kinsa nga nagkinahanglan sa imong tabang.

“Kita, sa tanang tawo, kinahanglang mahimong mas maayo sa paghigugma sa mga tawo imbis nga mohukom nila. Kita, sa tanang tawo, kinahanglang mas mopaapil sa uban,” miingon si Elder Dale G. Renlund sa Korum sa Napulog Duha ka mga Apostoles. “‘Pagbaton og kalooy, maghimo og kalainan’ (Judas 1:22)—kana ang kinahanglan natong buhaton.”¹

Busa unsa may imong mahimo aron matabangan kadtong anaa sa imong palibut? Anaa sa ubos ang pipila ka ideya aron madasig ang imong pagkamamugnaon.

Pag-ampo ug pangayo og tabang sa Dios. Morag yano ra kini, pero mahimo kining usa ka gamhanang himan. Ang Dios hingpit nga nakaila sa imong mga higala. Hingpit siya nga nakaila nimo ug makatabang nimo aron mahimong usa ka maloloy-on nga higala.
Pagbantay sa mga timailhan nga ang imong mga higala mahimong nanglimbasug.
Pangita og ginagmay, personal nga mga paagi sa pagserbisyo. Sama sa gisulti kausa ni Sister Linda K. Burton, kanhi Kinatibuk-ang Presidente sa Relief Society, “Paniid una, dayon serbisyo.”² Unsa ang imong nabantayan sa imong mga higala? Unsa ang ilang ganahan ug dili ganahan? Unsa ang ilang gikinahanglan? Dayon makatabang ka sa tawo sa usa ka talagsaon, personal nga paagi.
Hinumdumi nga ang mahimong usa ka mahigugmaon, mosuporta nga higala wala magpasabut nga ikaw ang responsable alang sa mga aksyon sa uban. Dili usab ikaw ang responsable alang sa ilang kalipay.
Paghunahuna og butang nga makalingaw nga imong mahimo uban sa imong mga higala, sama sa pagsul-ob og mga alpirel, aron sa pagpahinumdom sa usag usa nga mahimong mosuporta. Ang ubang mga kabatan-onan mihimo og kataw-anan nga mga medyas ug mipasalig nga mahimong “mga matinguhaon sa kaisug, kamabination, ug serbisyo.” Laing grupo ang nagbantay sa usag usa gamit ang mga kolor nga nagrepresentar kon unsay ilang gibati. Kon ang usa ka tawo mibati nga “purple” kaayo sa usa ka adlaw, pananglitan, ang ubang mga higala nasayud nga kanang tawhana nagkinahanglan og dugang nga paghigugma.
Ayaw limitahi ang imong mga higala! Gihimo ni Jesus nga mga higala ang mga tawo nga gitamay sa tibuok kalibutan. Kon motabang ka aron malakip ang uban—ilabi na niadtong naglisud sa pagbaton og mga higala—nagsunod ka sa Iyang ehemplo.

Ang kinabuhi usahay lisud. Pero lig-on ka, ug makaimpluwensya ka. Ang imong pagkamabination ug pagkamahunahunaon makapausab og kinabuhi sa usa ka tawo. Ang imong mga higala nagkinahanglan nimo! Tinguhaa ang giya sa Ginoo, ug Siya mosuporta nimo agi sa imong mga pagsulay ug motabang nimo nga mahimo ang kalibutan nga usa ka mas maayong dapit.